Read Wancho Naga Kaxfünpa-Hwom 3 Bible Online

Kaxfünpa-Hwom 3 - Wancho Naga bible

Kaxfünpa-Hwom 3

¹Ikhoma Kanan haxtok ma ochax-ozan ma chiwomkya züizüi jat-libu, Israel nok thwonlop angkya hanpakmale JOWANPAe danle tox.

²Israel nok, tamnüile chu ojao zan to kale mawankya tsünthombu hanpakma achax-azankya olom anwot-anole fakya olom tuita ang naxchangle tsünthom pangnu hanpak ang chixe ile mok.

³Ija haxtok ma danle toxkyabu a Bal Haxnu Harmon makhange Hamath Lomnu alople Lebanon Haxnu ma ngole tüikya Filistia tingnu aga, Kanan nok pangwüi, Sidon nokbu, ilaxle Hip nok, ibibi.

⁴Hwom putong Mosa makhange hwom ang koxkya JOWANPA kaxtombu kax ma laxle chitüi hia tüi angkya bama, ibu a Israel nok thwontsing angkya hanpak ang ngoüi.

⁵Ikhoma Israel nok a Kanan nok, Hit nok, Amor nok, Peri nok, Hip nok, ilaxle Jebu nok, ibu füi tomwüi tingtan nokzingle ngole hüi.

⁶Hwome ibu nok füi atu-amaile chang tamchu hwome shwomkya baozangbu to shwom.

⁷Israel noke JOWANPA, hwom Zang alakle awüt; hwome chix zongto ochax lyen ilaxle Bal hia Asherah chapabu to shwom.

⁸Ikhoma JOWANPA ang Israel nok füi mongtsik ilaxle Mesopotamia nok wanghom, wanghompa Kushan Rishathaim-e hwom tingtak ang tom, ilaxle chixe zanglao 80 hanpakma hwom to apün-ada.

⁹Ifüima Israel noke JOWANPA nyakle akhong, ilaxle chixe khünak tuita ngai ang tom ilaxle hwom khosünle kop. Ija mixsün a Othniel, Kaleb honao Kenaz sasün changkya.

¹⁰JOWANPA chasa chix ma ngui, ilaxle chix Israel nok lompa ang achang. Othniel zan to ka, ilaxle chix ang Mesopotamia wanghom to lüt ang tom.

¹¹Ifüima zanglao 40 chaxwannu tumüi-lomkhaole ngolaxle Othniel zi.

¹²Israel khünaknue tamchatle chuwüi JOWANPA tunthoma ochax lyen. Ikhoma JOWANPAe Israel nok füi Moab nok wanghom Eglon wüi sütsak-süzongkya ang achang.

¹³Eglon a Amon nok hia Amalek nok füi athüt; hwome Israel nok to lüt ilaxle pam pün tingnu Jeriko hwome wüi kop.

¹⁴Eglon pangnu zanda ang Israel nok zanglao 18 ngole hüi.

¹⁵Ifüima Israel noke JOWANPA hato akhong, ilaxle chixe hwom dan angkya hanpakma khünak tuita angai. Ija mixsün a Ehud, tuita nongmok mixsün changkya. Chix a Benjamin homjen angkya Gera sasün changkya. Israel khünaknue Ehud a Moab nok wanghompa Eglon hato hingho-chakzun füi apao.

¹⁶Ehud, chix jaoe sokta lokya, pangnyichi anaxkya changlo tuita zingle kop. Chixe ija changlo nyi fang to tsaxchi sam ma pyenle kop.

¹⁷Ifüima chixe wanghompa Eglon ang hingho-chakzun apüile kox. Wanghompa Eglon a tüle nutkya khünak tuita.

¹⁸Chemtue Ehud-e chix ma hingho chakzunbu koxle hüipuix, chixe ibu hünle apüikya khünakbu ang ma hom to chat angkya kax kox.

¹⁹Ikoxle Ehud-e Gilgal zui angkya long chapa zui makhange chat, ilaxle Eglon hato nguilaxle thüi: “Wanghompa, nang hanpak ma huxsa kaxho tuita tüile.” Ikhoma wanghompa-e chix dabu ang thüi: “Kukhi tata kaxkax ang tamshan hüi!” Ikhoma hwom pangwüi laile pao.

²⁰Ilaxle wanghompa kongkokole homkho tokya chix nui ma chix tata thungle ngopongma, Ehud chix hato soxle hüilaxle thüi: “Ku ma nang hanpakma Zang tokhange kaxho tuita tüile.” Wanghompa ajong.

²¹Chix nongchi chak füi tsaxchi sam angkya changlo syetle alai ilaxle ija wanghompa wok ma tople anop.

²²Changlo pangwüi, okua to apüile dong ilaxle ija to zaoe chwop. Ehud-e wanghompa wok angkya changlo syetle chialai, ilaxle ija changlo a tokchi to apatle laile chix chaba ma myen.

²³Ifüima Ehud laile pao. Chix tokfüi ma kahakbu ajale tox.

²⁴Dabu hüilaxle hukoxle kahakbu a ajale bang, ikoxle hwome wanghompa a hommong to nazakle shuile ngotüi angpule thüt.

²⁵Ef kople tankoxle asuüile hwome thütkya wa kople hwome tan, ikoxlechu chix ka ojao chidaple changkya zuma, hwome kapat lingsa laxlaxle ija dap. Hwom thoma wanghompa a zile dangjale haxkha to nguakle bang.

²⁶Hwome tanle ngopongma wüi Ehud a paole azangün. Chix a long chapa akaile paole Seirah to paole azang.

²⁷Chemtue chix haxhua nok Efraim to nguipuix, chixe zan to ka angkya ahyenle Israel nok nyak ang nyazong müt; ifüima chixe ibu zunlaxle hwom haxkho tokya ju.

²⁸Chixe thüi: “Ku füifüile hüihüi! JOWANPA hünzom ang Moab nok zan to lüt ang tomdaoa.” Idaile hwome Ehud mantole ju ilaxle Moab noke Jordan tale le angkya onui ziakop; hwome mixhuak tuita ngaxchu tale le ang chitom.

²⁹Ija nyix hwome Moab nok mixtsak naomüimüi hajat 10 tukux lang; hwome owachu paole azang ang chikox.

³⁰Ija nyix Israel noke Moab nok to lüt, ifüima hwom chaxwan ma zanglao 80 tumüi-lomkhaole ngo.

³¹Ifüi angkya lompa a Anath sasün Shamgar changkya. Chixe chuwüi, maihupong kaxza füi Filistia nok 600 khünak langlaxle Israel nok khosün.