Read Wancho Naga Mikngün-Ohün 1 Bible Online

Mikngün-Ohün 1 - Wancho Naga bible

Mikngün-Ohün 1

¹Ija a Jisu Khrista-e angaile ahokya zale thomkya laipex tuita changle. Chwonle chem chang angkya tüipuix ija chixe ma thothakyabu hato aho angkya kuxma Zange Jisu Khrista hato ija angaile kox. Chix kaxtaimix makhange Khrista-e ijabu chix thothapa Juhan ang tsingle lax ang tom;

²ilaxle chixe ngünkya pangwüi Juhan hama wünle kox. Zang tokhange kopkya kaxho hia Khrista-e angaile fakya otsingtsing bama ija a chix kaxkhi changle.

³Ija laipex ekyabu mohiman, ilaxle ija jekax to apakyabu tamchu ija laipex ma zale tüikya kax ma laxkyabu mohiman! Chemthüikoxle ibu pangwüi changle ngai angkya hanpak chwonle hüiüna.

⁴Asia haxtok ma tüikya müimüithom anüt hato Juhan tokhange: Zang owa athax tüipuix, tüikyahex, üntoxle tüi angkya hex chix tokhange; üntoxle chix ngwotnui thüntho ma tüikya chasabu anüt tokhange,

⁵üntoxle owa chithai toxkya kaxkhi, zikyabu khama pongwang ma zokya mix, üntoxle owa chaxwannu wanghombu thakma apünkya mix angchu changpuix, ija Jisu Khrista tokhange hünzom ang mongsom hia chingcha naxchang.

⁶Chixe kem to mongkün, üntoxle tö koxle chix zikya makhange chixe kem ochax tokya da üntoxle chix Zang tamchu Hopa thotha ang kem ma nguapabu wangting zingle. Fuazang hia tsakzong othuithuima Jisu Khrista, chix kux wüi naxchang. Amen.

⁷Hulax, chix zangfwom ma nguile ngole! Noknusae chix ngünüi; Chix to pax füi tsunkyabuechu; Chaxwannu angkya khünak nok wüi, chix bama sopkya tüiüi. Ija ile changüi jao! Amen.

⁸Owa athax tüipuix, tüikyahex, üntoxle tüi angkya hex, ija Jowanpa Khüthak Zange thüi: “Ku a Alfa tamchu Omega” thüikoxle Owang tamchu oshuk.

⁹Ku a nang zongto tüinaopa, Juhan changle. Chix wangting ma womkyabu hato hüi angkya sikngün kaxsix chidünle adukya ma Jisu Khrista man tokya mix tuita ningle ku a hünzom üitho changle. Zang kax hia Jisu Khrista-e angaikya otsingtsing bama apuk-apua angkya kuxma ku Patmos shuazo to thomkya changle.

¹⁰Jowanpa sedongkya nyix chasae ku awang, ilaxle ku nuakfüi tokhange nyazong tuita mütkya zing lailaile ozing zongkya tuita kue atat.

¹¹Ijae akax: “Nange chem ngünpuix, ija zalax, ilaxle ija laipex tingsho anüt angkya müimüithombu hato apaokox, ibua: Efisia, Smarna, Pargama, Thaitira, Sardia, Filadelfia, üntoxle Laodekia ibibi.”

¹²Ku füi owa akax puix ang kue aküile hu, ija ma kue hun wüntik dannui anüt ngün.

¹³Ibu khama khünak sündün ma tuita ngün. Ijae chitong kople nyi tho ilaxle hun züpak apak

¹⁴Chix kho a chun mun chichangba jun büta tho, ilaxle chix mikbu a wünchua lailaile tüikya;

¹⁵Chix cha ma wün to zokle atsao daokya tamchu fwotle atsyet daokya khop lailaile nyanle tüikya, üntoxle chix kaxzing a sap dütkya zing lailaile tüikya.

¹⁶Chix a tsaxchi chak ma lyettsi anüt koplaxle tüikya, ilaxle nongnong-naxkya changlo chix wikha makhange lai. Chix thün a tungto senyan ningle nyanle tüikya.

¹⁷Otue kue chix ngünpuix, ipongma ku omang ningle chix chitong ma nguak. Chixe ku to chix tsaxchi chak füi twon ilaxle thüi: “Taxza! Ku a Alfa hia Omega changle.

¹⁸Ozün ma tüikya a ku changle! Ku zidaokya ikoxlechu othuithui hanpak ang azangle tüile. Zik hia zikyabu chaxwan thakma apün-ada angkya zong ku ma tüile.

¹⁹Idaile nange ngünkya jali, athaxkyachu üntoxle füima chang angkyachu pangnu zale kopkox.

²⁰Nange ngünkya lyettsi anüt hia hun wüntik dannui anüt pyenle tüikya ija hanpak changle; lyettsibu anüt a müimüithom anüt kaxtaimixbu changle üntoxle wüntik dannui anüt a müimüithom anüt hanpak changle.