Read Wancho Naga 1 Samuel 15 Bible Online

1 Samuel 15 - Wancho Naga bible

1 Samuel 15

¹Samuel-e Sol ang thüi: “Nang Israel nok wanghompa ang münga füi lile kam angkya hanpakma JOWANPAe ahüikya a ku changpu. Athaxpi Khüthak Zang-e chemle akaxpuix ija kax ma laxle tüilax.

²Amipongma Israel khünak Ijip nok tokya nguile ngopongma, hwom hopu-hopa hwome Israel nok le ang chitomle abaxkya khoma chixe Amalek nok to sikngün kox angkya changle.

³Paokox ilaxle Amalek nok tingtakkya ningle tingtakle hwom ma atüitüi pangwüi langdao; mixnu-naosa, sheko-lüka tamchu naosa le chemchu chisüile langdao; tsom-pom: maihu, chun, ut hia mantsak, ibu pangwüi langdao.”

⁴Sol-e chix süpahibu pangwüi sele asox ilaxle Telem ma khünak huak akiak; ikoxle Israel angkya 200, 000 ilaxle Judah angkya 10, 000 le süpahibu tüikya.

⁵Ifüima chix üntoxle chix khünakbu Amalek nok tingnu to ngui ilaxle shuakax ma hwome ziakople zan tan.

⁶Hwompu-hwompa hwom Ijip nok tokya nguipongma hwom to chingcha ahokya Ken nok hato chixe kaxkhün koxle kaxho: “Amalekbu dantoxlaxle hünzom paoün chichang thüiba hwom füi tomle kue hünzom chuwüi langüi tüile.” Ikhoma Ken nok pangwüi pao.

⁷Sol-e Amalek nok to lüt; hwom Ijip nok zongma handünchi kao Hawilah makhange Shur alople azan;

⁸chixe Amalek wanghompa Agag ozün ma kop ilaxle khünaknu pangwüi lang.

⁹Ikoxle Sol sasün nyie Agag a chilang ilaxle amüimüi chun hia maihu, maihu hosa hia chun hosa ibu chichangba tütalichu amüimüi chilang-chihuak; hwome mwot to chihüi angkyakya lang.

¹⁰JOWANPAe Samuel ang thüi:

¹¹“Kue Sol wanghom ang kamle koplaxle ku ang mong münmüi; chixe ku hato tok aho üntoxle ku kaxtombu kax ma münlax.” Samuel ang mongtsik ilaxle zang angaile JOWANPA ma chingcha ju.

¹²Ofüinop swomsae wüi chix Sol füi apong ang pao. Sol a chixe ma hanpak ang alüile chapa tuita zinglaxle thomkya Karmel tingnu hia Gilgal tingnu to paoün-atale atat.

¹³Samuel Sol hato ngui. Sol-e chix shwomle thüi: “Samuel, JOWANPAe nang to mohiman hüi! Kue JOWANPA kax ma laxle tüidaoa.”

¹⁴Samuel-e atüi: “Jangchang thüiba kue maihu ngaokya hia chunbu ngaokya zing chemkha tokya atat ang koppu?”

¹⁵Sol-e lan: “Ku khünakbue Amalek nok tuina kople changputa. JOWANPA kem Zang tö kox angkya hanpakma maihu hia chunbu hwome amüimüi süile tüile, ikoxle mamabu a bakle thom-jo toxdaoa.”

¹⁶Samuel-e sale thüi: “Dangün; JOWANPAe awün ku füi chemle akaxpuix ija wünfang.” Sol-e lan: “Ija ku hama wünhüi.”

¹⁷Samuel-e thüi: “Nange nang owachu chichangkhato le thüt koxle nang a Israel nok lompa tuita changle. JOWANPAe nang Israel nok wanghom ang münga füi lile kamle laxkya mix,

¹⁸ilaxle chixe kax ma chilaxle tüikya ibu Amalek nok komkaile amüt angkya kaxtom koxlaxle chixe nang tsanle apaopu. Chixe nang ang hwom bakle ma-amüt ma-amütle azan angkya kaxtom koxle changpu.

¹⁹Jangchangba, nange chix kax ma büthüikoxle chilax? Büthüikoxle nange tingtak pongma kopkya tuina kop ang ziklaxle JOWANPA ang mong amapu?”

²⁰Sol-e lan: “Kue JOWANPA kax ma laxpu. Chixe ku füi akaxkya lailaile ku zan to kapu. Wanghompa Agag ozün ma apüipu ilaxle Amalek nok pangwüi langpu.

²¹Ikoxle ku khünakbue, hwome kopkya kha angkya, chun hia maihu amüimüi chilangle ozün ma Zang ang tö kox angkya hanpakma apüile tüile.”

²²Samuel-e lan: “JOWANPA zongto opupu sümüi: Kax ma laxkya sümüiüi hia tö koxkya wüi sümüiüi? Chun sümüimüi füi tö koxle changkya füi chix kax ma laxle changkya wüi sümüikya changpu.

²³Chix zongto chichangle tüikya a tuita chajik-muashem mwot thatha ma amakya changpu, ilaxle ija a kaxma ma alanle chapa to shwomle changkya tukuxkya oma mwot changpu. Nange JOWANPA kaxtom kax ma chilaxle tekya khoma chixe nang a wanghom ang chilaxle awütdaoa.”

²⁴Sol-e lan: “Changle, kue ochax lyenle changdaoa. Kue JOWANPA kaxtom hia nange adangle fakya kax ma chilaxle tüidaoa. Ku a, ku khünaknu thua zalaxle hwome chemle thüipuix ile mokle ledaokoxa.

²⁵Ikoxlechu athax kue nang ma chingcha jupu, ku ang thailak tüihüi ilaxle kue JOWANPA ang tö koxtsuak angkya kux ma ku füi tomle chat-hax.”

²⁶Samuel-e lan: “Ku a nang füito pao ang müntsuak. Nange JOWANPA kaxtom ahaile changkya khoma chixe nang a Israel nok wanghompa ang chilaxle awütdaoa.”

²⁷Ifüima Samuel a pao ang lai, ikoxle Sol-e azuile ziklaxle chix nyitua ma bele ija akyet.

²⁸Samuel-e chix ang thüi: “JOWANPAe anyix nang chak angkya Israel nok wangting akyetle changdaoa ilaxle ija wangting a nang füi sümüikya khünak owawa chak to koxle changdaoa.

²⁹Tüle zaxzangle tüikya Israel nok Zang-e otuechu atsele münchang chichangba chix mong ajo-ajele münchang. Chix a khünak münchang, chixe chix mong ajo-ajele münchangüi.”

³⁰Sol-e lan: “Kue ochax lyendaoa. Ikoxlechu Israel nok lompabu hia khünaknu tuntho to ku to e-sele chang koxle müise. Ku füi tomle chat-hax ilaxle ku ang JOWANPA nang Zang to shwomtole chang ang koxhüi.”

³¹Ikhoma Samuel chix füi tomle chat ilaxle Sol-e JOWANPA to shwomtole chang.

³²Samuel-e kaxkoxle thüi: “Wanghompa Agag ikhato ku hato apüihüi.” Wanghompa Agag a, chix mik max angkya ajang laxle, zale abün-ngale thüi: “Zi angkya a chemtukuxkya khaxza wünlokle changpuix!”

³³Samuel-e thüi: “Nang changlo khokho ma anyix shekobu su-sa chilax homtoxle huanuma ngole tüile, ija lailaile athaxpi hünnuchu masa chilax homtoxle mixcha tuita ang danle toxüi.” Ilaxle chixe Agag a tö-tsap tuntho ma Gilgal ma texle akhix.

³⁴Ifüima Samuel a Ramah to chat, ilaxle wanghompa Sol a ma hom Gibeah to chat.

³⁵Samuel ozün ma ngokya kople chixe wanghompa Sol sün chatle tam chingün; ikoxlechu chix hanpakma chix tüle sop. Israel ma wanghompa ang Sol kamle kopkya khoma JOWANPA ang huanuma mongma.