Read Wancho Naga Kaxfünpa-Hwom 19 Bible Online

Kaxfünpa-Hwom 19 - Wancho Naga bible

Kaxfünpa-Hwom 19

¹Ipongma Israel nok ma wanghom tüiüi thoto, Efraim nok haxhua tsailo nok to ngokya Liwi sün tuita tüikya. Chixe Judah angkya Bethlehem nok angkya danucha ang mixcha tuita lax.

²Ikoxle she ang chix füi huanuma mongtsik, ilaxle hopa hwom hom to Bethlehem to chat, ilaxle ikhato lyetjang ali jao ngo.

³Ifüima ija mixsün a she hato lomle ngui ilaxle hom towüi chat-haxle jox-nai angkya mong ma hüi. Chixe chix dapa tuita iboma mantsak anyi chix füi tomle laxle achex. Ija mixchae homkha ma ija Liwi sün ngünle lax, ilaxle hopae chix ngünle laxkya zuma, chixe ija mixsün a mongmüi pwonle le pongle kop.

⁴Ohopae chix ang nyixta anyi ngole tox ang atsangkya khoma chix nyix azom nüile tox. Sheko-lüka nyie tomle fongsax ilaxle hom ma jip-pomle chang.

⁵Nyix ali lükya nop swomsae kaile zolaxle hom to chat ang achwon. Ikoxlechu sheko hopae ija Liwi sün ang thüi: “Nuakbale tütali thüingaxchu saxle koplax. Athax zaxhun ma achexle ngolax.”

⁶Ikhoma hokhi pangnyi thung ilaxle tomle saxlingle chang. Ifüima sheko hopae chix ang thüi: “Ajechu hom ma wüi mongzom müile pomle toxdao.”

⁷Ija Liwi sün a hom to chat ang achex, ikoxlechu hohopae chix ngo angkya wüile atsang, ikhoma ija ja chuwüi hwom hom ma pomle tox.

⁸Nyix aga lükya nop swomsae wüi hom to chat ang lai, ikoxlechu hohopae thüi: “Tütali nuakba saxle koplax. Kat-tu nguile tomtata a shong-tanhüi.” Ikhoma hokhi pangnyie tomle saxlingle chang.

⁹Chemtue ija mixsün, chix danucha, tamchu hokhi dapa hwom chat ang laile changpongma, hohopae wüi thüi: “Hulax, athax hanhompu; hünzom a aja chuwüi nüile toxkox wüi müiüi. Hünzom to zangnake lopüi changle; ajachu haxmüi-zangmale hom ma wüi pomle shong-toxdao. Ngainop swomsae zolaxle achexle chatkoxmi.”

¹⁰Ikoxlechu ija mixsüne tamchatle ikhato pomhomle ngosele chitsu, ikhoma chix danucha laxlaxle hwom a hom to chat ang achex, hokhi füi tomle dapa hia mantsak anyi ma hünzing laxle tüikya. Hwome Jebu zuito nguipongma hansongle tix alop (ija a, Jerusalem), ikhoma chix dapae hopupa ang thüi: “Ajakya zangnak a kem ija Jebu nok tingnu ma pomle toxkox wüi müikoxlax?”

¹²Ikoxlechu hopupae thüi: “Israel nok chichangkya tingnu ma kem zakzuile ngo angkya münchang. Ikha kailaxle kem Gibeah chichangba Ramah ma pomle toxüi.”

¹⁴Ikhoma hwom a Jebu tingnu akaile chizakle le. Gibeah to hwom nguipongma zanghannu dütle changün, ija a Benjamin homjen haxsüt changkya.

¹⁵Hwom ija wün ikhato pomle tox ang khe. Hwom a tingnu to ngui ilaxle pangja ma thungle ngo, ikoxle hwom ang pom nui koxle owaechu pom-hom haxle chise.

¹⁶Hwom ikhato wüi ngole changpongma, zim to wünwangüi mixpa tuita hüi. Chix a Efraim haxhua nok tokya mixsün changkya, ikoxle athax chix a Gibeah ma ngole tüikya. (Mama khünakbu a pangwüi Benjamin homjen khünaknak wüi.)

¹⁷Ija azupae tingjang lomnu ma ngole tüikya mixnok wünpa ngünle lax ilaxle chix ma atüi: “Nang ojong tokya hex? Athax ochichi to leüihex?”

¹⁸Ija Liwi süne lan: “Kwom a Judah haxtok tokya Bethlehem to nguitoxpu, ilaxle athax kwom Efraim haxhua nok shonak-lingnu akaile hom to chatüi lombama tüile. Kwom pom-hom angkya hanpakma owaechu se-lomkya chitüile ngopu.

¹⁹Kwom ma mantsak hanpak ma osüt tamchu ku, ku danucha hia ku dapa kwom hanpakma wongkhop a kwom ma tüikya. Kwom hanpak kwom ma pangwüi tüihukya.”

²⁰Azupa-e thüi: “Hünzom a ku hom ma pomhax! Kue hünzom to müile humele changüi; hünzome tingjang lomnu to zangnak chemle akaiüi.”

²¹Ikhoma ija azupae hwom chix hom to laxlaxle pao ilaxle mantsak angchu osüt koxle tux. Ibu wünpa hwome cha-chakbu solaxle saxlingle chang.

²²Hwom ile nazak müile jiple ngopongkhae allele tinglong ma tüikya chinunchakkaile chichang-chizang mwotma mokle ngokya khünakbue ija hom akhople kop ilaxle kahak to hong. Hwome ija azupa ang thüi: “Nang füi tomle nguikya khünak kwom hato alaihüi! Kwome chix füi chinunchakkaisele tsule!”

²³Ikoxlechu ija azupa homtho to hwom hato lai ilaxle thüi: “Ile münchang, ku tüinao hom! Chingchalaxle iningkya chichang-chizang mwot sütaxmok! Ija khünak a ku wünpa changle.

²⁴Hulax! Ikhama chix danucha hia ku sa naocha nyi tüile. Kue hokhi athax ile hünzom hato alaifang, ilaxle hünzome hokhi lax ang tsuak. Hünzome chemle mokse tsupuix ile hokhi füi moklax. Ikoxlechu iningkya chichang-chizang mwot ija mixsün füi a taxmokünfa!”

²⁵Ikoxlechu khünak ibue ija azupa kax to ojao chiapa. Ikhoma ija Liwi süne chix danucha homtho to alaile hwom hato dantox. Ibue she to zang angaile shingnünle chang.

²⁶Swomsae ija mixcha nguilaxle ija azupa kafülom ma nguak. She kakopa a ikhama tüikya. She ikhama zangngai alople ngo.

²⁷Hokakopa ngainop ningle zolaxle ka dap, ilaxle chix homtho to laikya thoma chix danucha a kahak chito chak thüile ikhama homtho ma bang.

²⁸Chixe thüi: “Zolax, athaxpi achexhax.” Ikoxle kax to ojao chilan. Ikhoma chixe she a mantsak kho ma angat laxle hom to chat.

²⁹Chemtue chixe hom aloppuix, chix homkha to dong ilaxle bit lax. Chixe ma danucha mang lax, ija müithom bün-anyi ang achangle tsop, ilaxle Israel homjen bün anyi pangwüi hato müithom tuipong apao.

³⁰Ija angünngün noknusae thüi: “Kwome ija ningkya kax otuechu tüma atat! Israel noke Ijip haxtok danle toxkya füima ija ningkya oli tütue chu machangtox! Ija hanpakma keme tütali tümok angkya wüi changpu! Ija chemle ole moküi?”