Read Wancho Naga Kaxfünpa-Hwom 8 Bible Online

Kaxfünpa-Hwom 8 - Wancho Naga bible

Kaxfünpa-Hwom 8

¹Ifüima Efraim noke Gideon ang thüi: “Midi nok füi azan ang kapongma hünzome kwom büthüikoxle chisepu? Hünzome kwom to ile büthüikoxle hwonpu?” Ija bama hwome mong ma kak lüwüi kaxthup-ngaotünle chang.

²Ikoxle chixe thüi: “Kue chem mokle tsuak puix ija a hünzome mokle tsuakdaokya füi apyen fang jao münchang. Efraim nok muakya mixe mokle tsuakkya ngaxchu kwom homjen pangnusae tsuakkya thak to changle.

³Changle, Zang tsak-zong makhange hünzome Midi nok wanghom Oreb hia Zeeb nyi lang ang thopu. Ija füi apyen ang kue chem alandao?” Chemtue chixe ija kax ngaipuix, hwom mongtsik dang.

⁴Ipongma Gideon hia chix füikya 300 khünaknu Jordan Shuanu hato nguilaxle ija tale ledaoa. Hwom a tüle na-jua le max, ikoxlechu hwome zan achuakle zikkya chidan.

⁵Chemtue hwom Sukkoth to nguipuix, tingnu angkya khünaknu füi chixe akax: “Ku khünakbu a hidaole süt fahüi. Hwom a woknuak-tilan ma maxle tüile, ilaxle kue Midi nok wanghom Zebah hia Zalmunna nyi achuale ngokya changpu.”

⁶Ikoxle Sukkoth nok angkya lompabue akax: “Kwome hünzom süpahibu ang süt chem hanpak ang kox angkya? Athax ngaxchu hünzome Zebah hia Zalmunna nyi kop ang matho khato.”

⁷Ikhoma Gideon-e lan: “Changle! Chemtue JOWANPAe Zebah hia Zalmunna nyi ku chak to koxle changüihex, kue hünzom to sak-hax tokya kongbüi hia huxpünbu apüilaxle fitüi!”

⁸Gideon a Penuel to pao ilaxle ikhato tüikya khünaknu ma ija ningle süt ju, ikoxle Penuel angkya khünaknue chuwüi Sukkoth noke lankya ningle wüi lan.

⁹Ikhoma chixe hwom ang thüi: “Ku a haxmüi-zangma lüwüi chat angkya changle, ilaxle ile changkya zuma kue hünzom tingnu pan atsunle amatox angkya changle!”

¹⁰Zebah hia Zalmunna nyi a hokhi süpahibu füi Karkor ma tüikya. Sak-hax to tüikya jat süpahibu khama 15, 000 wüi atale tox; 120, 000 süpahibu a langle awüt tsuakdaoa.

¹¹Gideon a lom fole sak-hax chamtua atsyenle le. Ija a Nobah hia Jogbehah zongma handün chikao, ilaxle ibu süpahibu to allele single kox.

¹²Midi nok wanghompa anyi, Zebah hia Zalmunna nyi, paole azang, ikoxlechu chixe hokhi achuale zik ilaxle kop, ilaxle hokhi süpahibu pangwüi afale pao ang tom.

¹³Chemtue Gideon a Heres Lomnu makhange zanwün wangle ngokya hex,

¹⁴chixe Sukkoth nok ang naosün tuita kop ilaxle chix ma atüi. Ija mixsüne Gideon hanpakma Sukkoth angkya lompa hwom 77 khünak mün zale kox.

¹⁵Ifüima Sukkoth nok hato nguilaxle Gideon-e akax: “Hünzome ku to münasunpule angamkya texle atakcha? Kue Zebah hia Zalmunna nyi kop ang mathokya daile, tüle woknuak-tilan zingokya ku süpahibu ang süt münfapule angamkya daimi? Hulax, athax hwom ku chak ma tüile!”

¹⁶Ifüima chixe sak-hax tokya kongbüi hia hux pünbu Sukkoth nok angkya lompabu to fit ang apüi.

¹⁷Chixe Penuel angkya pan chuwüi pünle ama ilaxle ija tingnu angkya khünakbu lang.

¹⁸Ifüima Gideon-e Zebah hia Zalmunna nyi ma atüi: “Hünkhie langkya Tabor nok angkya khünakbu chemle chang?” Hwome lan: “Hwom pangwüi nang lailaile ngünle — hwom pangwüi wanghom su-sa hwom lailaile.”

¹⁹Gideon-e lan: “Hwom pangwüi kutüi-kunao hwom, nuta sa wüi changhukya. Kue otsing tomtata ma tsaopu, hünzome hwom chilangle jangchang kue hünzom münlang.”

²⁰Ifüima chixe Jethar, chix hotüi ang thüi: “khaxa, chix langdao!” Ikoxle ija naoe chix changlo chisyet. Chix chaza, büthüikoxle chix a naosünsa chang koxle.

²¹Ifüima Zebah hia Zalmunna nyie Gideon ang thüi: “Oman, kukhi a nang chak jaoe langlax. Ikhama lüka tuitae lüka mwot mok angkya oli.” Ikhoma Gideon-e ibu lang ilaxle utbu dingkux ma tüikya tuiza-nakombu lax.

²²Ifüima, Israel noke Gideon ang thüi: “Nang a kwom lompa ang ngohüi — nang füima chuwüi nang sixli hwome kwom to naxapünkox. Midi nok chak tokya kwom nangetix sünkya changle.”

²³Gideon-e lan: “Ku a hünzom lompa ang münchangüi, kusa hwom chuwüi münchangüi. JOWANPA tix hünzom lompa changpu.”

²⁴Ikoxlechu chixe chizakle akaxle pao: “Kue hünzom ma lita kax atüifang. Hünzome laxdaokya nasax pangwüi ku ang laxhüi.” (Mama sak-hax nokbu ningle Midi nokbue chuwüi hun nasaxbu langle tüikya.)

²⁵Khünaknue lan: “Kwome ibu nang ang mongmüi-pwonlale koxüi.” Hwome nyi tuita pünle nom, ilaxle mae laxle tüikya hun nasax ija khama noknusae dan.

²⁶Ija ma Gideon-e kopkya hun nasax tuak 20 tukuxle jao nui, ikhama mama tuiza-nakom, likwün, Midi nok wanghome laxkya nyikhikbu, ilaxle hwom utbu dingkux ma laxkya dingkhyep ibu chemchu chiathüt.

²⁷Gideon-e hun makhange chapa tuita zing ilaxle ija chix ngokya tingnu, Ofrah ma dan. Israel nok noknusa Zang danle toxlaxle ija chapa to shwom ang pao. Ija a Gideon hia chix homkha hanpakma tuita kam thakya ang achang.

²⁸Ikhoma Midi nok to Israel noke wüi anao, ikhoma zan zak. Athaxpi haxtok ma Gideon zikya kople zanglao 40 tumüi-lomkhaole ngo.

²⁹Gideon a chix hom to chat ilaxle ikhato ngo.

³⁰Chix ang sasün hwom 70 tüikya, büthüikoxle chixe sheko huanuma lax.

³¹Chixe Shekem ma wangnucha chuwüi thomle tüikya; she-e chix ang sasün tuita puxle kox, ilaxle chixe ija nao ang Abimelek le mün kox.

³²Gideon sasün Joash azule tix zi ilaxle chix a hopa Joash zukting ma akhün. Ija a Abiezar tingnu Ofrah ma changkya.

³³Gideon zile paokya füima Israel khünaknue tamchatlechu Zang to mongongkya dan ilaxle Bal to shwom ang süt. Hwome Tsaotsüt füikya Bal hwom baozang ang zing,

³⁴ilaxle hwom akhople tüikya tomzi nok zanpabu chak tokya hwom khosünle thomkya Zang, JOWANPA thothakya danle tox.

³⁵Israel onok hanpakma chixe müikya mwot chemtukux mokle alan toxdaopuix, ibu bama hwom ang Gideon hwom homkha füi mongmüikya tam chitüi.