Read Wancho Naga 1 Samuel 11 Bible Online

1 Samuel 11 - Wancho Naga bible

1 Samuel 11

¹Lyetjang tukux homkya füima Amon nok wanghompa Nahash chix süpahibu koplaxle nguile Gilid angkya Jabesh tingnu akhople kop. Jabesh angkya khünakbue Nahash ang thüi: “Kwom füi nokmüi hax, kwome nang kwom wanghompa ang pongle kopüi.”

²Nahash-e lan: “Kue hünzom füi nokmüi angkya, kaxfün tuita füitix müiüi. Kue hünzom pangwüi ang tsaxchi mik lokle awütüi ilaxle Israel nok hato nuzao apüiüi.”

³Jabesh angkya lompabue thüi: “Kwome Israel nok pangnusa hato ija kaxho apuk angkya hanpak nyix-anüt fahüi. Owawae ngaxchu kwom to asunle fa angkya mix chitüi, kwome kwom a nang chak to danüi.”

⁴Ija kaxho koplaxle paokya khünakbu Sol ngokya nok Gibeah to ngui. Chemtue kaxhomixbue ija kaxho fapuix, khünaknu ang mongmaxle sop.

⁵Sol a chix maihu füi athax ile hanbai ngokya nguitan, ilaxle chixe atüi: “Chemthüipu? Khünak pangwüi büthüikoxle azing-zingsople changpu?” Jabesh tokya kaxhomixbue akaxkya kax hwome chix hama wünle kox.

⁶Chemtue Sol-e ija kax atale laxpuix, JOWANPA Chasae chix to kop ilaxle chix mongto wünchua laile mongtsik dong.

⁷Chixe maihunu anyi lax ilaxle müithom-müithom ang texle akhix ilaxle ija müi pailaxle kaxhomixbu ija kaxkhün kaxho füi aham ang tom: “Sol hia Samuel hokhi füito zan to chikale owa ngolaxüihex, chix maihubu tochu ija lailaile hwonüi!” Chixe chemle wüi moktüi le Israel khünaknu JOWANPA thua za ilaxle hwom pangwüi laile müitom tuita ang asox.

⁸Sol-e hwom Bezek ma sele asox: ikhama Israel khünakbu 300, 000 tüikya ilaxle 30, 000 Judah angkyabu tüikya.

⁹Hwome Jabesh angkya kaxhomixbu ang thüi: “Hünzom khünakbu ang ngainyix tsomthoe wüi hwome khosün ataküile thüilax.” Ija noke Jabesh tokya ija kaxho kopkya zuma noknusa ang wüi mongmüi

¹⁰ilaxle Nahash ang thüi: “Ngainyix kwome kwom nang chak to danüi, ilaxle hünzome kwom to chemle hwonse tsupuix ile hwonlax.”

¹¹Ija ja Sol-e chix khünakbu othom azom ma ahan, ilaxle zangngai füi tomle hwome zanpom single Amon nok to lüt. Tsomtho towüi hwome ibu langle tsuak. Lang ang chikopkyabu hwom paopao to paole sam.

¹²Ijama Israel noke Sol ang thüi: “Sol wanghom ang taxlaxhaxle thüikyabu omaünpuix? Ibu kwom chak to danhüi, kwome hwom langle awüt ang!”

¹³Ikoxlechu Sol-e thüi: “Anyix owachu mik max ang chitomüi, chemthüikoxle anyix a JOWANPAe Israel nok khosünkya nyix changle.”

¹⁴Ilaxle Samuel-e hwom ang thüi: “Kem pangwüi Gilgal to paohax ilaxle tamchatlechu Sol a wanghom changpule apuk-hax.”

¹⁵Ikhoma hwom pangwüi Gilgal to pao, ilaxle ikhato otsao nui ma hwome Sol a wanghom changpule apuk. Hwome notom-tusüi tö kox, ilaxle Sol hia Israel khünakbue ija chialak angkya bama pongwünle pangpwon sax.