Read Wancho Naga 1 Samuel 6 Bible Online

1 Samuel 6 - Wancho Naga bible

1 Samuel 6

¹JOWANPA Tsaotsüt Suak lyetjang anut Filistia haxtok to ngokya füima,

²khünaknue nguapa hia hingtwon mixbu nyakle thüi: “JOWANPA Tsaotsüt Suak füi kwome chemle hwonüi? Keme ija onui to jangachat thüikoxle a, ija füi tomle kwome chem koxle achatüi?”

³Hwome lan: “Hünzome Israel nok Zang Tsaotsüt Suak achatle jangchang, hünzome ma ochax hanpakma tö kox angkya hingho tütali füi achat angkya oli changle. Tsaotsüt Suak a hingho füi chichang homtoxle chiachatüi. Ija achatle tix hünzom kaklak müiüi tamchu chixe hünzom to büthüikoxle sikangünle changpuix, ija awan ang kopüi.”

⁴Khünaknue atüi: “Kwome chix ang chem ningkya hingho koxle apaoüi?” Hwome lan: “Hun füi zingkya haknüi laikya kak aga ilaxle jux aga, ibu a Filistia nok wanghom hwom aga hanpakma tuipong le laxkox. Hünzom hatochu chatle wanghom hwom hatochu ija kakli tuitata wüi ahüikya changle.

⁵Hünzom haxtok thomjole ngokya ija haknüi laikya kak hia juxsa mua hünzome zing angkya wüi changle, ilaxle ija füi hünzome Israel nok Zang achuak angkya changle. Ile changkox tix chixe hünzom to, hünzom baozangbu to tamchu hünzom haxtok to sikangünle ngokya zaküi.

⁶Hünzom Ijip nok wanghom hia Ijip nokbu ningle nakhwop chikexle taxtüi. Israel khünaknu pao ang danle machang tanto Zang-e hwom ongat ang laxle thomkya texle ataklax.

⁷Idaile maihue linkya zyen tuita tamchu hanbai dang azyemle machangkya maihunu anyi achwonlax, ibu maihu-kanlin ma adangle koxkox ilaxle hosabu a pungfang to jwonle achatkox.

⁸JOWANPA Tsaotsüt Suak apüilaxle ija maihu-kanlin ding ma dankox, ilaxle hünzome hünzom ochaxbu tsangthom ang chix hato hingho ang kox ang hun füi zingkya suak tuita ma sholaxle ija zui ma dankox. Müilin-zyen a ija lomkua ma chix lualua to pao ang dankox.

⁹Ilaxle ija paoüi chito azuile hulax; ija Bethshemesh tingnu chito jangle, kem hato za-adünkya thama adünkya a Israel nok Zang tokhange changpule keme awanle lax ang tsuaküi. Ikoxle ija ichikao to chile, ijama keme awanüi: kaklak ibu a chixe ahüikya münchang; ija a tuita wantui kak hüile asukya changpu.”

¹⁰Hwom hama anwot-anole changkya lailaile hwome mok: Hwome maihu hunu anyi laxlaxle ibu maihu-kanlin ma adangle kha ilaxle hosabu a pungfang to jwonle achatle tox.

¹¹Hwome Tsaotsüt Suak maihu-kanlin ma dan ifüima haknüi laikya kak hia juxsa mua zingkya hun chasa shokya suak ija zui ma dan.

¹²Maihunu nyi achexle Bethshemesh chito paole küithole ikhato ngui, nong-tsax to khekya lomkhe tojao chikhe. Ija müi nyi dang ma ahanle paopongma maihu ngaongale le. Filistia nok wanghom aga-e Bethshemesh longzipong alople jao azuile le.

¹³Bethshemesh noke wonglai sax züttukha asu. Hwome mikzaple hukoxle Tsaotsüt Suak ngünle lax. Ija ngün ang kopkya zuma hwom ang tüle mongmüi.

¹⁴Ija maihu-kanlin a Jihusua le amünkya khünak haxtok to ngui ilaxle ima zak. Jihusua a Bethshemesh nok tuita changkya. Khünaknue ija maihu-kanlin texle akhix, maihunu nyi pople lang ilaxle JOWANPA ang tö tuita ang koxle zokle ashun.

¹⁵Liwi hwome ija Tsaotsüt Suak hia hun suak nwonlaxle longnu tuita dingma dan. Ifüima Beth Shemesh angkya khünakbue JOWANPA ang zokle ashunkya tö hia mixhuak töbu kox.

¹⁶Filistia nok wanghom agae ibu mokkya to hule ngo ilaxle ija nyixnyix wüi Ekron to chat.

¹⁷Filistia noke ija hun füi zingkya haknüi laikya kak aga hwom ochax hanpakma tsangthom tuita ningle JOWANPA ang koxle akatkya changpu. Ashdod, Gaza, Ashkelon, Gath hia Ekron hwom tingnubu hanpak ang ma hinghoho ningle koxle apao.

¹⁸Hwome hun füi zingkya juxsa mua chuwüi akat, Filistia nok wanghombu apünkya tingnu aga hanpakma hingho tuipong-tuipong tha ma, tamchu hozui akhople tüikya panzailaxle ziakople tüikya tinglongbu hia pan chitüikya tinglongbu hanpak ang chuwüi naxchang koxle akat. Bethshemesh ma Jihusua haxtok angkya longnu oja ding ma JOWANPA Tsaotsüt Suak danpuix, ija a anyix kople tuita mikngün kaxkhi ang ngole tüile.

¹⁹Bethshemesh nok angkya 70 khünak ija Tsaotsüt Suak homongkha to hukya khoma JOWANPAe mik-amüt. JOWANPAe hwom khama iningle changkya mikmüt ziama ahüikya khoma mongma ilaxle khünaknu huanuma mangsop.

²⁰Ikhoma Bethshemesh angkya khünakbue thüi: “Ija ningkya otsao Zang, JOWANPA tunthoma owa ajong thoüi? Keme chix kem füi atsaile ojongto apaoüi?”

²¹Hwome Kiriath Jearim angkya khünakbu hato kaxhomix akatle thüi: “Filistia noke Tsaotsüt Suak achatle tüile; julax ilaxle ija dünlax.”