Read Wancho Naga Mikngün-Ohün 11 Bible Online

Mikngün-Ohün 11 - Wancho Naga bible

Mikngün-Ohün 11

¹Ifüima kaithox ningkya kiatua tuita ku ang fa ilaxle akax: “Paolax üntoxle nange Zangshwom-hom, zomtong ilaxle zangshwom-hom ma zangshwom mix otukux tüipuix thütle anohu.

²Ikoxlechu nya-o taxthüt ngohom, chemthüikoxle ibu a lyet punyi ali Otsao Tingnu to cha füi nak angkya Zang chitsingkya khunakbu ang koxdaokya changle.

³Kue ku kaxkhi sün anyi pongkhwon za laxlaxle tsanle apaoüi, ilaxle nyix 1, 260 bama hwome Zang kaxho apuk apuaüi.”

⁴Hakhi anyi a chaxwannu Jowanpa thüntho ma ajongle tüikya olip pün anyi üntoxle wüntik anyi le changle.

⁵Owawae hwom to thama adün ang jang azong thüiningle, hwom wikha angkya wün lailaxle hwom zan max ang tomüi, ile hwom to thama adün ang azongkyabu langüi.

⁶Hwome Zang kaxho apuk ngopong ma zang chiwat angkya hanpakma zangding ka hak angkya zong hwom ma tüile. Hwom mong tsukyakya ma tümik sopkya aji ang achang angkya tamchu küjo küjekya kaklak thama füi chaxwannu to chak mok angkya hwom ma zong tüile.

⁷Otue hwome hwom kaxho apukkya ashuküi hex, izuma tswomkha tokya laikya müi hwom füi azanüi. Chixe hwom to anaoüi ilaxle chixe hwom langüi,

⁸ilaxle hwom Jowanpa takle langkya tingnu tingsho fato hwom mangbu awüt thomüi. Chasa kaxpyen ma ija tingsho ang Sodom chichangba Ijip le nyakle.

⁹Pangnu kaxngao, jat-li, üntoxle saxthom homjen tokya khünaknue zo ang chitom le ibu mang to hanpak nyix azom okao hule nuiüi.

¹⁰Okhi zikya khoma chaxwannu angkya khünaknu tüle mongmüiüi. Zuikhuibue tata füi hingho ma alüixüi; chemthüikoxle ija aje nyie chaxwannu ma ngokya khünakbu ang tüle tingtui adün.

¹¹Hanpak nyix azom okao nui füima, Zang tokhange khüzün zakdün hüi ilaxle hokhi ma nop, ilaxle hokhi ajong, üntoxle ija ngünkyabu pangwüi abüt-aban.

¹²Ifüima zangkangting tokhange akhongle hokhi füi akaxkya ozing ija aje nyie atat. Ija kaxzing a: “Ikhato oman!” Okhi zongto zan ang ngokyabue hule ngopongma wüi, hokhi zangfwom ma zangkangting to dong.

¹³Ipongkhae tüle bütix si; tingnu othom bün angkya thom tuita amüt, ilaxle hajat anüt khünak lang. Iboma atale tüikya khünak noknusae wüi zangkangting tokya Zang chongkya bama achuak achen.

¹⁴Anyi lükya thama kaidaoa, ikoxlechu azom lükya thama chwonle wüi nguile!

¹⁵Ifüima kaxtaimix anüt lükyae chix nyazong müt, ilaxle zangkangting to tüle-tüle azaxle hwome thüi: Chaxwan apün angkya tsakzong, athax a kem Jowanpa tamchu, chix Messaiah kux changle; othuithuima chixe apünüi!

¹⁶Ifüima tsa ali tüichong mixmüi hwom opang Zang akhople hwom tüntongbu ma thungle tüipuix, hwome haxchi to thüne hule akhux üntoxle Zang to shwomle akax,

¹⁷Khüthak Jowanpa Zang, owa athaxchu tüi üntoxchu tüi angkya hex! Kwome nang mün achuakpu; nange tsakzong chongkya lax, apün ang owang wangdaokoxle!

¹⁸Chaxwannu khünak ang, tüle mongtsike awang; nang mongtsik hanpak tamchu, omangbu kaxfün hanpak, nguile hüiünkoxle; nang thothakya ajebu, nang khünaknu pangnu; nang chathua zale tüikyabu, hixkya, chongkya pangwüi to, nang mohiman hanpak nguile hüile. Chaxwannu amütkyabu amüt angkya, hanpak nguile hüile.

¹⁹Zangkangting tokya zangshwom-hom ka dap, ilaxle ikhama Tsaotsüt suak ngün. Ifüima zangchang jep hia ozing, üntoxle zangdung, üntoxle bütix sikya tamchu tüle