Read Wancho Naga Kaxfünpa-Hwom 2 Bible Online

Kaxfünpa-Hwom 2 - Wancho Naga bible

Kaxfünpa-Hwom 2

¹JOWANPA kaxtaimix Gilgal makhange Bokim to nguilaxle Israel khünaknu ang thüi: “Kue hünzom Ijip nok tokya alaipu ilaxle hünzom pupa hwom füi tsaodaokya haxtok to apüipu. Kue thüipu, ‘Kue hünzom füi Tsaotsüt chemtuechu münama.

²Ija haxtok ma tüikya khünak owa füichu hünzome Longzale kaxfün chizingüi. Hünzome hwom baozang to shwomnui angkya tö-tsapbu ama angkya changle.’ Ikoxle kue hünzom füi akaxkya hünzome chemchu chimok. Hünzome ija füi opüipüi mix mok!

³Idaile athaxpi kue thüipu, hünzome chaxwan kople hüikoxlechu kue ibu khünakbu jwonle münapao. Hwom a hünzom zanpa ang ngoüi, ilaxle hünzom a hwom baozangbu to shwomkya tsün ma amanüi.”

⁴Chemtue kaxtaimixe ija kax akaxle koxpuix, Israel khünaknu pangwüi sop.

⁵Ikhoma ijongkha ang Bokim le nyak. Ikhama hwome JOWANPA ang tö kox.

⁶Jihusua-e Israel khünaknu hwom lom tole ang tom. Hwom pangwüi ma haxsütsüt to tingtak-haxzingle chang ang pao.

⁷Jihusua ozün ma ngokya kople Israel khünaknue JOWANPA thotha, ilaxle chix tokfüimachu, JOWANPAe Israel nok hanpakma mokkya pangwüi ngünle laxdaokya lompabu ozün ma ngokya kople hwome ile wüi JOWANPA thotha.

⁸Nun sasün Jihusua tuita JOWAN dapa zanglao 110 ngolaxle zi.

⁹Chix a ma haxtok, Gash Haxnu zongma shuakuxchi ma tüikya haxhua nok Efraim ma tüikya Timnath Serah ma akhün.

¹⁰Ija tsünthom pangwüi zile pao, ilaxle ofüi angkya tsünthome JOWANPA tamchu chixe Israel nok hanpakma mokkya ohünotün mwotbu pangwüi alakle asam.

¹¹Ifüima Israel khünaknue JOWANPA zongto ochax lyen ilaxle Bal baozangbu to shwom ang süt.

¹²Hwome, JOWANPA, hwom putong hwom Zang, Zang owae hwom Ijip nok chak tokya alaile apüipuix, chix alakle awüt, ilaxle hwom akhople tüikya tomzi nok baozangbu to shwom ang süt. Hwome ibu chitong to akhuxle shwom ilaxle JOWANPA ang mong ama.

¹³Hwome JOWANPA to shwomle ngokya zak laxle Bal hia Astarte hwom thothale chang.

¹⁴Ikhoma JOWANPA ang Israel nok füi tüle mongtsik ilaxle mix tsangtsele changkya nguilaxle hwom tsangtsele pao ang tom. Hwom akhople tüikya zanbue hwom towüi anao ang tom, ilaxle Israel nok ma lailai to alüile ma kho awa ang chithole chang.

¹⁵Hwom chemtukuxle zan to kapuix, JOWANPA a hwom zongto zan ang bang, chemthüikoxle ile chang angkya kaiwüi akaxle apua thomdaokya tüikoxle. Ikhoma hwom a tüle khosam ma ngo.

¹⁶Ifüima JOWANPAe Israel nok ang ibu tsangtsele changkyabu chak tokya hwom khose ang hwom ang lompabu kox.

¹⁷Ikoxle Israel noke hwom lompabu kax machu chilax. Israel nok kax machu chilax, Israel nok ma mongong chitüile chang ilaxle mixnok baozangbu to hwome shwom. Hwom hopa hwome JOWANPA kaxtom kax ma laxle tüihukya, ikoxle ija tsünzün thome ile changkya ochwonpai ma zakle max.

¹⁸Chemtue JOWANPAe Israel nok ang lompa tuita koxle changpuix, JOWANPAe chix to fong ilaxle chix ozün ma ngokya kople JOWANPAe hwom zanpabu chak tokya khosünle thom. Hwome sikngün hia zothup chak tokhange akhongle changkya khoma JOWANPAe hwom to chingcha angkya wüi lai.

¹⁹Ikoxlechu chemtue ija lompa zile paopuix, khünaknu a amikya mantong towüi chat ilaxle thochi tsünthom füi ngaxchu sütsexle hwom tüi. Hwome mixnok baozangbu to shwom tamchu ibu thothale chang, ilaxle ma ochax lom danle müntoxpule angam.

²⁰Ipongma Israel nok füi JOWANPA ang mongtsik ngai angkya lai ilaxle thüi: “Ija jatlibue, kue hwom pupabu ang thomlax-ole kaxtom koxkya Tsaotsüt amadaoa. Hwome ku kax ma laxle chitüikya khoma,

²¹Jihusua zipongma ija haxtok ma tüile ngokya mixnok jat-li tuita chu kue jwonle münapao.

²²Israel noke pupa hwom lailaile kax ma laxle ku lomtang ma chile hia leüihex, ija awanle lax angkya hanpakma kue hwom twonüi.”

²³Ikhoma JOWANPAe ibu zan-nok jat-libu ija haxtok ma wüi ngo ang tom; chixe Jihusua ang ibu to lüt ang chitom chichangba chix zifüi shemle chixe ibu jwonle chiapao.