Read Wancho Naga 1 Samuel 22 Bible Online

1 Samuel 22 - Wancho Naga bible

1 Samuel 22

¹Dawid a Gath tingnu angkya lai ilaxle Adulam tingnu zui angkya longlua to pao. Hotüi hwome tamchu hwom haxnu-homsabue chix ikhato tüikya zing atatlaxle, hwom chix hato ngui.

²Mix fang to ngokya hia thashe füikya tamchu otuechu mongzom chimüi toxkya khünakbu chix hato ngui, pangnu athüt koxle hwom ho-ali khünak, ilaxle chix a hwom lompa ang achang.

³Ikha angkya Dawid Moab angkya Mizpah to pao ilaxle Moab nok wanghom ang thüi: “JOWANPAe ku hanpakma chem mok angkya hex ija matsing tanto ku anu hia apa hwom chingchalaxle nang hato nguile ngo ang laxkox.”

⁴Ikhoma Dawid-e honu-hopa hwom Moab nok wanghompa hama danle tox, ilaxle Dawid longkun to azwonle ngokya tuktuk ma hwom ikhato to ngo.

⁵Ifüima ajepa Gad Dawid hato ngui ilaxle thüi: “Ikhama taxngo; athaxthax wüi Judah haxtok to paolax.” Ikhoma Dawid-e ikha danle tox ilaxle Hereth faonu to ngui.

⁶Nyixta Sol a Gibeah ma haxhua angkya tamarik pün khung ma thungle tüikya. Chix chak ma pax koplaxle tüikya ilaxle chix nguakax-wangkhobue chix akankhople tüikya. Dawid hia chix khünakbu atakkya kaxwün chix hato wang.

⁷Chixe chix nguakax-wangkhobu ang thüi: “Benjamin khünaknu apalax! Dawid-e hünzom ang haxtok hia grep haxtok koxüi ilaxle hünzom a chixe ma nguakax-wangkhobu ang achangüihexle hünzome thütpia?

⁸Ikhokhoma hünzom ku zan to kapuix nyi? Hünzom opupue ngaxchu Dawid füi kusa zuikhui ang ngokya owaechu ku hama wünle chifa. Hünzom opupue ngaxchu ku tuitexle changkya mix chitüi chichangba Dawid a tuita ku mamixe, ku lang angkya hanpakma ipongkhae oshua lomle ngokya tamchu ile chang angkya bama kusae chix ang zong adünle ngokya ku hama wünle chifa!”

⁹Doeg a ikhama Sol nguakax-wangkhobu füi tomle ajongle tüikya; ilaxle chixe thüi: “Chix, Ahitub sasün Ahimelek hato Nob to nguipongma Dawid kue ngünle laxdaoa.

¹⁰Ahimelek-e JOWANPA ma Dawid-e chem mok angkya hex ija bama kaxtik-ngaoshole chang, ilaxle chixe Dawid ang süt hidaole kox ilaxle Goliath nok changlo koxle apaodaoa.”

¹¹Ikhoma Sol-e nguapa Ahimelek hia chix homkha pangwüi se ang apao. Hwom a Nob hanpakma chu zompu-zangpabu changkya, ilaxle hwom a chix hato ngui.

¹²Sol-e Ahimelek ang thüi: “Apakoplax, Ahimelek!” Chixe lan: “Ku nang dapa jao.”

¹³Sol-e chix ma atüi: “Dawid hünkhie ku büthüikoxle tung ngo? Nange ku ang süt kox, changlo kox ilaxlechu chix bama JOWANPA ma tsaitik-kaxsho, ile büthüikoxle hwonpu? Athaxpi chix a ku zongto zanpa ang achangdaoa ilaxle ku mik amüt angkya oshua to hule ngole!”

¹⁴Ahimelek-e lan: “Nang ma tüikya nguakax-wangkhobu khama mongong tüikya füi mokkya nguakax-wangkho tuita a Dawid changle! Chix a nang nomsün jaojao, nang nyetmixbu khama lompa ilaxle wanghom khwa ma noknusa chazale achuakkya khünak tuita.

¹⁵Changle, kue chix hanpakma Zang füi kaxtik-ngaoshole changpu, ilaxle ijatix pongwang lükya chichang. Nang to tungle ngokya bama, wanghompa, nange ku to tamchu kwom homkha khünak owatochu tsaitox-kaxfekya taxtüi. Kue ija bama chemli-chemli münawan!”

¹⁶Wanghompa-e thüi: “Ahimelek, nang tamchu hünzom homkha pangwüi mik max angkya changle.”

¹⁷Ifüima chixe chix zui ma ajongle tüikya nyetmix tuita ang thüi: “JOWANPA zompu-zangpabu lang kox! Hwome Dawid ang paole azang angkya olom apuale mongkho adün laxle chix paole azang ang tomkya, hwome thoto wüi awanle ngokya kax ku hama münwün.” Ikoxlechu JOWANPA zompu-zangpabu to chak ajole münchangpu le chix nyetmixbue ija kax ma chilax.

¹⁸Ikhoma Sol-e Doeg ang thüi: “Ibu a nange langdao!” Ikhoma Doeg-e hwom pangwüi lang. Ija nyix chixe otsao Suakwex-nyi thole changdaokya zompu-zangpabu hwom 85 khünak lang.

¹⁹Zompu-zangpabu ngokya tingnu Nob ma tüikya khünak pangwüi langle awüt angkya wanghompa-e kaxtom kox. Sheko-lüka, mixnu-naosa; tsom-pom ibu pangwüi langle awüt.

²⁰Ikoxle Abiathar, tuita Ahimelek sasün a paole azang, ilaxle Dawid füito nam.

²¹JOWANPA zompu-zangpabu chemle langle awütpuix pangwüi chixe Dawid hama wünle kox.

²²Dawid-e chix ang thüi: “Ija nyix Doeg ngünpongma wüi chixe Sol hama wün angkya jao changle le anakya jao. Ikhoma hünzom homkha mik max angkya atakkya bama, ku hünlit changle.

²³Ku füi ngolax ilaxle ojao taxza. Sol-e künyi pangnyi langse tsupu, ikoxlechu nang ikhato ku füi khosünle ngo ang kopüi.”