Read Wancho Naga Kaxfünpa-Hwom 5 Bible Online

Kaxfünpa-Hwom 5 - Wancho Naga bible

Kaxfünpa-Hwom 5

¹Ija nyix Deborah hia Abinoam sasün Barak hokhie ija tsai ngao:

²JOWANPA achuak kox! Israel khünaknu a zan to ka ang mongtsu; khünaknu mongtsutsule zan to ka ang lai.

³Apakoplax, Wanghom-wanghombue! Künkox-mongkoxlax, hünzom apün-adakyabue! JOWANPA Israel nok Zang achuakle kue thuaput waxmai mütle tsaingaoüi.

⁴JOWANPA, chemtue nange Seir haxhuabu dantoxpuix, chemtue nang Edom haxsüt tokya laile changpuix, chaxwan alox, ilaxle ding tokhange zangwat-ti düt. Changle, zangfwombu makhange ti thokle adüt.

⁵Sinai JOWANPA tunthoma haxhuabu kangle pao, JOWANPA, Israel nok Zang tunthoma.

⁶Anath sasün Shamgar tsün ma, Jael din ma, chaxwan tok makhange athaxpi müizyem tam chile, ilaxle wünwan mixbu tsiaklomchi tokhange le.

⁷Israel nok tinglongbu zingzazui le ajong, Deborah; nang nguikya kople ibu ahuasakle ajong, honu tuita ningle Israel nok hato mangui tanto.

⁸Ifüima chaxwan ma zan lai Israel noke baozangbu hozünzün zünle kopkya zuma. Hajat 40 kha angkya Israel khünak tuitae ngaxchu di hia pax kop-hexcha?

⁹Ku künmong a Israel nok lompa füi towüi, mongtsutsule azan ang laikya khünaknu füia. JOWANPA achuak kox!

¹⁰Apukkox ija a, hünzom athokya mantsakbu khoma ngakyabue, kuatün-nui ma thungle tüikyabue, ilaxle hünzom paosese to aham angkyabue.

¹¹Apakoplax! Tüküi akhople khünaknu mwopkya ozinge JOWANPAe lütkyabu bama wün-ngole, Israel noke zan to anaokya mo a! Ifüima JOWANPA khünaknubu hwom tingnubu tokhange achuale ju.

¹²Lomzunkox, Deborah, lomzunkox! Lomzunkox! Tsai tuita ngaokox! Lomzunkox! Thochi to le-kox, Abinoam sasün Barak, nange zandabu koplaxle paokox!

¹³Ifüima mongongle tüikyabu hwom lompabu hato ju; JOWANPA khünaknu chix hato ngui azan ang achwonle.

¹⁴Efraim tokya haxsha to hwom ngui Benjamin homjen hia hwom khünaknu nuakfüima. Lompabu a Makir tokhange ju, alixachongbu a Zebulun tokhange.

¹⁵Isakar angkya lompabu a Deborah füi tomle ngui; changle, Isakar ngui üntoxle Barak chuwüi ngui, ilaxle hwome haxsha to ngui ang chix manto. Ikoxle Reuben homjen a ahak-ahan; hwone ngui angkya bama mongzangwünle chitsuak.

¹⁶Hwom a füito chun füi büthüikoxle nui? Chunnyetmixbue chunbu nyakkya zing apa ang ngopia? Changlea, Reuben homjen a ahak-ahan; hüi angkya hanpakma hwome mongzangwünle chitsuak.

¹⁷Gad homjen a Jordan tachi towüi ngohom, ilaxle Dan homjen khua zui ma zakle ngo. Ashar homjen a tinu kax to ngole hom.

¹⁸Ikoxlechu Zebulun hia Neptali khünaknu a ma tsün koxle chax-hi-zan pongma ajong.

¹⁹Megido shuasa zui Tanak ma, wanghombu nguilaxle azan; Kanan nok wanghombu azan, ikoxlechu hwome khopbu chipao.

²⁰Lyettsibue zangkho tokhange azan; zangding akaile hwom le le ngopongma, hwome Sisera füi alünle azan.

²¹Kishon angkya tichene hwom chwotle pao: Ipong zongle zikle kaüi Kishon tinue. Kue achuaüi, achuale leüi, janzüi füia!

²²Ifüima manbu tsik-tsokle fütle ngui, hwom chisokbu füi hax to nakle tingle.

²³“Meroz to thuakzom kox,”, le akax JOWANPA kaxtaimixe, “thuakzom, thuakzom ikhato angongo to. Hwom JOWANPA to asun ang chingui, chix hanpakma azan ang tuita süpahi ningle chihüi.”

²⁴Pangnu füi shomüi cha a Jael changle, Ken nok Hebar kakonu a: Nyihombu ma ngokya khama shomüi chanu a.

²⁵Sisera-e she ma ti ju, ikoxle she-e chix ang tsomti kox; she-e chix hato müikya khupsa ma tsomti ozao apüi.

²⁶Kaochi chak ma she-e nyihom lak kop, ata chak ma mwotmixbu jantu; she-e Sisera to hong ilaxle chix khangza ashix; she-e chix to khang apatle tak.

²⁷Chix a chikux thongle nguakle hüi, she chitong ma nguakle tangtin. She chitong ma chikux thongle chix nguak; chix hax to nguak, ija mang ang achang.

²⁸Sisera honue thangmik makhange hu; she-e hu kamik kha makhange. “Chix man-kanlin ipongpong kople büthüikoxle chingui ngopuix?” she-e atüi. “Chix manbu chat ang büthüikoxle shenle ngopuix?”

²⁹She üinu hwom khama hwon süzaikya mixchae lan, ilaxle she-e ma mongkha to chatchatnaole mongzangwün,

³⁰“Tütalichu hwome kop angkya tamchu ahak-ahan angkyakya wüi atak, sheko tuita hia anyi a süpahi tuita hanpakma, Sisera hanpak ang thalix nyi, maipua takle zingkyabu a wangchanu dingkux ma alik ang.”

³¹Idaile nang zanpabu a ilele wüi naxziün, O JOWANPA, ikoxlechu nang zuikhuibu a dongüi senuja ningle naxnyan! Ifüima chaxwan tok ma zanglao 40 tumüi-lomkhaole ngo.