Read Wancho Naga Mikngün-Ohün 14 Bible Online

Mikngün-Ohün 14 - Wancho Naga bible

Mikngün-Ohün 14

¹Ifüima kue hukoxle Zaion haxnu ma Chun Hosa ajongle ngokya ngün. Ma khangpong ma chix mün üntoxle Hopa mün zalaxle tüikya 144, 000 khünaknu chix füi tüikya.

²Sap dütkya hia zangdung zing lailaile kue zangkangting tokya ozing tuita atat. Ija ozing a thuaput waxmai müt mankyabue ibu mütle azingkya lailaile tüikya.

³Chongwang tüntong hia ozün ma tüikya müi ali tamchu tüichong mixmüibu, ibu thüntho ma 144, 000 khünaknu ajongle tüikya; ibue hwom tatae awan ang thokya tsaizün tuita ngao. Khünaknüsa khama shakle kopkya hwom tata wüi.

⁴Hwom a chinunchakkai chemchu chitüi le shekobu füi atsaile ngokya tsaothakyabu changle. Chix alele chito lele hwome Chun Hosa man to. Hwom a khünaknüsa kha angkya shakle kopkyabu changle. Hwom a Zang üntoxle Chun Hosa ang pongwang ole kox angkya thom changle.

⁵Atse le zangwün angkya hwome chiawantox; hwom a ojao chithaikyabu changle.

⁶Ifüima chaxwannu angkya khünaknu pangnu jat-li, homjen, kaxngao tamchu ting-nok hato ho angkya oshuk chitüikya Kaxho Müikya koplaxle tüle dingkhoza to pile ngokya kaxtaimix mama tuita kue ngün.

⁷Chixe akhongle akax: “Zang chathua zakox üntoxle chix fuazang achua achenkox! Chemthüikoxle chixe khünaknüsa kaxfün angkya hanpak nguile hüile. Ding hia hax üntoxle tümik fuaknuibu zingle alaikya Zang tong shwomkox.”

⁸Anyi lükya kaxtaimixe owang angkya füima azuile thüi: “She nguaküna! Tüle zaxzangle tüikya Babilon nguaküna! She-e ma müi-hi-aji mongzokkya ju ozya khünaknu noke ling ang tom!”

⁹Tho angkya nyi füima azuile azom lükya kaxtaimixe akhongle thüi: “Opangsae ija müi hia chix chapa to shwom üntoxle khangpong ma chichangba chak ma münwan tople tüiüihex,

¹⁰ojao chiawan homle chix mongtsik wansa ma thokkya ju chuwüi hwome lingüi, ilaxle otsao kaxtaimixbu hia Chun Hosa thüntho ma wün hia khat makhange hwom fuxtsüikya tüiüi.

¹¹Hwom fuxtsüikya wün makhange laikya wünkhut othuithuima ding to dongle ngoüi. Ija müi hia chix chapa to shwomkyabu opange ija mün ma münwan koplaxpuix hwom hanpakma zangnak zangngai chemtuechu nazak müntüi.”

¹²Opange Zang kaxtombu kax ma lax üntoxle Jisu tokya mongong ma shingmongle ngopuix, ibu Zang khünakbu hanpakma ikhama adu angkya lomle.

¹³Ifüima kue zangkangting tokya ija kaxzing atat: “Ija zale koplax: Athax makhange opang Jowanpa thothakya mwottho ma zilaxpuix, hwom mohiman!” “Ija changtomtale! Hwome azong le mokle ngokya mwot tokya nazak ang kopüi; chemthüikoxle hwom mwot hwom füito azui angkya changle.”

¹⁴Ifüima kue hukoxle zangfwom fwomtho ngün. Khünak lailaikya ija dingma thungle tüikya. Chixe hun khohom asün üntoxle chak ma tüle anaxkya changkuix tuita twonlaxle tüikya.

¹⁵Ifüima zangshwom-hom angkya mama kaxtaimix tuita lai üntoxle zangshwom-hom dingma thungle ngokya mix füi akhongle akaxle thüi: “Nang changkuix twonlax üntoxle tsax atulax, chemthüikoxle hanpak chwonle hüile tamchu chaxwannu a atu tang le tüle puamünle tüile!”

¹⁶Ifüima zangfwom dingma ngokya kaxtaimixe chix changkuix chaxwannu to ajo, ilaxle puamünle ngokya chaxwannu zütle atom.

¹⁷Ifüimachu wüi chak ma anaxkya changkuix koplaxle zangkangting zangshwom nui angkya mama kaxtaimix tuita laikya kue ngün.

¹⁸Ifüima mama kaxtaimix tuita, wün to hu ang thomkya zomtong angkya lai. Changkuix tüle anaxkya koplaxle tüikya kaxtaimix füi tüle azaxle akaxle thüi: “Nang changkuix twonlax ilaxle chaxwannu ma tüikya grep haxtok angkya zuziak zütlax, chemthüikoxle grep a jumüna!”

¹⁹Idaile ija kaxtaimixe chix changkuix chaxwannu to ajo, ozu angkya grep khai, üntoxle tüle Zang mongtsik grep fyetnui to ibu awüt.

²⁰Tingnu pantua tokya grep fyetnui ma zuziakbu fyet, ilaxle ija grep fyetnui ma aji tichen lai. Ija aji tichen sok azok tukux zu ilaxle kilomitar ho-azom jenle pao.