Read Wancho Naga Kaxfünpa-Hwom 7 Bible Online

Kaxfünpa-Hwom 7 - Wancho Naga bible

Kaxfünpa-Hwom 7

¹Nyixta Gideon hia chix khünakbu kaile zo ilaxle Harod shuasa zui ma pom zai. Midi nok pom a hwom zongma shuakuxchi ma Moreh haxhua zui angkya haxsha ma tüikya.

²JOWANPAe Gideon ang thüi: “Nang füi tüikya khünaknu a Medi nok to lüt angkya hanpakma müimamale tüile. Hwom khünak lüikya khoma hwome ofüima matsak-mazong füi lüt ang thopule texüi tüile, ile chang koxle ku ang münchong chemchu chitüile changüi.

³Khünaknu hama tsingang laxkox, ‘Owawa chazakya mix jangtüi hwom chat ang tsuaküi, kwom a ija Gilid haxnu ma ngoüi.’” Ikhoma hajat 22 chatle pao, ilaxle hajat 10 wüi zak.

⁴Ifüima JOWANPAe Gideon ang thüi: “Athaxchu nang ma khünak müimamale tüile. Hwom a shuakax to ti hato jokox, ilaxle kue ikhato hwom nang hanpakma süiüi. Kue khünak tuita ang nang füi pao angkya jang akax, chix pao angkya changle. Kue khünak tuita füi nang füito chipao angkya jang akax, chix a chipao angkya changle.”

⁵Gideon-e khünakbu ti hato jo, ilaxle JOWANPAe chix ang thüi: “Opange ti hi ningle le füi chaile lingpuix, ibu a chikux thongle ti lingkyabu füi süile dandao.”

⁶Ikhama chak füi puix laxle ti chaile lingkya 300 khünak tüikya; mamabu pangwüi chikux athong laxle ti thaple ling.

⁷JOWANPAe Gideon ang thüi: “Kue, hwom mixsün 300, chak ma ti kho laxle lingkyabu koplaxle, nang ang Midi nok to lüt ang tomüi. Mamabu a mahom-hom to chat angkya kax koxlax.”

⁸Ikhoma Gideon-e Israel nok pangwüi, hwom mixsün 300 lanlan süile tuilaxle hom to chat ang tom. Hwom nuikyabu tatae süt-wong hün ang tsuak ilaxle nyazongbu kop. Midi nok pom a hwom zongto fangchi ma haxsha to changkya.

⁹Ija ja JOWANPA Gideon ang kaxtom kox: “Zolax üntoxle zan pom to singkox; kue ija to nange lüt ang tompu.

¹⁰“Ikoxlechu nange sing ang zale jangchang, nang dapa Purah füi tomle hwom pom to julax.

¹¹Hwome chempangle nguazua-zangwün laxpuix ibu bakle nange atat ang kopüi; ile chang füimatix nang hato sing angkya mongchen hüiüi.” Ikhoma Gideon hia chix dapa Purah nyi zan-nokbu pom to chamtua kople ju.

¹²Midi nok, Amalek nok, hia sak-hax nokbu naxnu-naxlang lailaile haxsha ma awangle tüikya. Hwom ma ut a tinu kax angkya sakjun büta tüikya.

¹³Chemtue Gideon hozui to soxle hüipuix, ipongma mixsün tuitae hozuipa hama chix wünmang wünle ngokya Gideon-e atat ang kop. Ija mixsüne ile thüi: “Kue wünmang chito, tsaxsa tula ankhao kem thongnui to ajule hüi ilaxle nyihom to thule, ija hax to abomle anguakle ngünle.”

¹⁴Chix zuikhuie lan: “Ija a Joash sasün Giden, Israel nok changlo changüi! Ija a mama-mama hanpak ang münchang! Zang-e chix ang Midi nok hia kem süpahibu pangwüi to lüt ang koxdaoa!”

¹⁵Chemtue Gideon-e ija wünmang mo wünkya tamchu ija hanpak taile akaxkya atale laxpuix, chixe chikux athong laxle JOWANPA to shwom. Ifüima chix Israel nok pom to chatlaxle thüi: “Zohüi! JOWANPAe hünzom ang Midi nok süpahibu to lüt ang tomdaoa!”

¹⁶Chixe chix khünakbu 300 tüikya othom azom ang achangle ahan ilaxle pangwüi ang nyazong hia omong khama wünchua füikya tikkux tuipong atwon

¹⁷Chixe hwom ang thüi: “Chemtue kue zan-nok pombu chamtua alople changüihex, ku to hunga ngolax, ilaxle kue chemle mokpuix ilailaile moklax.

¹⁸Chemtue ku ilaxle ku füi tüikyabue nyazong mütle changüihex, hünzomechu pom akhople nyazongbu mütüi ilaxle akhongle, ‘JOWANPA hia Giden hokhi hanpakma!’ le azaxkox.”

¹⁹Giden hia chix füikya 100 khünak zan-nok pom chamtua alople tsüdang nguiüi thothoma alop, ipongma hwome nyetmixbu alüix tsuak zazale asu. Ifüima hwome nyazong müt ilaxle hwom chak angkya tikkuxbu hongle ashix.

²⁰Mama othom anyie chuwüi ile chang. Hwom pangnusae wüi wünnan thop tsaxchi ma twon, ilaxle akhong: “Kwom changlo a JOWANPA hia Gideon nyi hanpakma!”

²¹Pangwüie matangtang angkya pom akhople ziakople ajong, ilaxle zan-nok süpahibu pangwüi awukle zikle pao ma süt.

²²Gideon khünaknue nyazong mütle ngopongma zan-nok süpahibu a JOWANPAe hwom tata füi lüile changlo-changlo ma ahütle azan ang tom. Hwom a Zarethan chito Beth Shittah alople jao zikle paole Tabbath zui angkya Abel Meholah tinglong to jao ngui.

²³Ifüima Neptali, Ashar hia pangnyichi angkya Manasseh homjen khünaknu sele alai ilaxle hwome Midi nok achua.

²⁴Gideon-e Efraim haxhua nok pangnu khato wüi kaxhomix apaole thüi: “Juhüi ilaxle Midi nok füi azan hax. Jordan shuanu makhange Bethbarah alople shuasabu pangwüi ziakop-hüitox, ilaxle Midi nok ibu tale le ang taxtom.” Ifüima Efraim nok pangwüi sele asox, ilaxle hwome Jordan shuanu hia shuasabu pangwüi Bethbarah alople ziakop.

²⁵Hwome Midi nok wanghompa Oreb hia Zeeb nyi kop; hwome Oreb a Oreb longnu tong ma lang ilaxle Zeeb a Zeeb grepti-ju fyetnui ma lang. Hwome Midi nok chizakle achuale le ilaxle Jordan shuanu handün chito asukya Giden hato Oreb hia Zeeb nyi khang wün.