Read Wancho Naga Kaxfünpa-Hwom 13 Bible Online

Kaxfünpa-Hwom 13 - Wancho Naga bible

Kaxfünpa-Hwom 13

¹Israel noke anaole chuwüi JOWANPA alakle awüt, ilaxle chixe hwom to Filistia nok ang zanglao 40 apünle ngo ang tom.

²Ipongma Zorah tinglong angkya Manoah le mixsün tuita tüikya. Chix a Dan saxthom angkya mixsün tuita. Chix kakonue sapux-naopaile chang ang chitho.

³JOWANPA kaxtaimix she füi apong ilaxle ile akax: “Anyix kople nange sapux-naopai ang chithole ngokya, ikoxlechu chwonle wüi nang ma nao nguidongle changüi ilaxle lüka naosa tuita puxüi.

⁴Ju jat-jat tüta ningkyachu münling-ole adulax, chichangba taxsaxli sütling chu saxle taxchang;

⁵ilaxle nange nao ngünle changkya füima, nange chix ang khosex-khang ongle chichangüi chemthüikoxle puxkya nyix makhange wüi chix a Zang ang koxkya nazarait tuita ningle panle thomüi. Chixe Filistia nok chak tokya Israel nok khosün angkya mwot owang wangüi.”

⁶Ifüima ija mixchae nguilaxle ma kakopa hama wünle thüi: “Ku hato Zang khünak nguile, ilaxle kue chix to Zang kaxtaimix tuita ningle zale hupu. Kue chix ma ojong tokya nguipuix ijachu münatüi, ilaxle chixe ku hama mün apuale chu müntox.

⁷Ikoxlechu chixe ku füi ku ma nao nguidongle changüi ilaxle lüka naosa tuita puxüile akaxle. Chixe ku hama ju-khan chemchu chiling angkya tamchu taxsaxli müi chemchu chisax angkya akaxdaoa, chemthüikoxle chix a ozün ma ngokya kople Zang chak to danle otsao ang ngo ang tom angkya oli changle.”

⁸Ifüima Manoah-e JOWANPA to jop: “JOWANPA, chingchajaja laxle ija Zang khünak tamchatle nguilaxle ija nao ngünkya zuma kwome chempangole mok angkya hex ija apuale faüile kue akaxdaoa.”

⁹Manoah-e chemle joppuix ija ningle Zang-e mok, ilaxle chix kakonu zang ma thungle tüipongkhae tamchatle ngui. Hokakopa Manoah a she füi tomle chiasu,

¹⁰ikhoma she nonokhaile zikle paolaxle chix hama wünle akax: “Hulax! Otho pongma ku füi apongkya khünak athaxchu tamchatle nguile tüile.”

¹¹Manoah ajong ilaxle chix kakonu mantole ngui. Chix ija mixsün hato nguilaxle atüi: “Ku kakonu füi zangwünle chang mix a nang hexnyi?” Chixe lan: “Changle”.

¹²Ifüima Manoah-e atüi: “Chemtue nang kax changle ngaiüihex, ija naoe chem moküi? Chix a chemningkya tsün ngoüi?”

¹³JOWANPA kaxtaimixe lan: “Kue she füi chemle akax daopuix ija lailaile nang kakonue ojao chithaile mok angkya changpu.

¹⁴Grep zu makhange laikya oli she-e chemchu chisax angkya changle; she-e ju-khan chemchu chisax-chiling angkya oli, chichangba taxsaxli süt chemchu chisax angkya changle. She-e kue she füi akaxle changdaokya pangwüi chithaile mok angkya oli changpu.”

¹⁵Manoah-e ija mixsün a JOWANPA kaxtaimix tuita changpule chitsing, ikhoma chixe ija mixsün ang thüi: “Nang athaxthax wüile shong-taxpao. Nang hanpakma zwonsa müi songhax.” Ikoxle ija kaxtaimixe thüi: “Ku ngole changkoxchu, kue nang süt münsax. Ikoxlechu nang ija achwonse jangtsu, ija a JOWANPA hanpak ang tuita tö ningle zokle ashunlax.”

¹⁷Manoah-e lan: “Kwom hama nang mün apuale toxhüi, ikoxtix nang kax changle ngaikya zuma kwome nang mün fuale changüi.”

¹⁸Ija kaxtaimixe atüi: “Nange ku mün chem hanpak ang awan thomse tsu? Ija mün a tuita ohünotün mün changle.”

¹⁹Ikhoma Manoah-e zwonsa tuita hia saxziak hiadaole lax, ilaxle ibu a ohünotün mwot mokle tüikya JOWANPA ang longnu tuita kho ma zokle tö ang kox.

²⁰Chemtue ija tö-tsap angkya wünle laile ding to dongpuix, Manoah hia hosheko hokhie ija JOWANPA kaxtaimix a wünle füi tomle zangdingkho to dongüi ngünle lax. Ifüima tix Manoah-e ija mixsün a JOWANPA kaxtaimix tuita changdaongün le tsingle lax, ilaxle chix kakonu hokhie thün haxchi to ahole akhople hax to tsangtsa tswonle awüt. Okhie ija kaxtaimix chatle tam chingüntox.

²²Manoah-e chix kakonu füi akax: “Künyi a zi angkya atsingsho, chemthüikoxle künyie Zang ngünle laxdaoa!”

²³Ikoxle chix kakonue lan: “JOWANPAe kem mik amüt ang hwonkya jangchang, chixe künyie koxkya töbu pongle chikopse; chixe künyi hama ibu münahose chichangba athax chixe künyi füi ile münakaxse.”

²⁴Ija mixchae lüka naosa tuita ngün ilaxle chix ang Samson le mün kox. Ija nao tsongle hüi ilaxle JOWANPAe chix to mohiman.

²⁵Ilaxle Zorah hia Eshtaol pom nyi bama ngopongma JOWANPAe chix ang tsak-zong kox angkya owang wang.