Read Wancho Naga Kaxfünpa-Hwom 16 Bible Online

Kaxfünpa-Hwom 16 - Wancho Naga bible

Kaxfünpa-Hwom 16

¹Nyixta Samson a Filistia nok tingnu Gaza to pao, ikhato chixe tsangtsa hangkya mixcha tuita atak ilaxle she füi jiple tox.

²Gaza angkya khünaknue ikhato Samson tüikya tikle lax, ikhoma hwome ija onui akhople kop ilaxle tingnu pan ma hwome zang angaile chix nye. Zang angaile hwom kongdile ngo; hwome ile ajang: “Kwome zangngai kople nyeüi ilaxle kwome chix langüi.”

³Ikoxle Samson a tsüdang kople lanlan ngotoxlaxle chat. Chix zo ilaxle chixe tingnu pan kahak kapox makhange—kahak, kapatja, ibu pangwüi afomle fuak laxle chixe ibu Hebron tingnu atale ngünkya kaxkho to dünle tox.

⁴Ifüima, Samson a Delilah le amünkya mixcha füi mongakün. She a Sorek haxsha ma ngokya mixcha changkya.

⁵Filistia nok wanghom hwom aga nguilaxle she ang thüi: “Nangepi atsing laxle Samson a ipongpongle büthüikya ma tsak-zongle changpuix ilaxle keme chix to chemle khale koplaxle chemchu thüi ang chithole chix chemle anaoüihex ija awanle kop-hu. Kwom pangwüie nang a khop ngunkhix hobün-büta pong koxüihex.”

⁶Ikhoma Delilah-e Samson ma atüi: “Chingchalaxle nange pi ku hama nang ipongpongle büthüikoxle tsakpuix awanle fahüi. Owawae nang khale kopse jangtsu thüiningle chixe ija chemle thoüi?”

⁷Samson-e lan: “Hwome ku to hapkong zu ohing anüt füi khale jangchang, ima ku a zangjang khünak ningle achangpaoüi.”

⁸Ikhoma Filistia wanghombue Delilah hato hapkong zu anüt ohing apüile kox, ilaxle she-e Samson to khakle kop.

⁹She ang mama nui tuita ma azwonle ngokya khünak züizüi tüikya; she akhong: “Samson! Filistia nokbu nguile!” Ikoxle wün füi thut pongma zi fünle pao pupule chixe zu ibu chem ang chilaxle afün awüt. Ikhoma hwome chix tsak-zong chem makhange koppuix ija awan ang chitho.

¹⁰Delilah-e Samson ang thüi: “Hulax, nange kaxfax akax üntoxle ku ang otsingtsing awan ang chitomle ku dyen ngole. Owawae nang chemle khale thomsehex ija bama huxsa zangwün ku hama chingchalaxle apuale fahüi.”

¹¹Chixe she ang thüi: “Tütuechu matwonkya zu hozün füi hwome ku to khale jangchang, ku a zangjang khünak ningle achang paoüi.”

¹²Ikhoma Delilah zu hozünbu apüi ilaxle chix to kha. Ifüima she akhong: “Samson! Filistia nokbu nguile!” Khünakbu a mama nui ma azwonle ngokya. Ikoxle chix chak angkya zubu a chixe zisa afünle awütkya lailaile afünle awüt.

¹³Delilah-e Samson ang thüi: “Otsingtsing chiapua homle nange ku dyenla ngole. Owawa nang chemle kople thomsehex ku hama wünhu.” Chixe she ang thüi: “Nange ku khülang anüt nyifüi takle jangchang, ilaxle ija lak füi müile mongle jangchang, ku a zangjang khünak ningle achang paoüi.”

¹⁴Ifüima Delilah-e chix a mikngüt müile jip ang tom, chix khang angkya khülang anüt lax, ilaxle ibu a nyi füi tak. She-e ija lak füi amongle kop ilaxle akhong: “Samson! Filistia nokbu nguingo le!” Ikoxlechu chix zole hüi ilaxle nyi khato amongle takle thomkya chix khobu bele alai.

¹⁵Ikhoma she-e chix ang thüi: “Nange ku to ojao chikün khato, ‘Kue nang to huanuma mongkünle’ le chemkha akax manpu? Nange ku othom azom ma jao ongat ang achangdaoa, ikoxle athax kople nang tsak-zong bama huxsa chem hex ija ku hama mawün.”

¹⁶She-e nyixfokya to chix ma chizakle ija bama atüile ngo. She-e ija kax chizakle atüi ngokyae chix ngwom jao ngwomle shu

¹⁷ikhoma oshukma chixe she hama otsingtsing apuale fa angkya lai. Chixe thüi: “Ku puxkya tokhange wüi kho a otuechu masex. Ku a Zang hanpak ang nazarait tuita changpu. Ibu ku kho sexle jangchang, ku angkya tsak-zong paole samüi ilaxle ku a zangjang khünak tuita ningle changüi.”

¹⁸Chemtue Delilah-e ija kax a otsingtomtata wüi changle le thütle laxpuix, she-e Filistia nok wanghombu hato kaxho apaole thüi: “Hünzom anaole tachat-hüi. Chixe ku hama kaxtsing tomtata akaxdaoa.” Hwom chat ilaxle hwom füi tomle hwome ngun chuwüi koplaxle ngui.

¹⁹Delilah-e Samson a she weho ma anale jip ang kox ilaxle khünak tuita se, ija mixsüne Samson khülang anüt sexle awüt . Ifüima she-e chix zothup, büthüikoxle athaxpi chix ma tsak-zong chitüi.

²⁰Ifüima she akhong: “Samson! Filistia nokbu hüile ngole!” Chix zo ilaxle thüt: “Owang pongkya ningle ku janzüi füi zoüi”, le chixe thüt. JOWANPAe chix danle toxdaokya chixe chitik.

²¹Filistia noke chix kop ilaxle mik lokle awüt. Hwome chix a Gaza to pao, khop janbüi füi hwome chix to kha, ilaxle chix ang kun kha tokhange saxthukya khato mwot mok ang tom.

²²Ile ngokya bama chix kho tamchatle lo ang süt.

²³Filistia nok wanghombu athüt ilaxle hwom baozang achongkya Dragon ang tö kox angkya kat-azua. Hwome tsai ngao: “Kem baozange kem ang kem zanpa Samson to lüt ang tomdaoa!”

²⁴Hwome hwom lualua to tüle pwonla dong, ilaxle hwome thüi: “Samson sehüi, ilaxle chixe kem anyit-ajaile naxchang!” Chemtue hwome kun khatokya Samson apüile changpuix, hwome chix ang hwom anyit-ajaile chang ang tom ilaxle chix a thongnu anyi obama ajong ang tsan. Chemtue khünaknue chix ngünle laxpuix, hwome hwom baozang ang münchong fakya tsai ile ngao: “Kem baozange kem ang kem zanpa to anao ang tomdaoa; chix a kem haxtok fün amakya mix tamchu kem khünak huanuma langle awütkya mix changkya!”

²⁶Samson-e chix syetle aham ngokya naosa ang akax: “Homnu to thuale thomkya thongnu to ku ang atwon hüi. Ibu ma ku atesele tsule.”

²⁷Ija homnu a khünaknu sheko hia lüka awangle tüikya. Filistia nok wanghom hwom aga pangwüi ima tüikya, ilaxle ija homkho to khünaknu sheko hia lüka hajat azom tukux jao tüikya. Ibu a Samson-e hwom anyit-ajai le ngokya to hule ngokyabu changkya.

²⁸Ipongma Samson-e zangjop: “Khüthak JOWANPA, chingchalaxle ku tamtexle atak-hüi, Zang, ilaxle athax noxtasa ku ang amipongkya janzüi tam süfahüi, tamfang ma kue ku mik anyi lokle awütkya Filistia nok to jannong alüi tho angkya hanpakma.”

²⁹Ikhoma Samson-e ija homnu nwonle thomkya thongnu anyi to chix chak füi atatle twon ilaxle asaole thwon.

³⁰Ilaxle chix akhong: “Ku a Filistia nokbu füi tomle zi ang tomfa!” Chix ma janzüi ibibi tüipule zongbakle thwom, ilaxle ija homkho a wanghom hwom aga tamchu ibibi khünaknu to shyeple tsunle nguak. Samson-e ija nyix chix füi tomle chix ozün ma tüipongma langkya to kaile lang.

³¹Chix hotüi-honao hwom tamchu chix haxnu-homsabu chix mang lax ang jule kop. Hwome chix mang dün ilaxle Zorah hia Eshtaol nyi bama tüikya hopa Manoah zukting ma akhün. Chix ang Israel nok lompa ang zanglao tsa ngole tox.