Read Wancho Naga Mikngün-Ohün 3 Bible Online

Mikngün-Ohün 3 - Wancho Naga bible

Mikngün-Ohün 3

¹“Sardia ma tüikya müimüithom ma kaxtaimix hato zalax: “Ija kaxho a Zang chasa anüt tamchu lyettsi anüt ngündaokya mix tokhange changle. Nange chem mokle ngopuix kue awanle; nang omang changkoxlechu nang ozün ma tüile le nang mo wünkya kue awan ngopu!

²Idaile zolax, üntoxle ija komkaile ziüi thoma chem nang ma tüipuix ija zongdong ang koxlax. Chemthüikoxle nange chem mokdaolaxpuix ija Zang miksho ma okho mangui le kue atakdaoa.

³Idaile nang hama chem anwot-ano daopuix ilaxle chempang atat daopuix; ija kax ma laxlax ilaxle hünzom ochaxbu tokhange chatlax. Nang chizo jangthüiba nang hato ku ahuxmix ningle nguiüi, üntoxle ku otue nguiüihex ija hanpak hünzome awan ang müntho.

⁴Ikoxlechu Sardia ma ngokya hünzom züizüie ma nyiza tsaotha le thomtsuakle. Nyiza tsekya awunlaxle hünzom ku füi tomle ahamüi, chemthüikoxle hünzom ma ile chang ang asule tüile.

⁵Zan to lütdaokyabu ang ija lailaile nyi tsekya awunle koxüi, ilaxle khüzün Laipex angkya hwom mün otuechu münamüt. Apa thüntho ma tamchu kaxtaimixbu pomtho ma hwom a ku kux changpu le kue ngaile akaxüi.

⁶“Na zaikyabue, chasae müimüithombu füi chemle akaxpuix ija to apalax!

⁷“Filadelfia ma tüikya müimüithom ma kaxtaimix hato zalax: “Ija kaxho a tuita otsao, tamchu otsingtsing owa hex, chix tokhange hüikya changle. Dawid kux kapatja chix ma tüile; otue chixe ka dapüihex, owaechu ija hak ang müntho, ilaxle otue chixe haküihex ija owaechu dap ang müntho.

⁸Nange chem mokpuix kue awan ngole; nang ma zong hidaole wüi tüikya kue awan ngopu; nange ku hwon-nwot man to ilaxle ku to mongong tüile hüi. Owaechu hak ang chithokya nang thüntho ma kue tuita ka daple fadaoa.

⁹Apalax haxshix kux ang ngokya othombu, opange changjao chichang khato hwom Jehudi nok changpu le akaxpuix, hwom nguilaxle nang chitong ma akhux ang kue tsanüi. Hwom pangnue wüi kue nang to mongkünle le awanüi.

¹⁰Chemthüikoxle adu ang hünzome ku kaxtom otya ma thom, kuechu wüi chaxwannu angkya khunaknu pangnu hato chaxwannu ma hüiüi tüikya thwontsing sikngün chak tokya nang sünle thomüi.

¹¹Ku lwomle ngui ngole. Nang ma chem tüipuix ija sünle thomlax, ikoxle nang chak angkya tholünkya nang hingho owaechu pale münpao.

¹²Zan to anaokya mix kue ku zangshwom-hom ma thong tuita ang achangüi, ilaxle chixe ija otuechu danle müntoxüi. Kue chix ma ku Zang mün zaüi, ija a hozün Jerusalem changüi, oja ku Zang tokhange zangkangting tokya jukya changpuix. Chatlechu kue chix ma ku mün zaüi.

¹³“Na zaikyabue, chasae müimüithombu füi chemle akaxpuix ija to apalax!

¹⁴“Laodekia ma tüikya müimüithom angkya kaxtaimix hato zalax: “Ija kaxho a Zange zingkya pangnu li owang wangnui, mongong ma onyem üntoxle otsingtsing kaxkhi oja Amen hex, chix tokhange changle.

¹⁵Nange chem mokdaopuix kue awanle. Nang a okongchu münchang okhamchu münchangle kue awanpu. Nang a tututa ang changkoxle müise!

¹⁶Ikoxlechu nang lomlomla le, okong ning chichang okham ning chichang le tüikoxle, kue nang ku wikha angkya thuakle awütüi!

¹⁷Nange thüile, ‘Ku hakpa changle ilaxle müile ngopu; kue alomlom ku ma komle tüipu.’ Ikoxchu nang chemtukux tuitai le tamchu chingcha ashukle tüipuix nange chiawan! Nang a zasa, ohua tamchu miksut mix changle.

¹⁸Idaile ahak-aluale tüi angkya hanpakma nange ku angkya hun, huntsaotsao shaklax le kue anopu. Nang thünzak hia ohua ma ngokya to chwop ang nyi tsekyachu shaklax. Nange ngün angkya kuxma nang mik to pa ang hinghaichu shaklax.

¹⁹Kue akünkün pangto wüi kue sapu üntoxle sikangünpu. Idaile nang mongtsulax üntoxle ochaxbu tokya mong chatlax.

²⁰Apalax! Kue fülom ma ajong laxle kahak to hongpu; owawae ku kaxzing atatlaxle ka daple jangfa thüiba, ku chix hom to noplaxle chix füi tomle fongsaxüi, üntoxle chixe ku füi tomle fong saxüi.

²¹Zan to anaolaxle ku chemle chongwang tüntong ma Apa tsaxchi ma ngopuix ilailaile zan to lütkyabu ku tsaxchi ma ngo ang tomüi.

²²“Na zaikyabue, chasae müimüithombu füi chem akaxpuix ija to apalax!”