Read Wancho Naga Kaxfünpa-Hwom 6 Bible Online

Kaxfünpa-Hwom 6 - Wancho Naga bible

Kaxfünpa-Hwom 6

¹Anaole chuwüi Israel khünaknue JOWANPA zongto ochax lyen, ikhoma ma chixe Midi nok ang zanglao anüt hwom thakma apünle ngo ang tom.

²Israel nok füi Midi nok wüi tsak-zongle chang, ilaxle Israel khünakbu hwom thoto longkun hia haxhuachi chingünkya nui to azwonle ngo.

³Chemtue Israel noke tsaxshit-tuaküile changüihex, Amalek nok tamchu sak-hax tokya khünakbu koplaxle ngui üntoxle Midi noke hwom to sing.

⁴Ija haxtok ma hwom athong laxle shuathongchi Gaza alople julaxle ija hozui akhople tsaxsa-hikha bakle amale tox. Chun, maihu hia mantsak, ibu pangwüi hwome tsui pao, ikoxle Israel khünakbu ang ifüi ozün ma ngolax-o lükya oli chemchu chitox-chitox.

⁵Hwom a naxnu-naxlang hüikya ningle tsom-pom hia nyihombu füi tütlople nguiüi. Hwom khünak hia utbu a akiak ang ojao chithole lui. Hwom nguilaxle chaxwan bakle thule akhix tox.

⁶Israel nok a owa hopu-otong chitüikya ningle hwom tu to osam-otam ang achangle pao.

⁷Ifüima Midi nok chak tokya hwom khosün lomle Israel noke JOWANPA sele akhong.

⁸JOWANPA Israel nok Zang-e, chix chito khange ija kaxho koplaxle aje tuita ahüi: “Ijip nok to da ang ngokya hünzom kue alaipu.

⁹Kue hünzom Ijip nok chak tokya azünpu tamchu ikhato hünzom füi azanle hüikya khünakbu chak tokya hünzom kho kue sünpu. Hünzome haxtok kople hüikya füi tomle kue ikhato tüikya nokpubu jwonle apaopu, ilaxle kue hünzom ang hwom haxtok koxpu.

¹⁰Kue ku a JOWANPA hünzom Zang changpu ilaxle athax hünzom ngokya haxtok ma tüikya Amor nok baozangbu to taxshwomle kue akaxdaoa. Ikoxle hünzome ku kax ma chilax.”

¹¹Ifüima Ofrah nok ma JOWANPA kaxtaimix ngui ilaxle Abiazar homjen angkya mixsün tuita Joash kux nok pünnu pünsum fang ma chix pax. Chix sasün Gideon-e grepti-ju fyet nui ma dangjajale wonglai tsax nakle ngokya. Chix a Midi noke chix chingün angkya hanpakmale khünle ngokya.

¹²JOWANPA kaxtaimix chix hato ngui ilaxle thüi: “Mixtsak-naomüi, JOWANPA a nang füi tüile!”

¹³Gideon-e chix ang thüi: “Alixachong, JOWANPA kwom füi jangtüiba anyix kwom to ile büthüikoxle chang-ngopu, le kue nang ma atüikoxle? Ijip nok tokya hwom alai pongma JOWANPAe mokkya ohünotün mwotbu bama apu-apa hwome kwom hama wünle apuakya a chemningkya pang? JOWANPAe kwompi awütdaoa ilaxle Midi nok chak to maxsax-ole dantoxdaoa.”

¹⁴Ifüima JOWANPAe chix ang kaxkox: “Nang chatsak-muazongkya füi paolax ilaxle Midi nok chak tokya Israel nok khosünlax. Ku jaojaoe nang tsanle akat ngopu.”

¹⁵Gideon-e lan: “Ikoxle, JOWANPA, kue chemle Israel nok khosünüi? Manasseh homjen ma sümaxkya saxthom a kwom saxthom changle, ilaxle kwom kako-homkha machu ku a eto chihüikya khünak tuita changle.”

¹⁶JOWANPAe lan: “Nange ija mok ang thoüi, chemthüikoxle kue nang to asunüi. Nange Midi nok a mixhuak tuita tsempa ma amüt ang thoüi.”

¹⁷Gideon-e lan: “Nang ku füi jangtüi thüiningle, nang a JOWANPA changpule lita münwan ahohu.

¹⁸Kue nang hato tökya sütling apüile machang tanto nang taxpao.” Chixe lan: “Ku a nang chatkya kople nuiüi.”

¹⁹Ikhoma Gideon a chix hom to chat ilaxle zwonsa tuita huakle songlaxle twonkhax chiawonkya ankhao zing ang chixe ankhix tuak 10 lax; chixe müi tsong ma sho ilaxle müi suiti a tik tuita ma lax, ilaxle ibu a zak pünnu tong ma JOWANPA kaxtaimix hato apüile chix ang kox.

²⁰Kaxtaimix-e chix ang kaxtom kox: “Müi hia an ija long ding ma dankox, ilaxle ibu to müi suiti füi likox.” Gideon-e ile mok.

²¹Ifüima JOWANPA kaxtaimixe chak thüilaxle müi hia an to chix chak ma tüikya kiathox ozae thu. Ija long angkya wün lailaxle ija müi hia an zokle ashun. Ifüima kaxtaimix amuale sam.

²²Ifüima Gideon-e texle atak, ami chixe ngünkya a JOWANPA kaxtaimix wüi changdao; ilaxle chixe zakya bama akaxle bang: “Khüthak JOWANPA! Kue nang kaxtaimix thün-khang asaole jao ngünle laxdaoa!”

²³Ikoxle JOWANPAe chix ang thüi: “Mongsom tüilax, taxza, nang a münzipu.”

²⁴Gideon-e ikhama JOWANPA ang tö-tsap tuita zing ilaxle ikha ang chixe “JOWANPA a Mongsom”, le nyak. (Ofrah ma ija anyix kople tüile ilaxle ija a Abiazar hwom saxthom kux changle.)

²⁵Ija ja JOWANPAe Gideon füi akax: “Hünpa maihupong üntoxle mama maihupong, zanglao 7 nguidaokya koplax, hünpae Bal ang zingkya tö-tsap pündao, ilaxle ija hama tüikya Asherah baozangchanu chapa dakle atsundao.

²⁶Ija ding ma JOWANPA hünzom Zang ang tö-tsap tuita müiwüi müile zaile alaikox. Ilaxle anyi lükya maihupong koplax ilaxle ija tö tuita ang koxle komkaile zokle ashunlax; ilaxle nange texle atsunkya Asherah mua a ija zok ang ha ang laxlax.”

²⁷Idaile Gideon-e chix dabu hwom mixhuak bün zünle koplaxle JOWANPAe chemle moklaxle thüipuix ilailaile mokle alyet. Hwom kako-homkha hia tingnok khünakbu thua zalaxle chixe ija zangnak ma mokle alyet.

²⁸Chemtue tingkhua angkya khünakbu anopningle jipzole changpuix, ija thoma Bal hanpak ang zingkya tö-tsap hia Asherah chapa dakle atsunle bang, tamchu anyi lükya maihupong ikhama zingle tüikya tö-tsap ma zokle ashunkya man bangle changpuix;

²⁹hwome tata ma atüi: “Ija owae mokpu?” Hwome otue lomle hüikoxle Joash sasün Gideon-e mokputa le atak.

³⁰Hwome Joash ang thüi: “Hünsa ikhato alaihüi; kwome chix a lang angkya wüi changle! Chixe Bal hanpak ang zingkya tö-tsap tamchu ija zui angkya Asherah chapa dakle atsun amadaoa.”

³¹Ikoxlechu chix zan to kakyabu füi Joash-e akax: “Hünzom Bal hanpak ang ajongpuix nyi? Hünzome chix khosele changpuix nyi? Chix hanpakma ajongkya mix a zangngai thoma wüi mik amütle bangüi. Bal a zang tuita jangchang, chixe ija khünak kho naxsünkox, chemthüikoxle dakle atsunkya a chix tö-tsap changle.”

³²Ija makhange Gideon a Jerubbal le tsing ang tom, chemthüikoxle Joash-e thüi: “Bal chix jaoe ija khünak kho naxsünkox; dakle atsunkya a chix tö-tsap changle.”

³³Ifüima Midi nok, Amalek nok, üntoxle Sak-hax nok pangwüi asox, Jordan shuanu ta ilaxle Jezril haxsha ma athong.

³⁴JOWANPA Chasa-e Gideon to o, ilaxle chix füito azüi angkya hanpakma Abiezar saxthom se ang nyazong müt.

³⁵Chixe pangnyichi angkya Manasseh homjen ang chix füito azüi ang ahyenle kaxho mix apao. Chixe kaxho mixbu, Ashar, Zebulun, Neptali, ibu homjen pangwüi hato kaxho mix apaole chix füito wom angkya hwom ahyen.

³⁶Ifüima Gideon-e Zang füi akax: “Kue Israel nok khosün angkya hanpakma nange ku twonüile nange wüi thüipu.

³⁷Müihule, kwome wonglai tsax nakkya haxsha ma kue hidaole muzi dantoxüi. Zangngai thoma nyenti mu zaza ma bang, haxkha to chibangle jangchang thüiningle Israel nok khosün ang nange ku twonüile awanüi.”

³⁸Ija a ija jaojaole chang. Chemtue Gideon ofüinop swomsae zopuix, chix mu angkya nyenti khua tuita ma awangle fyetle alai.

³⁹Ifüima Gideon-e Zang ang thüi: “Ku füi mong taxtsik; kue tam wüi akaxfang. Kue anaolechu muzi füi tam wanle ano huhax. Izuma muzi a zuaüi ikoxle haxkha a shanle naxchang.”

⁴⁰Ija jachu Zang-e ile wüi mok. Ofüinop mu a zuazoxzoxle ikoxle haxkha a shanshoxle bang.