Read Wancho Naga Kaxfünpa-Hwom 21 Bible Online

Kaxfünpa-Hwom 21 - Wancho Naga bible

Kaxfünpa-Hwom 21

¹Israel khünaknu Mizpah ma asoxle changkya zuma, hwome JOWANPA füi tsaotsütle thüi: “Kwom owaechu Benjamin homjen ang kwom su-sa hwom lax ang müntomüi.”

²Ikhoma athax Israel khünaknu Bethel to paolaxle Zang ngwotnui ma hwom han-ahomle thung ilaxle ile akhongle hwome mang sople thüi:

³“JOWANPA, Israel nok Zang, ija chemkhoma ile chang ang tompu? Israel jat-li kha angkya Benjamin homjen büthüikoxle max ang tompu?”

⁴Ngainop ningle swomsae hwome ikhama tö-tsap tuita zing ilaxle notom-tumüi tö koxle chang, ilaxle to ozüita a komkaile zokle ashun.

⁵Hwome atüi: “Mizpah ma Israel khünaknu pangnu, JOWANPA ngwotnui ma süipongma, Israel nok khama owawa othom chiwomkya mix tüidaocha?” (Hwome Mizpah to chipaokya khünak mik amüt angkya hex-ole tsaotsüt.)

⁶Israel khünaknue hwomtüi-hwomnao Benjamin homjen hanpakma mongto kak ilaxle thüi: “Anyix keme kemjat kemli khama homjen tuita amütdaoa.

⁷Benjamin noke danle toxkya hwom kakonubu hanpakma keme chemle hwonkya li? Keme hwom ang kemsu-kemsabu tuiju-nasomle chang ang münfapox-ole tsao nang tsütdao.”

⁸Mizpah tusox ma chiwomkya Israel jat-li khama othom tütapu tüile ngoladaichale atüikoxle Gilid angkya Jabesh nok makhange tuita ngaxchu chiwomkya hwome lomle atak;

⁹süpahibu mün nyakle changpongma Jabesh nok angkya khünak tamchu chitsa.

¹⁰Ikhoma hwom tusox mün ma 12000 mongchongkya khünaknak zünlaxle ija kaxtom füi apao: “Jabesh angkya khünak, mixnu-naosa chisüile bakle langtoxdao.

¹¹Lükaka komkaile le langtoxdao ilaxle shekobu chu naocha chichangkyakya komle langdao.”

¹²Jabesh nok khama hwome naochabu 400 khünak atak, ibu Kanan haxtok ma tüikya Shiloh angkya hwom pom to apüi.

¹³Ifüima hwome Rimon Longnu nuk to tüikya Benjamin nok hato zan zak angkya kaxho kox.

¹⁴Benjamin nok chatle chat, ilaxle mama Israel nokbue Jabesh nok angkya ozün ma kople tüikya naochabu hwom ang kox. Ikoxle hwom pangnusa afikle chichang.

¹⁵Khünaknue Benjamin homjen hanpakma mongto kakzuakle süt chemthüikoxle JOWANPAe Israel nok notom tu afan ang tomdaoa.

¹⁶Ikhoma ikhama asoxle tüikya lompabue thüi: “Benjamin homjen ma sheko alüile müntüi. Chiafikle ota tüikyabue ma sheko ang lax angkya hanpakma keme chemle hwonüidai?

¹⁷Israel noke kem ang majat mali homjen 12 tüikya amüt-asam angkya oli münchang. Keme Benjamin homjen ozün ma thom angkya hanpakma keme tütali olom ahole fakoxtix müi angkya oli changpu,

¹⁸ikoxlechu keme kemsu-kemsa hwom lax ang müntomüi, chemthüikoxle kem kha angkya owawae masu masa Benjamin nok ang koxle jangchang ija a chongkya osax-osao ang achangüihex-ole keme thuakzomle changdaoa.”

¹⁹Ifüima hwome ajangle lax: “Zanglao to ziakya JOWANPA pangpwon Shiloh ma sax angkya chwonle wüi hüile ngole.” (Shiloh a Bethel zongma shuakux ilaxle Libonah zongma shuathong, Bethel hia Shekem nyi ba angkya lomnu zongma handünchi ma tüikya.)

²⁰Hwome Benjamin nok ang thüi: “Grep haxtok to pao üntoxle ikhato azwonle ngolax,

²¹ilaxle hungale ngolax. Chemtue pangpwon tukma Shiloh angkya naochabu azüi ang laile paoüihex, hünzom a grep haxtok tokya laile hüilax. Hünzome ma mongtextex to shingle ma shekoko ang lax ang naochabu koplax ilaxle ibu a hünzome ma Benjamin haxtok to kople chatlax.

²²Ibu hopa hia hotüi hwom nang hato nguile, ilaxle abaxle jangchang münfapule jangtsak, ibu füi akax ang tsuak, ‘Chingchalaxle hwom kwome wüi thom ang koxhüi, chemthüikoxle kwome hwom a kwom kakobu ang lax ang hünzom chak tokya zanhok ma koplaxle paole laxkya chichang. Hwom a hünzome kwom ang koxkya chichang koxle, hünzom chuwüi hünzome tsaotsütkya bama thaikya müntüi.’”

²³Benjamin noke ija ile mok; Shiloh ma azüile ngokya naochabu kha angkya hwome mixhuak afikle naocha tuipong ma kako ang lax ang tswonle pao. Ifüima hwom ma haxtok to chat, hwome ma tinglongbu azünle zingle amüi, ilaxle ikhato ngo.

²⁴Ipongkhae mama Israel nokbu ikha dantoxlaxle ma homjenjen to mahax-mahom hia ma tuinabu atüile chat.

²⁵Ipongma Israel nok ma wanghom matüikya. Noknusa wüi mae chemle moksaxle ngose tsupuix ile ngole hüi.