Read Wancho Naga Kaxfünpa-Hwom 11 Bible Online

Kaxfünpa-Hwom 11 - Wancho Naga bible

Kaxfünpa-Hwom 11

¹Jefthah, mongchongkya Gilid nok süpahi tuita, owa tsangtsa hangkya mixcha sasün changkya hex, chix hopa Gilid

²ang chix kakonu makhange mama sasün hwom chuwüi tüikya, ilaxle hwom chongle hüikya füi tomle, hwome Jefthah ang hom toxlaxle pao angkya atsang. Hwome chix ang thüi: “Nange hünpa mantswon chemchu münkopüi; nang a mama mixcha sasün changle.”

³Jefthah a hotüi-honao hwom thoto paole azang laxle Tob haxtok to ngo. Ikhato chemli mwot tochu chihüikya khünakbue chix to kak-kün, ilaxle ibu khünak chix akhople nguile ngo.

⁴Ifüima alüile chingo homtoxle Amon nokbu a Israel nokbu zan to ka.

⁵Chemtue ija changpuix, Gilid angkya lompabue Tob nok to ngokya Jefthah tamchatle apüi ang pao.

⁶Hwome thüi: “Nguihüi ilaxle kwom azuihüi, ikoxtix wüi kwome Amon nok füi azan ang thoüi.”

⁷Ikoxlechu Jefthah-e lan: “Hünzome ku to miktsakle chemthüikoxle ku apa hom angkya laile pao angkya hünzome atsangpu. Athax hünzom tingtui ma tüile le ku hato omalax ang nguingo?”

⁸Hwome Jefthah ang thüi: “Amon nok füi azan ang nang kwom füi tomle naxkase tamchu Gilid nok lom azuile naxchangsele kwom a nang hato nguipu.”

⁹Jefthah-e hwom ang thüi: “Hünzome ku Amon nok füi azan ang hom to chat ang kox tamchu JOWANPAe ija zan to lüt ang tomle jangchang, Ku a hünzom lompa ang changüi.”

¹⁰Hwome lan: “Kwom mongtsule. Ija bama JOWANPA a ngünmix changle.”

¹¹Ikhoma Jefthah a Gilid nok lompabu füi tomle chat, ilaxle khünaknue chix a hwom apün ang tamchu lompa ang kam. Jefthah ija chix mwot Mizpah ma JOWANPA thüntho ma ngaile pongle kop.

¹²Ifüima Jefthah-e ija kaxho koplaxle Amon wanghompa hato kaxho mixbu tomle akat: “Nang kwom füi ahe-atsi angkya chem tüi? Nange chemkhoma kwom haxtok tingtak?”

¹³Amon nok wanghompa-e Jefthah-e apaokya kaxhomixbu kax to ile lan: “Chemtue Israel nok Ijip nok tokya nguile ngopuix, ipongma hwome ku haxtok Arnon Shuanu makhange Jabbok Shuanu hia Jordan Shuanu alople laxpu. Athax nange ija tingmüi-lomzingle koxle achat angkya wüi changle.”

¹⁴Jefthah-e ija kaxlan füi Amon nok wanghompa hato kaxho mixbu achat:

¹⁵“Israel noke Moab haxtok chichangba Amon haxtok laxle thüikya a kaxtsing münchang.

¹⁶Ija a ile changkya changpu: chemtue Israel nok Ijip dantoxlaxle laipuix, hwom a sak-hax tokhange Agaba tinu shinthuk akailaxle Kadesh to nguipu.

¹⁷Ifüima hwome hwom haxtok akaile le angkya hanpakma tsaiju-kaxju ang Edom nok wanghompa hato kax fapu. Ikoxle Edom nok wanghompa-e chix haxtok akaile hwom le ang chitom. Hwome Moab wanghompa machu tsaiju-kaxjule changpu, ikoxle chixe chuwüi chix haxtok makhange hwom le ang chitom. Ikhoma Israel nok a Kadesh ma ngole hom.

¹⁸Ifüima hwome sak-hax makhange Edom nok haxtok hia Moab nok haxtok tsiakle handün chito anguile lepu, ija a Arnon Shuanu zongma tachikao to. Hwome ikhato pom zaile athongpu, ikoxlechu hwome Arnon Shuanu chita chemthüikoxle ija a Moab nok longzi chang koxle.

¹⁹Ifüima Israel noke Heshbon angkya Amor nok wanghompa Sihon hato kaxhomixbu akatpu, ilaxle hwom chaxwan to chix haxtok akaile le ang tom angkya tsaiju-kaxjule changpu.

²⁰Ikoxle Sihon-e Israel nok ang ile chang ang chitom. Chixe chix süpahibu pangwüi sele asox, Jahaz ma pom zaile athong, ilaxle Israel nok to singpu.

²¹Ikoxlechu JOWANPA, Israel nok Zang, chixe Israel nok ang Sihon hia chix süpahibu to lüt ang tompu. Ikhoma Israel noke ikha to ngole tüikya Amor nok haxsüt pangwüi hwople kop.

²²Shuathongchi ma Arnon makhange shuakuxchi ma Jabbok ilaxle handün chito sak-hax makhange hannop chito Jordan alople hwome Amor nok haxtok pangwüi hwople koppu.

²³Idaile chix khünaknu Israel nok hanpakmale Amor nok jwonle apaokya a mama owa münchang ikoxle Israel nok Zang JOWANPA chix jao changpu.

²⁴Hünzome ija tamchatle lax ang azong ngopia? Hünzom baozang Kemosh-e hünzom ang koxle tüikya haxtok hünzome kople thom ang tsuaküi. Ikoxle JOWANPA kwom Zang-e kwom ang koxdao pupu haxtok bakle kwome kople thom angkya wüi changpu.

²⁵Moab nok wanghompa Balak, owa Zippor sasün changkya hex, chix füi hünzom wüi sümüikya changpule hünzome thütle ngodaicha? Chixe Israel nok füi otuechu zongsaile chichang. Chix tam ngaxchu kwom zan to kale changhexcha?

²⁶Zanglao 300 hanpakma Israel noke Heshbon hia Aroar, iboma chuwüi ibu akhople tüikya tinglongbu kople thom, iboma Arnon Shuanu kax achole tüikya tingnubu pangwüi kople thom. Hünzome ibu pangwüi ipongkhae büthüikoxle achatle chilax laxpu?

²⁷Münchang, kue hünzom zongto thaikya oli chemchu mamok. Ku füi azanlaxle hünzome thaikya mokngole. Kaxfün a JOWANPAe tix fa angkya changle. Chixe anyix Israel nok hia Amon nok bama tsaifün-kaxwünle tsuaküi.”

²⁸Ikoxlechu Amon wanghompa-e Jefthah chito khange ahüikya ija kaxho to na ojao chitha.

²⁹Ifüima JOWANPA Chasa Jefthah hato hüi. Gilid makhange chix Manasseh to le ilaxle Gilid angkya Mizpah to chat ilaxle Amon to le.

³⁰Jefthah-e JOWANPA füi tsaotsüt: “Nange ku ang Amon nok to lüt ang jangtom,

³¹chemtue ku zan to lütlaxle chatüihex, ku homkha angkya khünak pongwang ma ku füi apong ang laile hüikya mixhuak kue nang ang tö tuita ang koxüi.”

³²Ikhoma Amon nok füi azan ang Jefthah shuanu tale le, ilaxle ija zanhok ma JOWANPAe chixe wüi lüt ang tom.

³³Chixe hwom to Aroar makhange Minnith wankam akhople Abel Keramim alople jao, pangnu athüt koxle tingnu 20, pangwüi tingtakle kop. Khünaknu mik maxkya a huanu changkya, ilaxle Israel noke Amon nok to lüt.

³⁴Chemtue Jefthah Mizpah alople hom to nguipuix, ipongma chix füi apong ang chix sacha, khopsya akhaole azüizüithale laile apong. Chix ang naosa she tata wüi changkya.

³⁵Chemtue chixe she ngünle laxpuix, chixe mongtsik laxle chix nyi akyetle thüi: “Oh, ku sacha! Nange ku mong ashixdaoa! Ku mongto okak adün angkya nang ang wüio lechu büthüikoxle chang angkya? Kue JOWANPA füi tsaotsütle changdaoa, ilaxle kue ija chatle achat ang müntsuak!”

³⁶She-e chix ang thüi: “Nange JOWANPA füi tsaotsütle jangchangdao thüiningle, nange ku füi chem mokse hex ija moklax, chemthüikoxle JOWANPAe nang ang nang zanpa Amon nok to olüi khom ang tomdaoa.”

³⁷Ikoxle she-e hopa füi ile akax: “Ku hanpakma ija tuita mokle fahüi. Lyetjang anyi hanpakma, ku haxhua to donglaxle zuikhuibu füi aham ngolaxle, ku a naocha ma wüi zitsuak angkya hanpakma ku tata danhüi.”

³⁸Chixe she pao ang dan ilaxle lyetjang anyi hanpakma she tsailo to ngo. She füi tomle hozuibu haxhuabu to dong ilaxle mangsop chemthüikoxle she a supux-sapaile chichang homtoxle naocha ma zile pao angkya changle.

³⁹Lyetjang anyi füima she hopa hato chatle ngui. Chixe chemle JOWANPA füi tsaotsütle changdaopuix ile mok, ilaxle she a naocha ma wüi zi. Gilid angkya Jefthah sasün sacha hanpakma faoto paolaxle zanglao to nyix ali pong

⁴⁰mangsople chang angkya a Israel nok naochabu hanpakma wanlom tuita ang achangle pao.