Read Wancho Naga 1 Samuel 30 Bible Online

1 Samuel 30 - Wancho Naga bible

1 Samuel 30

¹Nyix azom füi Dawid hia chix khünakbue Ziklag alop. Amalek noke shuathongchi Judah tingtakle tsuaklaxle Ziklag to sing. Ibue ija tinglong zokle ashun.

²Hwome shekobu pangwüi kop; hwome ibu a tuita chu chilang ikoxle ibu pangwüi tsuile koplaxle chat.

³Chemtue Dawid hia chix khünakbu chatle ikha aloppuix, hwom thoma tinglong pangwüi zokle ashunle amüt toxlaxle hwom kakonubu hia naosombu pangwüi tsui paobang.

⁴Dawid hia chix khünakbu sopkya na lütix zakle shu.

⁵Dawid kakonu Ahinoam hia Abigail nyi ngaxchu kople paobang.

⁶Dawid hato müimamakya mongthang hüi chemthüikoxle chix khünakbu hwom sa-nu hwom bakle amütkya khoma Dawid füi mongtsik mongmale chang. Hwome chix to long füi thup ang aza-ana; ikoxlechu JOWANPA chix Zang-e chix ang chachen-mongchen kox.

⁷Dawid-e nguapa Abiathar, Ahimelek sasün ang thüi: “Ku hato Suakwex-nyi apüihüi.” Abiathar-e ija nyi chix hato apüile kox.

⁸Dawid-e JOWANPA ma atüi: “Ku ibu zan-nokbu füito azuile ziklaxle hwom kople apüiüi hia chemle changüi?” JOWANPAe lan: “Hwom füito zikkox. Nange hwom ha alopüi ilaxle kople paokyabu sünle tüi ang thoüi.”

⁹Ikhoma Dawid hia chix khünak 600 pangwüi achex. Hwome Besor shuasa alopkya zuma züizüi ikhama zak ang tom.

¹⁰Dawid a 400 khünak koplaxle chizakle ibu achuale zik. Ibu 200 khünak a shuasa tale le ang ngaxchu zong chitüile ashole maxkya khoma ikhato dantox.

¹¹Dawid füito tüikya khünakbue panfang to Ijip nok naosa tuita atak. Ija naosa a Dawid hato apüi. Hwome ija naosa ang sütling hia tija,

¹²fupsa ziak akokya hia grep ziak otswon anyi koxle asüt. Chixe ibu saxle tsuakkya füima, chix chatle tsaktsa dongle azang. Ija naosae nyix azom mong ma chemchu sax-lingle machangkya.

¹³Dawid-e chix ma atüi: “Nang hopupa a owahex? Nang a ojong nok tokyahex?” Ija naosae lan: “Ku a Ijip nok ikoxle Amalek nok da ang ngole hüikya mix changle. Ku a kakle maxkya khoma ku hopupae anyix ele nyix azom thoto wüi awütle toxkya changle.

¹⁴Kwome Kereth nok shuathongchi Judah haxsüt hia Kaleb saxthom haxsüt pangwüi tsui laxle kwome Ziklag zokle ashun toxdaoa.”

¹⁵Dawid-e atüi: “Nange ku ibu zan-nokbu hato apüifa ang chami?” Ija naosae lan: “Nange JOWANPA mün ma ku münlangpu tamchu tamchatle ku hopupa chak to koxle münchangpule jangtsao kue apüikoxüi.”

¹⁶Ilaxle chixe Dawid a ibu zan-nokbu hato apüi. Zan-nokbu a saxsax-julingle, Filistia hia Judah nok angkya hwome tsui kopkya mwot-kat huanuma tüikya bama mongmüi atungle ikhakha awangle puashole ngole tüikya.

¹⁷Ngainop ningle swomsae Dawid-e hwom to sing ilaxle hwom füi hanhomma thule azan. Hwom 400 naosün ut khoma ngalaxle paole azangkyabu boma owachu azang ang chikop.

¹⁸Amalek noke tsui paokya khünakbu hia tuinabu pangwüi, Dawid kakonu chuwüi sünle kop.

¹⁹Amalek noke tsui paokya khünak hia tuina oli tuita chiamütle Dawid-e pangwüi chatle kop.

²⁰Chixe chix chun hia müi ozyem pangwüi chatle kop; chix khünakbue ibu tuina hia tsom-pom pangwüi hwom tunthoma shwomlaxtoxle chat. Hwome thüi: “Ija a Dawid kux changle!”

²¹Ifüima Dawid a chix khünakbu hwom 200, Besor shua ta ang chitho laxle dantoxkyabu hato chat. Hwom Dawid hia mama hozuibu chatkya pongto zikle apong. Dawid hwom hato ngui ilaxle mongmüi salam kox.

²²Ikoxlechu Dawid füi tomle kakyabu khama züizüi laxli chitüikya khünakbue thüi: “Hwom kem füi tomle zan to chikakya daile keme kopkya tuina hwom ang chemchu chikoxüi. Hwome ma sa-nu hwom laxlaxle chat ang tsuak.”

²³Ikoxlechu Dawid-e lan: “Kutüi kunao hwom, JOWANPAe kem ang koxpu, ikha angkya to hünzome ile mok angkya oli münchang! Chixe kem khosünpu ilaxle zanpabu to lüt ang tompu.

²⁴Hünzom zangwün to changle le owaechu münthüipu. Kem pangnusae tomwüi-tomwüi ahanle lax angkya changpu. Tokfüichi makhange süt kox ang opange fongle hüidaopuix, hwome chuwüi zan to kale changkyabu füi tomwüi kop angkya oli changle.”

²⁵Dawid-e ija tuita wanlom ang zing, ilaxle anyix kople Israel noke ija twonle wüi hüile.

²⁶Chemtue Dawid a Ziklag to chatle changpuix, chixe kopkya tuina ahanlaxle Judah nok angkya lompa chix zuikhuibu hato ija kaxho füi khünak akat: “JOWANPA zongto zanpabu ang ngokyabu chak tokya kwome pale kopkya tuina ibu a hünzom ang tuita hingho ningle ibu akatpu.”

²⁷Chixe ija Bethel nok hato, shuathongchi Judah angkya Ramah nok hato, ilaxle Juttir tingnu,

²⁸Aroar, Sifmoth, Eshtemoa,

²⁹ilaxle Rakal, ibu tingnu angkya khünaknu hato, Jerahmel saxthom hato, Kin nok hato,

³⁰ilaxle Hormah, Borashan, Athak

³¹ilaxle Hebron, ibu tingnu angkya khünakbu hato fiksele afanle kox. Chixe chix ilaxle chix khünaknu faole samle ahamle hüikya haxtok pangkha towüi afanle kox.