Read Wancho Naga Kaxfünpa-Hwom 17 Bible Online

Kaxfünpa-Hwom 17 - Wancho Naga bible

Kaxfünpa-Hwom 17

¹Hanpak tuita ma, Efraim nok to Mikah le amünkya mixsün tuita ngole tüikya.

²Chixe honu hama akaxle thüi: “Chemtue nang angkya khop ngunkhix hobün-büta owawae ahuxle paopongma, nange ija ahuxmix to thuakzomle changpu. Nange ile changkya kue atatlaxpu, ija ngun a ku ma tüile. Ija ahuxle paokya mix a ku changpu.” Chix honue thüi: “JOWANPAe nang to mohimanle naxchang, kusa!”

³Chixe ija ngun honu ang achatle kox, ilaxle she-e thüi: “Kue thuakzomle changdaokya kusa hato chingui angkya hanpakma, kue ija khop ngunkhix ku jaoe JOWANPA hanpak ang jople atsaopu. Ija a khope lile pün chapa tuita zing ang twonüi. Ikhoma athax kue ija khop jan ngunkhix nang ang wüi achatle koxpu.”

⁴Ifüima chixe ibu a honu chak to achatle kox. She-e ikha angkya khop ngunkhix ho-anyi koplaxle janjao mix ang kox. Ija mixsüne pün makhange chapa tuita zing, ija to khop füi chwople kox, ilaxle ija Mikah hom ma dan.

⁵Ija mixsün Mikah ang chix baozang shwomnui süile tüikya. Chixe chapabu zing hia ibu zomzing pongma lax angkya Suakwex-nyi zing ilaxle ikhama sasün tuita zompu-zangpa ang kamle dan.

⁶Ipongma Israel haxtok ma wanghom chitüikya; owae chemle ngose tsupuix ile ngole hüi.

⁷Ipongma Liwi sün tuita tüikya; chix a Judah angkya Bethlehem ma ngole tüikya.

⁸Chixe Bethlehem toxlaxle mamakha to ngwotnui kop. Ile chix ahamle ngopongma Efraim haxhua tokya Mikah hom to ngui.

⁹Mikah-e chix ma atüi: “Nang ojong tokya nguipuix?” Chixe lan: “Ku a Judah nok angkya Liwi sün changpu. Kue ngo angkya ngwotnui to hule aham ngopu.”

¹⁰Mikah-e thüi: “Ku füi ngolax. Nang a ku jali adangle fa angkya mix tamchu zompu-zangpa ang ngohüi, ilaxle kue zanglao to nang ang khop ngunkhix hopong koxüi, ija a nang nyi-za hia sütling hanpak ang changüi.”

¹¹Ija Liwi sün Mikah hom ma ngo ang mongtsu ilaxle sasün ningle achang.

¹²Mikah-e chix zompu-zangpa ang kam ilaxle chix a Mikah hama ngo.

¹³Mikah-e thüi: “Athaxpi ku ang tuita zompu-zangpa ang Liwi khünak tüidaoa, idaile ku hanpakma pangwüi JOWANPAe müile sax-mokle chang ang tomüile ongpu.”