Read Wancho Naga Rut 4 Bible Online

Rut 4 - Wancho Naga bible

Rut 4

¹Boaz a nguazua nui tingnu pan to lai ilaxle ima thung. Ifüima Elimelek zongto süsoxkya mamix, owa mo Boaz-e wünle akax daopuix, chix ngui, ilaxle Boaz-e chix sele thüi: “Tüita-naopa oman, ikhama thunghüi.” Idaile chix hüi ilaxle ikhama thung.

²Ifüima Boaz-e tingnu angkya lompa hwom mixsün bün selaxle ikhama thung ang tom. Hwom thungle tüipongma,

³chixe ma füikya homkha khünak ang thüi: “Athax Naomi a Moab tokya chatle tüipu, she-e kem haxnu homsa ang ngokya Elimelek kux haxtok hangse tsukya changa,

⁴ilaxle kue thütpu nange ija awan koxwüi müi angkya changpu. Ikoxle athax, nange ija tüise jangtsu, ikhama thungle tüikya khünakbu mikngün ma ija shaklax. Ikoxlechu nange ija shakle tüise chitsu, ngaile falax, chemthüikoxle ija shakle tüi angkya süntswon a nang füifüima ku hato nguile tüile.” Ija mixsüne lan: “Kue ija shakle tüiüi.”

⁵Boaz-e thüi: “Müihule, nange Naomi angkya haxtok shakle jangchang thüiningle Moab nok zomnucha Rut chuwüi shakle tüikya ang changpu, ikoxtix ija haxtok ziünkya khünakbu mün ma ngo ang tsuaküi.”

⁶Ija khünake lan: “Ile chang angkya jangchang thüiningle hax shak angkya ku süntswon kue münlax ngo, büthüikoxle ija a kusa hwome kopüi münchang changa. Ija nange wüi shakle koplax; kue hexle münshak ngohom.”

⁷Hepongma, tütali hangjokya hia alex-ataile changkya zangwün, hangkya mixe ma chisox sukle shakkya mix ang koxkya ma tsuakkya ang laxle shukya wanlom changkya. Iningle changkya makhange Israel khünakbu zongto ija zangwün tsaitsuak-kaxtsuakkya ang lax.

⁸Idaile chemtue ija mixsüne Boaz ang: “Ija nange wüi shakle”, le thüikya zuma, chixe ma chisox suk ilaxle ija Boaz ang kox.

⁹Ifüima Boaz-e ikhama tüikya lompabu hia mama khünakbu ang thüi: “Anyix kue Elimelek hia sasün nyi Chilion hia Mahlon hwom tingtok pangwüi Naomi ma shakle laxdaoa lükya ngün mixbu a hünzom changpu.

¹⁰Ibibi to bole, Moab cha Rut, Mahlon-e dantoxkya zomnucha, ku kakonu ang achangpu. Ija makhange tingtok ibu ziünkya khünakbu mün ma thomüi, ilaxle chix haxjen homjen, hwom khünak khama tamchu hwom tingnok ma otya ma thomüi. Ija bama anyix ngünmixbu a hünzom changpu.”

¹¹Ikhama tüikya lompabu hia khünak mamabue thüi: “Changle, ngünmixbu kwom changpu. Nang kakonu wüi, Jakop ang sasün hwom huanuma pux-paile koxkya Rachel hia Liah nyi ningle JOWANPAe wüi naxachang kox. Efrath saxthom ma tamchu Bethlehem ma nang ahak-aluale naxtüi.

¹²JOWANPAe ija mixcha makhange pux-paile chang ang tomkya naosom hwom makhange nang homkha a, Judah hia Tamar nyi sasün Perez homkha ningle naxachang kox.”

¹³Ikhoma Boaz-e Rut a chix kakonu ang laxle hom to apüi. JOWANPAe she to mohiman. She ma nao nguidongle sasün tuita pux.

¹⁴Shekobue Naomi ang thüi: “JOWANPA achuak kox! Nang to humele chang angkya hanpakma anyix chixe nang ang susün tuita koxdaoa. Ija naosa Israel ma zaxzangle naxchang!

¹⁵Nang nomchae nang to tüle mongkünle. She-e nang hanpakma sasün anüte mokse to kaile mokle fadaoa. Ilaxle athax a she-e nang ang susün tuita koxdaoa. Ija naoe nang ang azünle tamtsong angkya tsün apüile koxle ilaxle azule shonai füima chemle changüile nang khosam angkya ojao müntüi.”

¹⁶Naomi-e ija nao lax ilaxle she füi anamle kün ilaxle chix to akox-akomle hume.

¹⁷Tomzi angkya shekobue nao ang Obed le mün kox. Hwome pangnusa hama wün: “Naomi ang sasün tuita puxdaoa!” Jesse a chix sasün ilaxle Dawid a chix susün changkya.

¹⁸Ija a Perez makhange Dawid alople pusu-pasa hwom: Perez, Hezron, Ram, Aminadab, Nahshon, Salmon, Boaz, Obed, Jesse, Dawid.