Read Wancho Naga 1 Samuel 8 Bible Online

1 Samuel 8 - Wancho Naga bible

1 Samuel 8

¹Chemtue Samuel a azuile changpuix, chixe sasün hwom Israel nok kaxfün mixbu ang achang.

²Tüichongpa ang Joel le amün ilaxle naoshukpa ang Abijah le amün; hokhi a Bersheba ma kaxfün mix ang ngo.

³Ikoxle hokhie hopa mwotlom chito, hokhi a ngun kop angkya zaza to mongkoxle mok, ikhoma hokhie sukya kaxfün chifatox homle zuizun laxlaxle tix tsaifün-kaxwünle chang.

⁴Ifüima Israel nok lompabu pangwüi asox, ilaxle Ramah to Samuel hato ngui.

⁵Hwome chix ang thüi: “Hulax, nang a azuün ikoxle hünsa hwome nang mwotlom tole chimok, idaile kwom to apün-ada angkya wanghom tuita kamle toxhüi; kwom chuwüi mixnokbu lailaile wanghom laxlaxle ngo ang.”

⁶Hwome wanghom jukya tsai-kax bama Samuel ang mong huanuma mongzom ma chimüi; ikhoma chixe JOWANPA to zangjop,

⁷ikoxle JOWANPAe thüi: “Khünaknue nang füi chemle akaxpuix ibu pangwüi to apakox. Hwome hwom wanghom ang chilaxle ahaikya a nang ahaikya münchang ikoxle ku ahaikya changpu.

⁸Ami Ijip nok tokya kue hwom khosünle apüikya tokhange wüi hwome ku hato tok ahole hüipu ilaxle mama baozangbu to shwomle hüipu; ilaxle athax a ku to hwonle hüikya ningle nang tochu hwonle ngopu.

⁹Idaile hwom kax ma laxkox, ikoxle hwom ang kaxkhün zukya laxkox, ilaxle hwom wanghome hwom to chemle hwon angkya tüipuix, ibu müile apua-anole laxkox.”

¹⁰Samuel-e, khünaknu opange chix ma wanghom jule hüipuix, JOWANPAe chix fün wünkya tsai-kax bakle apuale kox.

¹¹Samuel-e thüi: “Hünzom wanghompa-e hünzom to ibibile hwon angkya changle: chixe hünzom su-sa hwom chix süpahi ang zingüi; züizüie chix zankat man-kanlin ma moküi, mamabue cha makhange ahamle azanüi, ilaxle mamabu a chix man-kanlin lomkop ang ahamüi.

¹²Hwom kha angkya züita chixe hajat thakma lompa ang zingüi, ilaxle züizüi a 50 thakma lompabu ang zingüi. Hünzom su-sabue chix haxtok ma thomole manzai koxüi; chix sax-zütle faüi ilaxle chix chang-pax hia man-kanlinbu ma lax angkya oli-olak komkaile zingle faüi.

¹³Hünzom sacha hwome chix hanpakma ongan müikya münga zing ang tomüi ilaxle chix fongmok mix hia an zingmix ang achangle mwot mokle koxüi.

¹⁴Chixe hünzom chaxwan, grep haxtok, hia olip pünham amüimüikha laxüi ilaxle ibu a chix nguakax-wangkhobu ang koxle changüi.

¹⁵Chix khwa ma tüikya nguakax-wangkhobu hia mama pünlix-wangchongbu hanpak ang chixe hünzom manzai thombün kha angkya thom tuita bünfong laxüi.

¹⁶Chixe hünzom dabu, maihu hia manbu sümüimüi laxüi.

¹⁷Chixe hünzom chun kha angkya bünfong laxüi; ilaxle hünzom ngaxchu chix dabu ang achangüi.

¹⁸Chemtue ibu ile changle hüiüihex, hünzome hünzom wanghompa bama kaxthup-ngaotünle kaxma faüi. Ikoxlechu wanghom a hünzome mongtsu laxle lomle laxkya daile hünzom kaxhün-ngaotün to JOWANPAe na chithale changüi.”

¹⁹Khünaknue Samuel kax to chiapa ilaxle thüi: “Münchang! Kwome wanghomhom wüi lax angkya changpu,

²⁰ikoxle tix kwom chuwüi mixnokbu ningle, khünaknu thakma wanghompa-e apün-awangle, zankat lom azuile ilaxle kwom füi tomle zanhok ma womle chang ang tsuaküi.”

²¹Samuel-e hwom zangwün pangwüi to apale kop ilaxle JOWANPA hato nguilaxle ibu pangwüi apua.

²²JOWANPAe lan: “Hwome chemle thüipuix ile mokle laxkox ilaxle hwom ang wanghom tuita lomle laxkox.” Ifüima Samuel-e khünaknu ang pangwüi mahom-hom to chat angkya kax kox.