Read Wancho Naga Mikngün-Ohün 10 Bible Online

Mikngün-Ohün 10 - Wancho Naga bible

Mikngün-Ohün 10

¹Ifüima otsak ozong füikya kaxtaimix mama zangkangting tokya jukya kue ngün. Chix zangfwome lwop üntoxle nomlong füi khangngüi daole tüikya. Chix thünza a zanghan ningle tüikya. Chix chabu a wün thong lailaile tüikya.

²Chix chak ma laitünsa tuita daplaxle tüikya. Chix tsaxchi cha tinu dingma ilaxle nongchi cha a chaxwan dingma dan.

³Ilaxle mailang ahungkya ningle ozing tüle chongle chix akhong. Chix akhong füima zangdung anüte adungle lan.

⁴Ibu zangdung anüte ozing alaikya füima kue laiza ang achwonle tüikya. Ikoxchu zangkangting tokya kax zing kue ile atat, “Zangdung anüte akaxkya pyenle naxngokox; ija zale taxkop!”

⁵Üntoxle tinu hia chaxwan dingma ajongle tüikya kaxtaimix owa kue ngün, chixe chix tsaxchi chak, zangkangting chito ajong le,

⁶owa othuithuima ngopuix; owae ding-hi-hax üntoxle tinu, tamchu ibu ma atüitüi, komkaile zingpuix, Ija Zang münma tsaosaxle thüi: “Athax tan ngo angkya müntüi!

⁷Ikoxlechu chix da ajebu hama tsingang tomdaokya ningle, kaxtaimix anüt lükyae chix nyazong mütkya zuma, Zange chix huxsa mwottho tsuakle hüi angkya changle.”

⁸Ifüima kue atatkya zangkangting tokya kaxzinge ku füi chatle akax: “Hüilax, ilaxle tinu hia chaxwan dingma ajongle tüikya kaxtaimix chak angkya daple tüikya laitün laxlax!”

⁹Ku hüi üntoxle ija kaxtaimix ma laitün ju. Chixe ku ang thüi: “Koplax ilaxle saxlax; ija a nang wok khato sikya ang achangüi, ikoxlechu nang wikha ma ija a naxti büta tiüi.”

¹⁰Kue chix chak angkya laitün lax ilaxle ija sax, ikoxle ija ku wikha ma naxti tukux jao ti. Ikoxlechu ija kue jok füima ku wok khato ija osik ang achang.

¹¹Ifüima ku füi akax: “Tamchatlechu nange chaxwan longkho, jat-li, kaxngao, ibu tamchu wanghombu bama Zang kaxho apuk-apua angkya changle.”