Read Wancho Naga 1 Juhan 5 Bible Online

1 Juhan 5 - Wancho Naga bible

1 Juhan 5

¹Jisu Khrista to Messaiah changpu le ongkya mix a Zang susa changle; üntoxle Hopa to mongkünkya mixe Hosa tochu mongkünle.

²Zangsu Zangsabu to mongkün tüikya keme awan angkya a ija: Ija a Zang to mongkünkya tokhange tamchu chix kaxtombu kax ma laxle tüikya makhangetix.

³Chemthüikoxle keme Zang to mongkünpu le chix kaxtombu kax ma laxle tüikya ang thüipu. Ikoxle chix kaxtombu a kem zongto aluile tsakkya münchang.

⁴Chemthüikoxle Zang susabu noke wüi chaxwannu to lüt ang thole. Üntoxle mongong makhange keme chaxwannu to anaole.

⁵Chaxwannu to anao ang: Jisu a Zang Hosa changpu le ongkya mixe tix thole.

⁶Jisu Khrista a, chix baptikya ti üntoxle chix zikya aji füi hüikya mix tuita changpu. Chix ti tata füi nguikya chichang ikoxle ti hia aji monyi füi nguipu. Üntoxle Chasa chixe ija otsingtsing changpu le wünle, chemthüikoxle Chasa a otsingtsing.

⁷Ikhama kaxkhi azom tüile:

⁸Chasa; ti üntoxle aji; ilaxle ibu azom pangnue kaxkhi tuitata wüi fale.

⁹Keme khünak kaxkhi to ongpu; ikoxle Zang kaxkhi tomtata Ija thak tokya changle, üntoxle chixe ija kaxkhi Hosa bama fakya changle.

¹⁰Idaile Hosa to mongongkyabu ang ma mongto ija kaxkhi tüile; ikoxlechu Zang to chiongkyabue chix atsekya mix ang achangle, chemthüikoxle chix Hosa bama Zange chem akaxdaopuix ija to mong chiong.

¹¹Hakhi a ija: Zange kem ang oshuk chitüikya khüzün fadaoa, üntoxle ija khüzün lainui otong a Hosa changle.

¹²Owa ma Hosa tüipuix, chix ma khüzün tüile; owa ma Hosa chitüipuix chix ma khüzün müntüi.

¹³Hünzom a Hosa to mongongkyabu; hünzom ma oshuk chitüikya khüzün tüile le naxawan lax ang kue ija hünzom hato zapu.

¹⁴Zang thüntho ma kem ang mong chongpu, chemthüikoxle chix mongtex ma keme chix ma jukya pangnusa koxüile kem mong ma atsingshopu.

¹⁵Keme ju-lom pongma chixe atatpu; tamchu ija changtomtapu le keme awanlaxle, keme chix ma ajuju chixe kem ang koxle le keme awanpu.

¹⁶Tüinao owawae mikmax tang chichangle achaxkya ngün pongma, owae chix ang khüzün kox angkya hex, ija Zang to hünzome jop angkya changle. Ija a mik max tang chichang le ochax lyenkya bu hanpak. Ikoxlechu mik max ang tom angkya ochaxbu tüile, ilaxle kue hünzom ang ibu bama Zang to joplax le münthüi.

¹⁷Athaithai pangwüi ochax, ikoxlechu mikmax tang chichangkya ochax tüile.

¹⁸Zang susa owaechu ochax lyenle münngo le keme awanpu, chemthüikoxle Zang Hosae chix sünle thomle, ilaxle haxshixe chix to thomzün ang müntho.

¹⁹Chaxwannu abakle tuita haxshix fangma, keme kem a Zang kux changpu le awanpu.

²⁰Keme otsingtsing Zang tuita tsing angkya hanpakma, Zang Hosa ngui laxle kem ang tsingwankya fadaoa le keme awanpu. Kem otsingtsing Zang tuita tamchu Hosa Jisu Khrista füi notom ma womle ngopu. Ija a otsingtsing Zang tuita, tamchu tuita oshuk chitüikya khüzün.

²¹Kuli-kunaohom, ma alüile othai zangbu chak tokya azünle thomlax!