Read Wancho Naga Kaxfünpa-Hwom 4 Bible Online

Kaxfünpa-Hwom 4 - Wancho Naga bible

Kaxfünpa-Hwom 4

¹Ehud zile paokya füima, Israel khünaknue tamchatle chuwüi JOWANPA zongto ochax lyen.

²Ikhoma JOWANPAe Hazor tingnu makhange apün-awangle ngokya Kanan nok wanghompa Jabin ang hwom tingtakle kop ang tom. Chix süpahi khama lompa a Sisera changkya. Chix a püntüi nok Harosheth tingsho ma ngokya mix changkya.

³Jabin ang man-kanlin jan füi zingkya 900 tüikya, ilaxle chixe Israel khünaknu thakma shixle tamchu changnong-pümthomle zangtsa apün. Ifüima Israel khünaknue hwom to asun angkya hanpakma JOWANPA to nyakle sop.

⁴Ipongma Deborah, Lappidoth kakonu a tuita ajenu changkya, ilaxle she-e ipongma Israel nok ma kaxfün fakya mwot mokle tüikya.

⁵Efraim haxhua nok to Ramah hia Bethel nyi zo ma tuita pam püntong ma she thungle ngozaikya, ilaxle tsaifün-kaxwünle chang ang Israel khünaknu ikhato ngui.

⁶Nyixta she-e Neptali ma tüikya Kadesh ting makhange Abinoam sasün Barak se ang apaole chix ang thüi: “JOWANPA Israel nok Zang-e nang ang ija kaxtom fale, ‘Neptali hia Zebulun angkya 10, 000 khünak laxlax toxlax ilaxle hwom Tabor Haxnu to apüikox.

⁷Kue ikhato hünzom füi azan ang Jabin süpahi khama lompa Sisera Kishon shuanu to apüiüi. Chix ma manbu hia man-kanlinbu tüihuüi ikoxlechu kue hünzom ang chix to lüt angkya zong koxdaoa.’”

⁸Ijama Barak-e lan: “Ku füi nang jangkaba ku kaüi, ikoxle ku füi nang chikale jangchang ku chu münkango.”

⁹She-e lan: “Müiüi, ku nang füi kaüi, ikoxle nange zan to lütkya bama münchong nang ang chemchu müntüiüi, chemthüikoxle JOWANPAe Sisera a shekonu chak to danüi.” Ikhoma Deborah a Barak füi tomle Kadesh alop ang lai.

¹⁰Barak-e Zebulun hia Neptali khünakbu Kadesh ma sele asox, ilaxle 10, 000 khünaknu chix füito azüi. Deborah chix füito ka.

¹¹Ile changpongma Ken nok Hebar-e Zananim ma tüikya Ok pünnu zui ma Kadesh hato soxle jao chix nyihom zaile alai. Chix a Mosa hotüichong Hobab su-sabu mama Ken nok khatokya paole hüikya changle.

¹²Chemtue Sisera-e Barak a Tabor Haxnu to dongdaoale awanle lax,

¹³chixe chix ma tüikya 900 man-kanlin jan füi zingkya pangwüi ilaxle chix khünaknu sele asox, ilaxle hwom a Püntüi tingsho Harosheth angkya Kishon Shuanu to tsanle apao.

¹⁴Ifüima Deborah-e Barak ang thüi: “Paolax! JOWANPAe nang lom azuile tüile! Anyix chixe nang ang Sisera to lüt ang tomdaoa.” Ikhoma Tabor Haxnu tokya Barak chix khünak hajat 10 koplaxle haxchithong to thai.

¹⁵Chemtue Barak-e chix süpahibu füi hwom to single changpuix, JOWANPAe Sisera a chix man-kanlinbu hia chix khünaknu füi tomle khopi-napale sam ang tom. Sisera chix man-kanlin angkya thailaxle cha ma pao ang süt.

¹⁶Barak-e ibu man-kanlinbu hia Hagoim angkya Haresheth süpahibu, püntüi tingsho chito achuale apao, ilaxle Sisera süpahibu pangwüi lang. Tuita ngaxchu chilang homle danle chitox.

¹⁷Sisera a Jael nyihom to paole azang. Jael a Ken nok Hebar kakonu changkya. Hazor nok wanghompa Jabin a Hebar hwom homkha füi tumüile tüikoxle Sisera a ikhato paole azang.

¹⁸Jael a Sisera füi apong ang zikle lai ilaxle thüi: “Alixachong, oman, ku nyihom to nguilax. Nang taxza.” Ikhoma chix hommong to dong ilaxle she-e chix a tuknyi nuakfüi to tukle pyenle thom.

¹⁹Chixe she ang thüi: “Ku ang ti tüle alankya changa, lingti sülaxhüi.” She-e tsomti füikya müikhwon nyitsong dap, ilaxle chix ang aling. Ifüimachu chix a pyenle wüi thom.

²⁰Ipongma chixe she ang thüi: “Nyihom fülom ma ajongkox, ilaxle owawa hüilaxle, ikhato owawa tüichale jangatüiba, müntüile lanlax.”

²¹Sisera tüle nale max ikhoma chix mikngüt müile jip. Ifüima Jael-e jantu hia nyihom lak koplaxle chix hato ahuxle dong, ilaxle kaochi namya makhange ija lak takle kaochi to afatle alaile hax to anople lang.

²²Chemtue Sisera lomle Barak nguipuix, Jael chix füi apong ang zikle lai ilaxle thüi: “Ikhato hüilax! Nange lomle ngokya mixsün kue nang hama ahofang.” Idaile chix she füito azüile nop, ithoma Sisera hax ma, nyihom lak füi khang ma adangle takle langle bang.

²³Ija nyix JOWANPAe Israel nok ang Kanan wanghom Jabin to lüt ang tom.

²⁴Hwome chix olithule ma-amüt ma-amütle süzongzong le sing.