Read Wancho Naga Kaxfünpa-Hwom 12 Bible Online

Kaxfünpa-Hwom 12 - Wancho Naga bible

Kaxfünpa-Hwom 12

¹Efraim nok a azan ang achwon; hwome Jordan Shuanu tale Zafon to ngui ilaxle Jefthah ang thüi: “Hünzom füi tomle ka ang kwom chiahyen homtoxle hünzome Amon nok zan to ka ang longzi büthüikoxle kaipu? Müidaoa hünzom khangkho ma hombu zokle ashunlax!”

²Ikoxlechu Jefthah-e hwom ang thüi: “Ku khünaknu hia Amon nok nyi bama hyet makya jao tüile. Kue hünzom sepu, ikoxle hünzome ibu chak tokya kwom khosele chichang.

³Hünzom a münhüi angkya changale kue ngünkya zuma, hünlit kue laxlaxle hwom füi azan ang long ta le chang, ilaxle JOWANPAe hwom to kue wüi lüt ang tomle. Idaile athax hünzom ku füi azan ang omalax ang laipu?”

⁴Ifüima Jefthah-e Gilid nok angkya khünaknu pangwüi jongta khama asox ang tom, Efraim nok füi azan ilaxle hwom to lüt. (Efraim noke thüi: “Efraim ma ngokya hünzom Gilid nok hia Manasseh khünakbu, hünzom a Efraim nok angkya awütkyabu!”)

⁵Efraim nok paole azang ang chitom angkya hanpakma, Jordan Shuanu tale le angkya lompong pangwüi ziakop. Chemtue Efraim khünak opange ija tale le ang azongpuix, hwome tsaiju-kaxjule changkya zuma, Gilid noke hwom ma atüi: “Nang Efraim nok changchami” Chixe: “Münchang”, le janglan

⁶hwome chix ang “Shibboleth”, le akax ang tom. Ikoxle chixe “Shibboleth”, le lan, chemthüikoxle chixe ija kaxhuak tsaothale akax ang chitho. Ile changkya zuma hwome ija khünak kopüi ilaxle Jordan Shuanu takya lomkai jongjongta khama hwome chix langüi. Ija tuk ma 42, 000 khünak Efraim nok lang.

⁷Jefthah-e Israel nok zanglao azok azüi. Ifüima chix zile pao ilaxle Gilid ma tüikya chix tinglong ma akhün.

⁸Jefthah füima, Bethlehem angkya Ibzan-e Israel nok azüi.

⁹Chix ang sasün hwom 30 ilaxle sacha hwom 30 tüikya. Chixe chix sacha hwom mama saxthom angkya hwom mixsün 30 ang aju-asomle koxle apao ilaxle chix sasün hwom 30 hanpakma mix saxthom tokya mixchabu hwom 30 apüile kox. Ibzan-e Israel nok zanglao anüt azüi,

¹⁰ifüima chix zile pao ilaxle Bethlehem ma akhün.

¹¹Ibzan füima, Zebulun angkya Elon-e Israel nok zanglao 10 azüi.

¹²Ifüima chix zile pao ilaxle chix a Zebulun haxsüt angkya Aijalon ma akhün.

¹³Elon füima, Pirathon angkya Hillel sasün Abdon-e Israel nok azüi.

¹⁴Chix ang sasün hwom 40 ilaxle susün hwom 30 tüikya. Ibu a mantsak 70 kho ma ngale aham. Abdon-e Israel nok zanglao achyet azüi,

¹⁵ifüima chix zile pao ilaxle chix a Pirathon ma akhün; ija a Amalek nok angkya Efraim haxtok ma.