Read Wancho Naga Kaxfünpa-Hwom 1 Bible Online

Kaxfünpa-Hwom 1 - Wancho Naga bible

Kaxfünpa-Hwom 1

¹Jihusua zikya füima Israel noke JOWANPA ma atüi: “Kwom khama opupu homjen paolaxle pongwangole Kanan nok tingtakle changüi?”

²JOWANPAe hwom kax to lan: “Pongwang ma Judah homjen shong-kaüi. Kue hwom ang ija haxtok hwom chak to dandaoa.”

³Judah homjene Simeon homjen ang thüi: “Kwom ang tingtak ang koxkya chaxwan to kwom füi tomle zan to kahax, ilaxle Kanan nok füi kem tomwüile azan hax. Ifüima kwomechu hünzom ang tingtak ang tomkya zuma, ija haxtok to hünzom füi tomle kwom chuwüi kaüi.” Ikhoma Simeon homjen hia

⁴Judah homjen zan to tomwüi ka. JOWANPAe hwom ang Kanan nok hia Peri nok to lüt ang tom, ilaxle hwome Bezek ma 10, 000 khünaknu to lüt.

⁵Hwom thoma ikhato Adonibezek bang ilaxle hwom chix füi azan.

⁶Chix a zikle pao, ikoxlechu hwome chix achuale kop ilaxle chix chak khinu hia chakhi khinu texle awüt.

⁷Adonibezek-e thüi: “wanghom hwom 70 ang a chak-khi khinu hia chakhi khinubu texle awüt laxle ku tsap chitong angkya saxfun tswon ang koxdaopu. Hwom to kue chemle hwonpuix ija ningle Zang-e athax ku to hwonpu.” Chix ang Jerusalem to pao ilaxle chix ikhato zi.

⁸Judah homjene Jerusalem tingtak laxle ija kop. Hwom khünaknu lang ilaxle tingnu to wünlang.

⁹Ifüima hwom Kanan nok füi azan ang ka. Kanan nok a haxhua to, haxhua chithong to, ilaxle shuathongchi sak-hax to tüikya.

¹⁰Hwome Hebron tingnu (oja ang Kiriath Arba lechuwüi nyakpuix) ma ngokya Kanan nok zan to dong. Ikhato hwome Sheshai, Ahiram, dong. Ikhato hwome Sheshai, Ahiram hia Talmai saxthom to lüt.

¹¹Imakhange Judah khünaknue Debir tingnu zan to dong. Ipongma ija tingnu ang Kiriath Sefar le nyakkya.

¹²Hwom kha angkya mixsün tuita Kaleb le amünkya mixe thüi: “Kiriath Sefar kop ang thokya mix ang kue ku sacha Aksah koxüi.”

¹³Kaleb honao Kenaz sasün Othniel-e ija tingnu kop, ikhoma Kaleb-e chix sacha Aksah chix ang kox.

¹⁴Aju-asomkya nyix Othniel-e she ang hopa ma manzai haxtok ju angkya atsang. She mantsak kho angkya thai, ikhoma Kaleb-e atüi: “Nange chemchem laxse tsudaicha?”

¹⁵She-e lan: “Kue ti hax hidaole laxse tsule. Nange ku ang koxkya haxtok a haxza towüi.” Ikhoma Kaleb-e she ang shuasa okux hia othong le kox.

¹⁶Mosa hohochong, Kin nok, Jeriko makhange Judah hwom füi azuile pao. Jeriko a Judah angkya Arad zongma shuathong ma chemchu chitüikya haxza nok angkya pam tingnu tuita. Ikhato hwom Amalek-nok füi tomle tingtok kople ngo.

¹⁷Judah khünakbu Simeon hwom füi tomle zan to ka ilaxle Zefath tingnu ma tüikya Kanan nok to lüt. Hwome ija tingnu to thuakzomle chang, ija olithule amüt, ilaxle ija ang Horamah le nyak.

¹⁸JOWANPAe Judah hwom to fong ilaxle hwome haxhuachi hwom haxsüt ang kop. Ikoxlechu hwome Gaza, Ashkelon, chichangba Ekron, ibu hwom akhople tüikya haxsütbu füi womle chikop homtoxle dantox. Tinu kax achole tüikya tingnubu ma jan man-kanlinbu tüikya khoma Judah nokbue ibu khünak jwonle apao ang chitho.

²⁰Mosa-e kaxtom koxle toxkya ningle Hebron a Kaleb ang kox, chemthüikoxle chixe Anak su-sa hwom saxthom azom jwonle apao.

²¹Ikoxlechu Benjamin homjene Jerusalem ma ngokya Jebu nok jwonle chiapao, ilaxle owang tokhange wüi Jebu nok a Benjamin hwom füi tomle ngole hüi.

²²Luz le nyakkya tukma Efraim hia Manasseh homjen nyi Bethel tingtak ang ka. JOWANPAe hwom to asun. Hwome ija tingnu to zyet ang khünak apao.

²⁴Ija mixsüne khünak tuita laile paoüi ngün. Ija mixsüne chix ang thüi: “Kwome nang to chem münthüipu, kwom hama tingnu to ngui angkya lom awanle fahüi.”

²⁵Ikhoma chixe hwom ang lom awanle kox, ilaxle Efraim hia Manasseh khünakbue tingnu angkya khünak pangwüi lang, ikoxle ija lom awanle fakya khünak hia hwom homkha khünak a chilang.

²⁶Ifüima chix Hit nok to pao ilaxle ikhato tingnu tuita zaile alai, ilaxle ija ang Luz le nyak, ija mün a anyix kople itya ma wüi tüile.

²⁷Beth Shan, Tanak, Dor, Ibleam, Megido ilaxle hozui angkya tinglongbu ma tüikya khünakbu Manasseh hwome jwonle chiapao; Kanan nok ima wüi ngole hüi.

²⁸Chemtue Israel; khünakbu tsak-zongle hüipuix, hwome Kanan nok ang hwom mwot mokle fa angkya atsang, ikoxlechu anyix kople hwome ibu pangwüi jwonle chiapaole tüile.

²⁹Efraim homjene Gezer tingnu angkya Kanan nok jwonle chiapao, ikhoma Kanan nok hwom füi tomwüile ngole hüi ilaxle hwom hanpak ma mwot atsangle amok.

³⁰Zebulun homjene Kitron hia Nahalal angkya Kanan nok jwonle chiapao, ikhoma Kanan nok hwom füi tomwüile ngole hüi ilaxle hwom hanpakma ma mwot atsangle amok.

³¹Ako, Sidon, Ahlab, Akzib, Helbah, Afek, hia Rehob, ibu tingnu angkya Kanan nok Ashar homjene jwonle chiapao.

³²Hwome jwonle chiapaokya daile Ashar hwom a nokpu Kanan nok füi tomwüi ngole hüi.

³³Neptali homjene Beth Shemesh hia Bethanath tingnubu angkya Kanan nok jwonle chiapao. Neptali homjen nokpu ang bangkya Kanan nokbu füi tomwüile ngo ikoxlechu ibu ang hwom hanpakma mwot mok angkya atsang.

³⁴Amor noke Dan homjen haxsha to thai ang chitomle haxhua chito atsangle angwot.

³⁵Amor nok a chipaole, Aijalon, Shalbim, hia Heres Haxnu ma ngole hüi, ikoxlechu Manasseh hia Efraim homjen khünaknue ibu hwom fangto thom ilaxle atsangle hwom mwot mok ang tom.

³⁶Sela zongma shuakuxchi, Edom nok longzi Akrabim Lomnu akaile le.