Read Wancho Naga Kaxfünpa-Hwom 15 Bible Online

Kaxfünpa-Hwom 15 - Wancho Naga bible

Kaxfünpa-Hwom 15

¹Hanpak hiadaole homkya füima Samson a wonglai tsaxtu lua ma chix kakonu wai zwonsa tuita koplaxle ju. Chixe sheko hopa ang thüi: “Ku ku kakonu nui to dongse tsule.” Ikoxle ija mixpae chix nui to dong ang chitom.

²Chixe Samson ang thüi: “Nange she thua huanuma anukya changale thütlaxle kue she a nang zuipa ang koxdaoa. Ikoxlechu she füichu honao wüi sümüile tüipu, jangthüichu nange she mix laxhüi.”

³Samson-e lan: “Izuma a Kue Filistia nok to chemle hwonüi hex ija bama ku thaikya ang münchangpu!”

⁴Ikhoma chix pao ilaxle hijan 300 kop. Chixe ibu müikua anyipong akungle asop laxle ija osoppong ma wünnan thop khale kox.

⁵Ifüima chixe ibu hijan müikua ma wün füi thutle kox ilaxle ibu a Filistia nok haxtok to danle apao. Ile chixe sax ang zütle athün thomkya tata chichangle mazütle zimfa ma tüikyabu ibomachu olip haxtok ngaxchu wüi womle pangwüi zokle ashun.

⁶Chemtue Filistia noke ija owa mwot hexle lomle changpuix, ija a Samson mwot changle le hwome lomle atak chemthüikoxle hohochong, Timnah nok angkya mixsüne Samson sheko a chix füikya zuikhui tuita ang koxle apao. Ikhoma Filistia nok nguilaxle ija mixcha hia hopa hwom hom pangwüi zokle ashun.

⁷Samson-e hwom ang thüi: “Ija a hünzome lompu! Kue tsaopu, hünzom to olüi khomle machang tanto kue mündan!”

⁸Ojao za-adünle hwom to shing ilaxle hwom huanuma lang. Ifüima chix ikha angkya paolaxle Etam angkya longkun fangto ngo.

⁹Filistia nok nguilaxle Judah ma pom zaile thong, ilaxle Lehi tinglong to sing.

¹⁰Judah angkya khünakbue hwom ma atüi: “Hünzome kwom to chemkhoma singpu?” Hwome lan: “Kwom a Samson koplaxle pao ang nguipu; kwom to chixe chemle hwonpuix ija lailaile kwomechu chix to hwon angkya changle.”

¹¹Ikhoma Judah angkya khünak 3, 000 Etam zakzyen tokya longkun to ngui ilaxle Samson ang thüi: “Nange Kwom Filistia nok hia kwom lompabu tikcha? Nange kwom to ija chem hwon?” Chixe lan: “Hwome ku to chemle hwonpuix kue hwom o ija jannong alüi wüi.”

¹²Hwome thüi: “Kwom ikhato nang khale koplaxle ibu chak to kox angkya hanpakmale nang kop ang nguipu.” Samson-e lan: “Hünzome ku a hünzom chak makhange mik max ang müntompu le tsaohüi.”

¹³Hwome lan: “Müiüi, kwome nang koplaxle khaklan laxle hwom chak to dandao angkya achangle, kwome nang a münlangpu.” Ikhoma hwome zu hozün anyi füi chix to kha ilaxle ija zakzyen tokya apüilaxle chix apüi.

¹⁴Chemtue chix Lehi to nguipuix, Filistia nokbu a chix hato zikle ngui, ilaxle chix to sa-male kaxma thüi. Allele JOWANPA janzüie chix ang tsak-zong kox ilaxle chix chakbu ma khale thomkya zubu a zisa afünle awütkya lailaile afünle awüt.

¹⁵Ifüima chix thoma chwonchwonle zikya mantsak okaxza tuita bang. Ija hato julaxle chixe ija tswonle kop, ilaxle ija füi hajat khünak langle awüt.

¹⁶Ikhoma Samson-e tsaingao, “Mantsak kaxza makhange kue khünak hajat jao langtsuak; Mantsak kaxza füi kue hwom atsongle huanuma athün.”

¹⁷Ifüima, chixe ija müikaxza tswonle awüt. Ile changkya kha onui ang Ramath Lehi le nyak.

¹⁸Ifüima Samson ang tüle tilan, ikhoma chixe JOWANPA to nyak akax: “Nange ku ang ipongpongle lüt ang tompu; ikoxle athax ku tilan ma maxle ngopongma ibu songsari Filistia noke ku naxlanglax le hia?”

¹⁹Ipongma Zang-e Lehi ma tüküi tuita alai, ilaxle ikhama ti awang ang tom. Samson-e ija ti ling ilaxle tsaktsa dongle tsak. Ikhoma ija tümik ang Hakkor le nyak. Lehi ma anyixchu ija otya ma wüi tüitan.

²⁰Samson-e Israel khünaknu zangtsa azüi. Ipongma hwom haxtok a Filistia nok chak ma tüikya.