Read Wancho Naga Kaxfünpa-Hwom 20 Bible Online

Kaxfünpa-Hwom 20 - Wancho Naga bible

Kaxfünpa-Hwom 20

¹Shuakuxchi ma Dan ilaxle shuathongchi ma Bersheba, ilaxle handünchi ma Gilid, ibibi wanmong ma tüikya Israel khünaknu noke ahyenkya to müile lan. Hwom pangwüi müitom tuita ang achangle JOWANPA ngwotnui Mizpah ma asox.

²Ija Zang khünaknu tusox ma Israel nok pangnu homjen tokya lompabu asox, ilaxle zankat naomüi hwom 400, 000 tüikya.

³Ipongma Benjamin khünakbue Israel khünak pangwüi hwom zan to ka ang Mizpah ma asoxle tüikya kax atat ang kop. Israel noke atüi: “Ija müt chemle kopkya hex kwom hama apuahüi?”

⁴Mik-maxkya danucha kakopa Liwi süne lan: “Ku danucha kukhi Benjamin angkya Gilid nok to wünpom angle nguipu.

⁵Gilid nok ku sing ang nguilaxle kukhi athongle ngokya hom akhople koppu. Hwome ku jao lang ang tungkya; ikoxle hwome ku danucha to zang angaile shingnünle chang üntoxle langle toxpu.

⁶Kue she mang apüilaxle tsoppu, ilaxle Israel nok homjen foto müithom tuipong afanpu. Hwome, kemjat kemli khama wanlom ma chitüikya chichang-chizangkya mwot mokdaoa.

⁷Hünzom ikhama tüipupu pangwüi Israel nok changpu. Keme ija ningkya to chemle hwonkoxle müiüi?”

⁸Khünaknu pangnu ajong laxle thüi: “Kem, Nyihom ma ngokya mix wüi changlax, hom ma ngokya mix wüi changlax, kem opupuchu mahom-hom to chat angkya münchang.

⁹Keme ile moküi: Keme chizing tswonlaxle ibu ang Gibeah nok tingtakle chang ang tomüi.

¹⁰Israel nok thombün kha angkya thom tuitae süpahibu ang süt apongüi, ilaxle mamabu a paolaxle, Israel noktu ma hwome iningkya nushix dongkya oma mwot mokdaokya khoma Gibeah nok to zothupüi.”

¹¹Ikhoma Israel angkya khünaknu mongtex tuita—ija tinglong tingtakle chang angkya.

¹²Israel homjenbue Benjamin homjen haxsüt pangnukha towüi: “Hünzome ija mütkop mwot mokkya ija a chem?

¹³Athax hünzome Gibeah nok angkya ibu laothuabu alaile kwom chak to danhüi. Israel tu angkya iningkya ochax mwot atsai ang tom angkya hanpakma hwom a mik max ang tom angkya wüi changpu.” Ikoxlechu mamabue Israel noke wünkya zangwün to Benjamin khünakbue ojao na chitha.

¹⁴Benjamin tingnu pangnukha tokya wüi khünaknu Israel nok füi azan ang Gibeah ma asox.

¹⁵Ija nyix hwome hwom tingnu tokya süpahibu 26, 000 sele asox. Ija tok to Gibeah noke ataxle süile thomkya khünakbu 700 alai; ibu a nongmokmok wüi changkya. Hwom pangwüie, khomunpa to ngaxchu asüt ang tsuakle, longtom tuita chithaile, nünle-nünle longdao mankyabu changkya.

¹⁶

¹⁷Mama Israel noke zanhok tsuakle changdaokya süpahibu 400, 000 khünak asox.

¹⁸Israel nokbu Zangshwomnui Bethel to ka, ilaxle hwome ikhato Zang füi tsaitik-kaxsho: “Opupu homjene Benjamin homjen to thoma single changüihex?” JOWANPAe lan: “Judah homjene thoma singkox.”

¹⁹Ikhoma ofüinop Israel nok achexle zan to ka, ilaxle Gibeah tingnu zui ma pom zaile athong.

²⁰Hwom Benjamin nok süpahibu to sing ang pao, ilaxle süpahibue tingnu chito hule ziakop ang dan.

²¹Benjamin nok süpahibu tingnu angkya laile hüi, ilaxle zanghan dütüi thoto wüi hwome Israel nok süpahibu 22, 000 khünak langle tsuak.

²²Ifüima Israel nok zangshwomnui to paolaxle zanganakle zangjople ibu mangsop. Hwome chix ma atüi: “Kwom tamchatle kwom tüinao Benjamin hwom zan to chika kaüi?” JOWANPAe lan: “Kakox.” Ijae Israel nok süpahibu ang mong achen ilaxle othonyix kople changkya kha ziakop ang ibu dan.

²³

²⁴Hwom othom anyi lükya Benjamin homjen füi azan ang ka.

²⁵Ilaxle othom anyi lükya ma chuwüi Benjamin nok süpahibu Gibeah angkya laile hüi, izuma hwome Israel nok süpahi zanhok naomüibu hwom 18, 000 khünak langle tsuak.

²⁶Ifüima Israel khünaknu pangwüi Bethel to ka ilaxle ikhato mangsop. Hwom ikhato JOWANPA tunthoma ngo ilaxle hansong alople hwome sax-lingle chichang. Hwome JOWANPA ngwotnui ma notom-tusüi tö hia otom ma lanle zokle ashunkya töbu kox.

²⁷Ipongwane Zang füikya Tsaotsüt suak a Bethel ma tüikya, ilaxle Arun hosu tamchu Eliazar sasün Finehas ikhato zom-zang mwot to hule tüikya. Khünake JOWANPA ma atüi: “Kwom tüi-hi-nao Benjamin hwom füi azan ang kwom kaüi hia okat zaküi?” JOWANPAe lan: “Azankox. Ngainyix a kue hünzom ang hwom to lüt ang tomüi.”

²⁸

²⁹Ikhoma Israel nok süpahibu hidaole Gibeah nok akhople azwonle ziakop ngo ang tom.

³⁰Ifüima chizakle nyix-azom lükya to chuwüi hwom a Benjamin nok füi azan ang ka ilaxle hwom süpahibu azan angkya onui ma othothoma changkya ningle Gibeah nok chito thale ziakop ang dan.

³¹Benjamin nok tingnu angkya azan ang laile hüi ilaxle hwom a tingmong angkya kotho to abele pao. Otho pongkya ningle hwome Bethel hia Gibeah lomnu kotho to Israel nok süpahibu züizüi lang ang süt. Hwome Israel nok 30 tukux lang.

³²Benjamin noke thüi: “Othopongkya lailaile anyix chuwüi keme hwom to anaodaoa.” Ikoxle Israel noke tokfüichi makhange single changüima, tingnu mong angkya hwom kotho lomnu to alai ang atsing wüi changkya.

³³Ikhoma chemtue Israel nok süpahi süchong tukux chatlaxle tamchatle Baltamar ma asüile changpuix, ipongma Gibeah tingnu akhople longkunbu nuk to azwonle ngokyabu allele laile hüi.

³⁴10, 000 khünaknu, Israel onok kha angkya amüimüi süile laxkya thome Gibeah tingtak, ilaxle tüle ziamale jao azan. Benjamin noke hwom a amüt ang tu nguidaoale chitsing.

³⁵JOWANPAe Israel nok ang Benjamin nok to lüt ang tom. Ija nyix Israel noke hwom zanpabu 25, 100 khünak langle tsuak,

³⁶ilaxle tix Benjamin noke hwom a maxkya changle awanle lax. Israel nok süpahi othom achongkya Benjamin nok thoto zikle pao, chemthüikoxle hwome Gibeah nok akhople hwom süpahibu danle thomdaokya to mongong laxle hwome ile hwon.

³⁷Khünak ibu Gibeah chito momle zik; hwom a tingnu mongto donglaxle fiksele chiak ilaxle ima atüitüi komkaile lang.

³⁸Israel nok süpahi othom alüikya hia azwonle ngokyabu bama huxsa mowan tüzing. Chemtue hwom ija tingnu makhange ding to wünkhut chongle dongkya ngünüihex,

³⁹zan tuntho to tüikya Israel nok süpahibu aküile chatüi. Ipongma Benjamin noke Israel nok 30 to nüile langdaokya. Hwome alüile hwom füi akax: “Changle othopongkya lailaile anyixchu hwom to keme wüi lütdaoa.”

⁴⁰Ifüi shemle mowan lai; tinglong makhange ding to tüle chongle wünkhut dong ang süt. Benjamin nokbue aküile hukoxle hwom tingnu a wünkha to shunüi ngünlelax, ilaxle hwom a abütle jepa.

⁴¹Ipongma Israel nok aküile chat, ilaxle Benjamin nok chabüt-lasünle chang ang tom chemthüikoxle hwom a athaxpi maxpu le hwome tikle hüi.

⁴²Hwom a Israel nok thoto paole kotho to zik, ikoxlechu hwom a paole azang ang chitho. Hwom a süpahi othomnu hia tingtak tsuaklaxle tingnu angkya laile tüikya süpahibu othom anyi obama akhople kop, ilaxle hwom amüt.

⁴³Israel khünakbue hwom zanbu tsünle atsing, ilaxle ojao nazak chitüile Gibeah nok handünchi alople, hwome ibu ma mongtextex ma lang. Zansing-zansingle achua.

⁴⁴Ataxle müile le ngokya 18, 000 Benjamin nok süpahibu ang komkaile lang.

⁴⁵Mamabu a anongle chat ang Rimon Longnu ha alop ang kothofa to zikle pao. Hwom 5000 khünak a lombaba ma wüi langle tsuak. Israel noke chizakle achuale mamabu Gidom alop ilaxle 2000 lang.

⁴⁶25000 tüikya kha angkya Benjamin homjen khünaknu a mongchongkya süpahibu changkya.

⁴⁷Ikoxlechu 600 süpahibu a Rimon Longnu ha alople jao paole azang ang tho, ilaxle ibu a ikhato lyetjang anüt jao azwonle nui.

⁴⁸Israel khünakbu mama Benjamin nokbu achuale chat ilaxle hwom pangwüi langle awüt. Hwom sheko-lüka, mixnu-naosa, ilaxle tsom-pom chemchu chisüi. Ija wankam angkya tinglong hwome bakle zokle ashunle tox.