Read Wancho Naga Mikngün-Ohün 18 Bible Online

Mikngün-Ohün 18 - Wancho Naga bible

Mikngün-Ohün 18

¹Ifüima zangkangting tokya kaxtaimix mama tuita jukya kue ngün. Chix ma apün-ada angkya chongkya zong tüikya, üntoxle chix fuazangkyae chaxwannu pangnu khato nyan.

²Chixe tüle azaxle thüi: “She nguakdaoa! Chongkya Babilon nguakdaoa! Athaxpi she a, bao hia haxshix chasabu, ngwotnui ang achangdaoa; chitsaokya tamchu nushix dongkya susabu, oli pangwüi she ma awangüna.

³Zangfange she müi-hi-aji mongzok ju, tüle tsakkya tokle lingdaoa; zangfang angkya wanghombue she füi, chinunchakkai mwot mokdaoa; chaxwannu angkya thalex khünakbu, opan chitsyen she müi-hi-aji mongzok; ija füi ahak aluaüna.”

⁴Ifüima zangkangting tokya mama kaxtaimix kaxzing kue ile atat: “Laiün, ku khünakbu! She angkya laiün! She ochaxbu ma hünzome, süntswon angkya oli münchang; She sikngün hünzome, tom-han angkya oli münchang!

⁵Chemthüikoxle she ochaxbu a, zangding to thule athünle tüile, She chichang-chizang mwotbu, Zange texle atakle.

⁶She-e hünzom to hwondaokya ningle, ilailaile she tochu hwonkox; She-e mokdaokya mwot-thom to, othom anyie bole she ang oma laxkox. She-e hünzom hanpakma achwonkya ju, ito thom anyie nüile tsakkya ju füi, she pe awang ang laxkox.

⁷She chemtukux zaxzangle tamchu, tüinangle hüidaopuix, ija tukux she ang, sikngün hia mikfi nyi laxkox. Chemthüikoxle she-e alüile ile akax: ‘Ku ikhama wangcha ningle ngopu! ku a zomnu chichang, kue mikfi jenkya münawan!’

⁸Ija khoma nyixtakya hanpakma wüi, she-e okak olak, osop-ojua tamchu otui-onuak, ibu thama füi apong asaoüi. Ilaxle she-a wün füi zoküi; Jowanpa Zang, she kaxfün fapupa, chix a pangnu thokya Zang changle.”

⁹Ija tingnu zokle ashunkya wünle hia wünkhutbu ngünkya zuma, she müi-hi-aji mongzok mwot ma womdaokya chaxwannu angkya wanghombu, ija ngünlaxle tüle mongmaxle sopüi.

¹⁰She sikngün ma wom ang zalaxle hwome ochu to ajong üntoxle, “Zahua! Zahua! Ipong chongkya Babilon tingnu nang; khonta tuita mong ma wüi, nang ang sikngün fatsuak daoa!” le thüi.

¹¹Chaxwannu angkya thalex juatai khünaknuchu tüle mongmale she khoma sop, chemthüikoxle hwom bwot-ba shak angkya mix tamchitüi.

¹²Hwom angkya hun, khop, thalix long, jaknyi, baxnat, nyimüi hia nyikhikbu; ongan müikya pün oli pangwüi, luak-zong füi zingkya mwot-kat pangnu li, otha ngamkya pünbu makhange zingkya mwotkatbu, tamchu khop, jan üntoxle haxwa-longwa, ibu füi zingkya mwotkatbu;

¹³püntsya; hingbu-tsyasa; sui to angan püli; so üntoxle ongan müikya münga; ju hia münga; an hia ata; maihu hia chun; man hia man-zyem; dahaibu hia khünak tsün; ibu athaxpi khünak owaechu chishak.

¹⁴Thalex mixbue she ang thüi: “Nange kopsele khütkya, müikya jalibu komle maxdaoa; nang tuina hia zaxzang komle samdaoa, nange ibu tam ataküi münchang!”

¹⁵Thalex mixbu opange ija tingnu füi thalex laxle ahak-aluale tüipuix, hwom ochu to ajongüi, chemthüikoxle ibu sikngün khato wom ang hwom za. Hwom sopüi tamchu mongmaxüi,

¹⁶ilaxle thüiüi, “Ku taxaza! She zongma chemtukuxkya thama hex! She-e jaknyi, baxnat, nyikhikbu awun; thalix long hia liknu, ibu füi zingkya likwün füi, aza-apua laxle tüikya changdai!

¹⁷Ikoxle khonta tuita mong ma wüi, she-e ma tuina komle amütdaoa!” Khuaham tüichong hia ikhama tüikyabu, khua chüikyabu tamchu tinu khato achakle thakop-jualo ngokyabu pangwüi cha-to ajong,

¹⁸ilaxle she zokle ashunkya wünle hia wünkhutbu ngün pongma akhongle thüi: “Ija tingnu ningle, chongkya tingnu tümatüitox!”

¹⁹Hwome ma khang to alüile hax füi fu; hwom mongma üntoxle sople thüi: “Naowange! Ipong chongkya tingnu müt, ngünlaxle ku zamaxüntong! She füi thalex juatai laxle, she angkya tuina füitix; tinu khatokya khua hopunubuchu, ahak-aluale tüikya changwüi! Ikoxle khonta tuita mong ma wüi, she-e pangwüi amüt asamdaoa!

²⁰She amütkya khoma, zangkangting to mongmüikox! Zang khünakbu, wangshembu hia ajebu, hünzom pangwüi mongmüikox! Hünzom to chisumüile hwonkya khoma, she max ang tomkya changle!”

²¹Ifüima tüle tsakkya kaxtaimix tuitae anthut long büta chongkya longnu tuita tswonlaxle ija tinu khato tswonle awütle thüi: “Ilailaile chongkya tingnu tuita, Babilon a zongma laxle tswonle awütüi, ilaxle ija chatle tamchingünüi.

²²Thuaput waxmai mütkyabu, tsai ngaokyabu; thuaput hia nyazong mütkyabu, ibu zingzua nange tammünatat! Tüningkya thalex lom mawüi changlax, mwotmok ang mix nang ma tammünatak; anthut long zing nang ma tammünatat!

²³Wünzua wünzung nang ma tammünngün; tuinu, tuipabu kaxzing münatat toxüi. Chaxwannu ma sütsak süzongkyabu, nang füi thalexkyabu changhupu; nang khun-hing füi chaxwannu khünaknu, pangwüi nange dyendaoa!”

²⁴Ajebu hia Zang khünakbu aji, tingsho ma bangkya khoma, Babilon tingnu to zothuppu; chaxwannu ma opang langdaolaxpuix, pangwüi aji