Read Wancho Naga 1 Samuel 31 Bible Online

1 Samuel 31 - Wancho Naga bible

1 Samuel 31

¹Gilbua Haxnu ma Filistia nok Israel nok füi azan. Ikhama Israel nok huanuma lang. Lang ang chikopkya mamabu, wanghom Sol hia sasün hokhi ngaxchu wüi zikle paole azang.

²Ikoxlechu Filistia noke hwom achuale koplaxle Sol sasün Jonathan, Abinadab hia Malkishua hwom azom pangwüi lang.

³Sol akhople zan müimamale zongle azan, ilaxle chix jaojao to ngaxchu zan-nok sanhape asüt laxle müimamale maklax.

⁴Chixe chix chang-pax kople ahamkya naosün ang thüi: “Chudu Zang chilax homtoxle ngokya Filistia noke ku to chakmokle machangba, nang changlo syetlax ilaxle ku langlax.” Ikoxlechu ija mixsüne ile mok ang tüle chaza, ikhoma Sol-e chix changlo chixe wüi syetle lax ilaxle ija tun to chix alüile hukle zi.

⁵Ija naosüne Sol mik maxkya ngün, ilaxle chix chuwüi changlo syetle alailaxle Sol füi tomle hukle zi.

⁶Ile Sol sasün hwom azom ilaxle chix chang-pax kople ahamkya naosün hwom pangwüi zi; Sol zongto mamix pangwüi ija nyix zi.

⁷Jezril füi atale tüikya Israel nok ilaxle Jordan shuanu zongma handün chito tüikya Israel nokbue hwom süpahibu pao ma sütüna ilaxle Sol hia chix sasün hwom pangwüi langdaoale atat ang kopkya zuma, hwome ma tinglong danle tox ilaxle pao ma süt. Ifüima Filistia nokbu nguilaxle ibu hwople kop.

⁸Ile azankya ofüinyix Filistia nokbu a zim ama ang ka, ilaxle Sol hia chix sasün hwom azom mang Gilbua Haxhua ma atak.

⁹Hwome Sol khang düt, chix khyepdibu sukle lax ilaxle Filistia haxtok pangkha towüi hwom baozangbu hia khünaknu hato kaxho müikya apukle kaxhomixbu aham.

¹⁰Ifüima hwome chix chang-pax hwom baozang Astarte jop-hom ma dan, ilaxle chix mang a Bethshan pan ma adangle tak.

¹¹Gilid angkya Jabesh noke Filistia noke Sol mang to ile hwonkya atatle laxkya zuma,

¹²naomüi mong füikyakya khünak awünningle apüile Bethshan alop ang ka. Hwome pan ma adangle takle thomkya Sol hia chix sasün hwom mang ajo, ibu Jabesh to apüi, ilaxle ibu ikhato zok.

¹³Ifüima hwom zatuabu laxlaxle tinglong angkya tamarik pünnu tong ma hwom akhün, ilaxle nyix anüt atsaole nui.