Read Wancho Naga Kaxfünpa-Hwom 18 Bible Online

Kaxfünpa-Hwom 18 - Wancho Naga bible

Kaxfünpa-Hwom 18

¹Ipongma Israel nok haxtok ma wanghom a chitüikya. Ipongma Dan homjen a hwom tingtan nokzing angkya hanpakma haxtok lomle ngotan changkya chemthüikoxle Israel nok khama hwome athax kople hwom haxtok hexle chaxwan kople machang.

²Ikhoma Dan khünaknue hwom saxthom hia homjen khama man-ngünkya mixsün aga zün ilaxle Zorah hia Eshtaol tinglong tokyabu chaxwan to hu angkya hanpakma müile zünsai laxle tsanle apao. Chemtue hwom Efraim haxhua nok to nguipuix, hwom a Mikah hom ma zak.

³Hwome ikhato ngopongma, hwome Liwi sün chijing-chakja tsingle lax, ikhoma hwom chix hato nguilaxle atüi: “Nang ikhato chem mokle ngopu? Nang ikhato owae apüipu?”

⁴Chixe lan: “Kue Mikah füi tsaitsuak-kaxtsuak laxle ngopu. Chixe ku ang chix zom-zang zingle koxkya omün koxlaxle thompu.”

⁵Hwome chix füi akax: “Kwom mwot ma kwome tho-lünkya chitüi hia tüiüile Zang ma tsaitik-kaxshole changfa.”

⁶Ija nguapae lan: “Hünzom ang khosam ngo angkya ojao müntüi. JOWANPAe hünzom to humele tüile.”

⁷Ikhoma ibu mixsün aga Laish tinglong to ka ang laile pao. Ikhato khünaknu a Sidon nokbu ningle tüle ziakop. Hwom a tumüi ma tamchu mongsom ma ngokya, owa füichu atsi-alakya chitüile ngokya khünakbu; hwom ma laxsese pangnu oli tüile ngokyabu. Hwom a Sidon nok füi atsaile jao ngo ilaxle hwom a owa mixnok-mixza füichu tomsax-tommokkya olom jao chitüile ngo.

⁸Chemtue ibu mixsün aga Zorah hia Eshtaol to chatle changpuix, hwome chempangsa apongpuix ibu khünaknue hwom ma atüi.

⁹Hwome lan: “Nguihüi. Kemepi Laish nok to singhax. Kwome haxtok ngünle toxdaoa, ija haxtok a tüle müikya haxtok changle. Chemchu chimokle kem ito taxngohax; kangmomlax! Ikhato donghax ilaxle ikha kopdaohax!

¹⁰Chemtue hünzom ikhato nguiüihex, khünaknu a owatochu cha-ao-mongsakya chitüile ngünüi. Ija a chongkya haxtok tuita changle; khünak zongto laxli komle ikhama tüile ngole, ilaxle ikha a Zang-e hünzom ang koxdaoa.”

¹¹Ikhoma Dan nok ho-azok khünak Zorah hia Eshtaol tingnu angkya achex, ilaxle azan ang achwon.

¹²Hwom a donglaxle Judah angkya Kiriath Jearim zongma hannop chikao ma pom zaile athong. Ikhoma ija onui ang Dan Nok Pomting le nyakle.

¹³Hwom ikha angkya achexle ka ilaxle Efraim haxhuak nok tokya Mikah hom to ngui.

¹⁴Ifüima mixsün aga opang Laish haxtok akhople chaxwan zyet ang nguile toxkyabu hex, hwome hwom othom füi akaxle thüi: “Ija nok ma homkha tuita ma khope lilaxle pün füi zingkya chapa tüikya hünzome awancha? Ikhama mama chapabu tamchu Suakwex-nyi le tüile. Ija to keme chemle hwonkoxle müiüile hünzome ajangpu?”

¹⁵Ikhoma hwom a Mikah hom to ngui, Liwi sün tuita ikhama ngole tüikya, ilaxle ija mixsün ma chix chemle ngotongle hüipuix ija bama tsaitik-kaxshole chang.

¹⁶Ipongkhae 600 khünak Dan nok süpahibu, azan ang achwonle tüikyabu a zünkai ma ajongle tüikya.

¹⁷Ija zyetmix mixsün hwom aga a tangthole hommong to dong ilaxle khop-jan füi chwoplaxle tüikya pün makhange zingkya chapa tswonle alai; mama chapabu hia Suakwex-nyi chuwüi tswonle alai, ipongma nguapa a zünkai ma azan ang achwonle tüikya 600 khünak füi tomle tüikya.

¹⁸Chemtue khünakbu Mikah hom to noplaxle ibu otsao tuina laxle changpuix, nguapae hwom ma atüi: “Hünzome ija chem hwonpu?”

¹⁹Hwome lan: “Dangjale ngoün. Kaxfa tuita taxakax. Khaxa kwom füito paohax ilaxle kwom ang olom-osai apuale hia nguapa ang achangle ngohax. Kako tuita nguapa ang ngokya füi Israel homjen onok hanpakma nguapa ang ngose müntsulax hia?”

²⁰Ija kax atatlaxle nguapa ang mong huanuma müi, ikhoma ibu otsao tuinabu komkaile koplaxle chix a hwom füi tomüile azuixle pao.

²¹Nong-tsax to hulaxle hwom achex; hwom naosombu, tsom-pombu, ilaxle hwom tuina thochi ma shwomle lax.

²²Mikah-e chix tomzi khünakbu azan ang ahyen pongma hwom a müimamale le le bang. Hwome dan nok ha alop

²³ilaxle hwom nyakle akhong. Dan nokbue aküile hu ilaxle Mikah füi akax: “Chemtsai-chemkax? Ibibile khünaknu chemlom ang hüipu?”

²⁴Mikah-e lan: “Ija a chem kax? Ibu a chempang? Hünzome ku nguapa hia kue zingkya baozangbu komkaile laxlaxle hünzom oma ang achexpu?”

²⁵Dan noke lan: “Nang hanpakma nange kaxfa tuita chiakaxkya wüi amüikya ang changüi chichang thüiningle ibu khünaknu nang füi mongtsik dongüi ilaxle nang to single changüi. Nang ibomachu hünzom homkha pangwüi mik max angkya ataküi.”

²⁶Ifüima Dan nok thuithuile achex. Chix zongto ibu a huanu changpule chixe ngünle lax, ikhoma chix tok anong ilaxle hom to chat.

²⁷Mikah-e thomkya nguapa hia chixe zingkya tuina pangwüi Dan noke paole changkya füima, hwom nguilaxle Laish nok to sing; ija tinglong a mongsomjakya tinglong tuita changkya, ilaxle Bethrehob haxsha ma ngokya khünakbu a dangjakyabu changkya. Hwome ikhama ngokyabu hia tinglong zokle ashun. Hwom kho awa kop angkya owachu chitüi, chemthüikoxle Laish a Sidon nok tokhange müimamale atsai, ilaxle hwom a owa nok füichu tomsax-tommokle ngokya nok chichang. Dan nokbue ija tinglong tamchatle azünle zinglaxle hwom ikhama ngo.

²⁹Hwome ija Laish mün Dan le alüix, ija a Jakop sasün hwom putong hwom mün ma.

³⁰Dan noke hwome shwom ang chapa pomzai, ilaxle Jonathan, owa Gershom sasün tamchu Mosa susün changkya hex, chixe Dan nok hanpakma nguapa ningle zom-zang mwot mokle kox, ilaxle hwom khünakbu zanda ang kople paokya kople ibue ngua mwot mokle ngo.

³¹Mikah-e zingkya chapa a Shiloh ma Zang shwom Nyihom ajongle ngokya kople ikhama ma wüi ngo.