Read Wancho Naga 1 Samuel 7 Bible Online

1 Samuel 7 - Wancho Naga bible

1 Samuel 7

¹Ikhoma Kiriath Jearim angkya khünakbu nguilaxle Tsaotsüt Suak pao ilaxle hwome ija Abinadab le amünkya mixsün hom to apüi. Hwom sasün Eliazar ija to hu-mix ang kamle atsao.

²Ija JOWANPA Tsaotsüt a Kiriath Jearim ma zanglao tsa tukuxjao hanpak lole ngole hom. Ija tukma Israel khünaknu pangnusae wüi JOWANPA to hwom to asun angkya hanpakma akhongle nyak.

³Israel khünaknu füi Samuel akax: “Hünzom a JOWANPA hato mongchatle jangchang, hünzom mixnok baozangbu hia baozangchabu Astarte chapabu pangwüi füi atsai angkya changle. Hünzome ma alüile JOWANPA chak to ma alüile atsaole bakle koxlax ilaxle chix tata to shwomlax, ile jangchangba chixe hünzom a Filistia nok chak tokya khosünle kopüi.”

⁴Ikhoma Israel khünakbu Bal chapa hia Astarte chapabu füi atsai, ilaxle JOWANPA tata to shwomtole chang.

⁵Ifüima Samuel-e Israel khünaknu Mizpah ma asox angkya kaxho apukle thüi: “Kue ikhato hünzom hanpakma zangjople changüi.”

⁶Ikhoma hwom pangwüi Mizpah ma asox. Hwom hidaole tikholaxle JOWANPA to tökya tuita ang thokle koxle awüt ilaxle nyixtungtale chisax-chilingle atsaole zangjop. Hwome thüi: “Kwome JOWANPA zongto ochax lyenle changdaoa.” (Mizpah ma Samuel-e Israel nok füi zangwün tsaifün-kaxwünle tsuak.)

⁷Filistia noke Israel nok pangwüi Mizpah ma asoxle tüileta le atatkya zuma, Filistia nok wanghom hwom aga khünakbu koplaxle ka üntoxle hwom to sing. Ija kaxzing atatlaxle Israel nok tüle za

⁸ilaxle hwome Samuel ang thüi: “Filistia nok chak tokya kwom azünhüi-ole JOWANPA kem Zang to zangjople ngokox.”

⁹Samuel-e chun hosa tuita lang ilaxle otom makhange zokle ashunle JOWANPA ang tö kox. Ifüima chixe Israel nok to mohimankox-ole JOWANPA to zangjop. JOWANPAe chix zangjop to lan.

¹⁰Samuel-e tö koxle ngopongma, Filistia noke single thochito hüi; ikoxle ipongkhae JOWANPAe thakchi tokhange hwom zan to kale zang atsak-adungle chang ang tom. Hwom pangwüi khangkho sam laxle abütle fütle chat.

¹¹Israel nok Mizpah angkya laile Filistia nok lomjang fole langle Bethkar alop-hax-alop-hax lüjao hwom to achuale pao.

¹²Ifüima Samuel-e long tuita lax, ija Mizpah hia Shen nyi zo ma küi ilaxle thüi: “JOWANPAe anyix alople kem to fongle hüidaoa”, ilaxle ijakha ang chixe “Fongkya Longnu”, le nyak.

¹³Ile hwome Filistia nok to anao, ilaxle Samuel ozün ma ngokya kople hwom a Israel nok longzi akaile dong ang jao chitomle abaxle thom.

¹⁴Ekron hia Gath nyi zo angkya Filistia noke kopdaokya Israel nok tingnu pangwüi achat; ile Israel noke ma haxsüt otya ma wüi kople thom ang tho. Israel nok hia Kanan nok nyi bama nokmüile ngo ang kop.

¹⁵Samuel-e chix mazi-mazile Israel nok azuile hüi.

¹⁶Zangfo to chix Bethel. Gilgal hia Mizpah, ibu tingnu anguile aham, ilaxle ibu nok to chixe khünak bama tsaifün-kaxwün angkya zangwünbu tsuakle tox.

¹⁷Ifüima chix a mahom Ramah to chat. Ikhato chuwüi chix tuita kaxfünpa ningle mokle hüi. Ramah ma chixe JOWANPA ang tö-tsap tuita zingle kox.