Read Wancho Naga Kaxfünpa-Hwom 14 Bible Online

Kaxfünpa-Hwom 14 - Wancho Naga bible

Kaxfünpa-Hwom 14

¹Nyixta Samson a Timnah to pao. Ikhato chixe Filistia mixcha tuita müile ngünle tox.

²Chix hom to chat ilaxle honu hia hopa nyi hama wün: “Ku mik-hu ma müikya naocha tuita kue Timnah to ngünle toxdaoa. She a ku hanpakma apüihüi; kue she a ku kako ang laxse tsule.”

³Ikoxlechu honu hia hopa nyie chix ma atüi: “Nang kako ang lax ang naocha tuita lom ang nang iningkya songsari nok Filistia to paongo angkya chem mwot? Nange kem haxjen homjen ma, kem mamix khama wüi naocha tuita münataktsuak hexmi?” Ikoxle Samson-e hopa kax to lanle thüi: “Kue ku kako ang laxse tsukya a she tix changle. Kue she laxse tsule.”

⁴JOWANPAe Filistia nok füi azan angkya opong atak angkya hanpakma ija a JOWANPAe mokle ngopule honu hia hopa hwome chitsing. Ipongma Israel nok a Filistia noke apün laxle tüikya.

⁵Ikhoma Samson a honu hia hopa nyi laxlaxle Timnah to ju. Ikhatokya grep haxtok akaile hwom le le ngopongma, chixe ikhato mailang hosa tuita ahungkya atatle lax.

⁶Allele JOWANPA tsak-zong makhange Samson hato janzüi hüi, ilaxle chixe ija mailang a, tuita zwonsa langpupule chak tata füi ashik-akhix. Ikoxle ija chix mwot bama chixe honu hia hopa nyi hama chiwün.

⁷Ifüima chix paolaxle shekosa füi zangwün, chixe she to laxsele müimamale mongtsu.

⁸Ifüima alüile chingo homtoxle Samson chat ilaxle ija naocha füi kako tan. Chatüi lom to chixe langle toxkya mailang mang to hu ang chix khe, ilaxle chix thoma ija müimang ma nax azople oti füi bangkya khoma chix huanuma abüt.

⁹Chixe ija nax-ti chak füi dokle lax ilaxle ija chixe lomba to saxle aham. Chix honu hia hopa nyi hato nguilaxle hokhi ang chuwüi ija nax-ti hidaole kox. Okhie ija sax, ikoxle Samson-e ija nax-ti a mailang mang ma bangkya laxpule chiwün.

¹⁰Chix hopa a naochasa hom to ngui, ilaxle ikhato Samson-e püntuxle chang. Ija a naosün tuitae ile mok angkya wanlom tuita changkya.

¹¹Chemtue Filistia noke chix ngünle laxpuix, chix füi tomle ngo ang hwome naosün hwom 30 apao.

¹²Samson-e hwom ang thüi: “Kue hünzom ma tsaisong-kaxnong tuita atüifang. Nyix anüt mong ma aju-asomle changkya mwot tsuakle machangba wüi hünzome ija chem hanpak hex ku hama wünle fa ang jangtho thüiningle kue hünzom ang toxnyi khao azok ilaxle pangpwon nyi khao-azok le koxüi.” Hwome thüi: “Kwom hama ija tsaisong-kaxnong wünle fahüi, kwome apale kop-hax.”

¹⁴Chixe thüi: “Saxkya mix makhange sütli tuita lai; Tsakzong makhange tikya oli lai.” Nyix azom kaikoxlechu hwome ija tsaisong-kaxnong otong chiataktsuak.

¹⁵Nyix ali lükya to hwome Samson kakonu füi akax: “Kwom hama ija tsaisong-kaxnong otong awanle fa angkya hanpakma nange pi ija chemtomta hexle atsingle tik-hu. Nange ija kwom hama wünle chifa thüiningle kwome hünpa hom ma wünlangüi ilaxle nangchu ija wünkha to zokle ashunüi. Hünkhie kwom, kwom kux-ka pale lax ang ahyenle apüikya hia?”

¹⁶Ikhoma Samson kakonu a chix hato mikfi-tunjile sopngale ngui ilaxle akax: “Nange ku to mong münkün changa! Nange ku to miktsakkya changa! Nange ku zuikhuibu ma tsaisong-kaxnong tuita atüi ikoxle ija chem hex ku hama wünle chifa khato!” Chixe thüi: “Hulax, kue ija kax anu hia apa nyi hama ngaxchu mawün. Kue ija nang hama büthüikoxle wün angkya?”

¹⁷Ija zangwün bama she a tuiju-nasomkya pangpwon alyetle nyix anüt jao sople ngo. Ikoxle nyix anüt lükya to chixe she hama ija tsaisong-kaxnong chem hex ija apuale kox, chemthüikoxle she-e chix atsangle ngo. Ifüima ija she-e Filistia nok hama wünle kox.

¹⁸Ikhoma nyix anüt lükya to, Samson nuilua to dongle changüi thoma, tingnu angkya khünakbue chix ang thüi: “Naxti thak ma atikya chemtüi? Mailang tok to kaile tsakkya chem tüi?” Samson-e lan, “Hünzome ku maihunu füi hanbaile chichang thüikoxba, Athaxchu hünzom ija kax to lan ang münthose.”

¹⁹Alle JOWANPA janzüi makhange chix ang tsak-zong kox ilaxle chix a Ashkelon to ju, khünak 30 lang, hwom nyi-za sikle lax, ilaxle ija tsaisong-kaxnong kaxlan thokya mixsün hwom ang ibu tuina kox. Ile changkya füima, huanuma küntsik-mongma füi chix a hom to chat,

²⁰ilaxle chix kakonu a chix asom pongma zuikhui shemkhax ang laxkya mixsün ang kox.