Read Wancho Naga 1 Samuel 28 Bible Online

1 Samuel 28 - Wancho Naga bible

1 Samuel 28

¹Janta aba füima Filistia noke Israel nok füi azan ang ka ang süpahibu sele asox, ilaxle Akish-e Dawid ang thüi: “Nang üntoxle nang khünakbu kuchima sele azan angkya zangwün tikün.”

²Dawid-e lan: “Changlea, ku a nang dapa jao, idaile kue nang hanpakma chemtukux moktsuaküihex ija ngünlax ang khato.” Akish-e lan: “Müihule! Kue nang a othuithui hanpak ang ku nyetmix ang zingüi.”

³Athax Samuel nang zidao, ilaxle Israel khünaknu pangwüi chix mangtsa ilaxle chix tingsho Ramah ma akhün. Sol-e mowan-mixbu hia osho-wanmixbu pangwüi Israel haxtok toxlaxle pao angkya kax kox.

⁴Filistia nok süpahibu a asoxlaxle Shunem zui ma pom zaile athong; Sol a Israel khünaknu sele asoxlaxle Gilbua Haxnu ma pomzaile athong.

⁵Chemtue Sol-e Filistia nok süpahibu ngünle laxpuix, chix tüle abün-aban,

⁶ikhoma chixe chemle thüiüile JOWANPA ma tsaitik-kaxshole chang. Ikoxlechu chix zangwün to JOWANPAe chemle chu chilan, wünmang chitochu chiaho, chichangba o-nan machu chidong chichangba ajebu makhangechu chiaho.

⁷Ifüima Sol-e chix nguakax-wangkhobu ang kaxkoxle thüi: “Lumjunu tüikya lomle atak-hüi, ku she hato nguilaxle she ma tsaitik-kaxshole ano ang.” Hwome lan: “Endor ma tuita tütüile.”

⁸Ikhoma Sol atsingle mix ang achang, zapua mama laxlaxle zangnak füima chix khünak anyi koplaxle ija mixchanu füi apong ang pao. Chixe she ang thüi: “Ku hanpakma chempangle changüihexle chamua füi tikshole anohu. Ku mün nyakle apuakya khünak chasa nyakle anohu.”

⁹Ija mixchanue lan: “Wanghompa Sol-e mowan-mixbu hia lumju mixbu Israel haxtok toxlaxle pao angkya kax koxkya nange awan ngopu, jangchangba ku mik naxmax ang ile chemkhoma tsünpu?”

¹⁰Ipongma Sol-e tsaosaxle thüi: “Kue ozün ma tüikya JOWANPA mün ma tsaosaxpu, nange ija mokkya khomale nang mik max ang müntom.”

¹¹Mixchanue atüi: “Kue nang hanpakma owa nyaküi?” Sol-e lan: “Samuel.”

¹²Chemtue ija mixchae Samuel ngünle laxpuix, she zale abün ilaxle Sol ang thüi: “Nange ku chemkhoma dyenpu? Nang nang wanghompa Sol changtüingün!”

¹³Wanghompa-e she ang thüi: “Nang taxza. Nange mix chempangle ngünpu?” She-e lan: “Chaxwannu angkya chasa tuita laile hüikya kue ngünle.”

¹⁴Chixe atüi: “Ija a chemningle tüi?” She-e lan: “Ija a azupa tuita laikya changle. Chix a nyinu tuita awunlaxle tüile.” Ijama Sol-e ija a Samuel wüi changüile tsingle lax, ilaxle chix chathua zakya ahole Sol hax to akhux.

¹⁵Samuel-e Sol ang thüi: “Nange ku ting büthüikoxle atüi? Nange ku büthüikoxle tamchat ang tompu?” Sol-e lan: “Ku a müimamakya khosam ma tüile! Filistia nok ku füi azan ang achwonle tüile, ilaxle ku a JOWANPAe dantoxdaoa. Athaxpi chixe kutsai-kukax to chemle chu münlan, ajebu makhange ngaxchu kaxhole münchang, wünmang chitochu münaho. Ikhokhoma kue nang sepu, idaile kue chemle mokse dai ija nange wüi apuale fahüi.”

¹⁶Samuel-e lan: “JOWANPAe nang dantoxlaxle zanpa ang achangle pao füima nange ku omalax ang se ngo?

¹⁷JOWANPAe nang to ku makhange chemle akax daolaxpuix ile mokpu. Chixe nang chak angkya wangting paolaxle Dawid chak to koxdaoa.

¹⁸Nange JOWANPA kaxtom ma chilax ikhoma nange Amalek nok, hwom tuinabu füi tomle komkaile chiamüt. Ikhoma JOWANPAe nang to athax ija hwonpu.

¹⁹Chixe nang tamchu Israel nok a Filistia nok chak to koxüi. Ngainyix hünsa hünkhi pangnyi ku füi womüi ilaxle JOWANPAe Israel nok süpahibu a Filistia nok chak to koxüi.”

²⁰Ija Samuel zangwün atatlaxle chabüt-lasünle changkyae tinthuile hax to nguak. Nyixta jata chemchu chisax chilingle woknuak maxkya tokhange chix a huanuma zongshole max.

²¹Ija mixchanu chix hato hüilaxle hukoxle chix a huanuma zale abüt-abankya ngün, ikhoma she-e chix ang thüi: “Alixachong nange akaxkya kax ningle mok ang kue ku tsün koxle mokpu.

²²Athaxpi kue akaxkya ningle nangechu tam mok-hüi. Kue nang hanpak ang sax mokthün ang. Nange ija sax angkya wüi changle ikoxle tix nange aham angkya janzüi kopüi.”

²³Sol-e thüi: “Kue chemchu münsax münling, idaile sütling to taxhu-taxme ngo.” Ikoxle chix nguakax-wangkhobue chix ang saxkox wüi müi angkya le atsang. Oshukma chixe hwom kax ma lax ilaxle haxkha angkya ajongle lyading to dongle thung.

²⁴Ija mixchae nonokhaile she-e tuxle anut thomkya chun hosa tuita langlaxle huak. Ifüima she-e an hidaole lax, ija ako, ilaxle twonkhax chiawon homtoxle an hidaole zing.

²⁵She-e Sol hia nguakax-wangkhobu tunthoma fong fexle alaikox, ilaxle hwome ija sax. Ilaxle ija jaja wüi hwom chatle chat.