Read Wano MATIYUT 15 Bible Online

MATIYUT 15 - Wano bible

MATIYUT 15

¹Ti'nuk, aap Pariti mendek ando inom, Ala wone liiru mbanak unde ando inom, o Yerutalem nen Yetut owagam wogo nogogwaarik, Yetut yogo logonet,

²”Kat koone waganggwi yi, nonggop nduk ninombomini eeko nogogwaarak wone mamunik nogo taganogo mbo punuk, ineenggi kooka'lek logonet, mbi nonggo menggaarak?”

³Yogo mbareegwa, Yetut nen, ”Ndi, kit togon nonggop nduk Ala nen, Yogop ee'nu, ndogop ee'nu, yereegerak wone nogo taganogo mbo punuk, kinombomini eeko nogogwaarak wone mamunik nogo eeko monggotak?

⁴At Ala nen, Kinagalo-kinogoba inoone liirogon konenggo logonet, inayuk wuko logonip o. Ndi, kinagalo-kinogoba inoone taganggwi kiinok ti, kambumunggup aret o, yinuk, yereegerak kwe,

⁵aap ambi nen agalo a, ogoba a, yogo logonet, Namendek wokkiriyak mbakirak nogo ti, muk Ala wogogirak me, yinuk,

⁶ogoba ayuk wurogo wogoga'lek kagak, kit nen, Ti op aret eekendak o, yogo monggotak ti paga Ala nen, Yogop ee'nu, ndogop ee'nu, yereegerak wone nogo taganogo punuk, kit kinombomini eeko nogogwaarak wone mamunik nogo tiyappugwi kiigi o.

⁷Kit kiniki laakot logonet yogo monggotak yi wae. Ala nen at Yetaya yoge kagak, at nen ari logonet,

⁸Kit aakumi yi, kinambe paga nen an wogoppanugwi kwe, kiniki perak, ninom ogoorak aret wonogwe o.

⁹Kit mamunirogo monggotak ti, aakumi inoone yugu kagak, mamunirogo monggotak me, aanom warogo aret nalut ee'nako ogotik o, yinuk, yoragagerak nogo ti, kit yi eekwi kiinok aret yereegerak kagi o,” yoragagerak.

¹⁰Yorage nagagirik, Yetut nen aakumi kuwak aago nogo wiiragagerak wogo mbareegwa, yorage logonet, ”Kinaruk konembunuk, liippogo logonip o.

¹¹Nonggo monggotak ti paga maluk eekkinakeelik o. Ata, kinambe me nen wunggetak nogo paga mban maluk eekkinake menggerak o.”

¹²Yorage mbareegi, at oone waganggwi nogo, wogo nogogwaarik, ”Wone yoragandak nogo ti, it aap Pariti inaruk konembunuk, ineebi kombakwi iigendak a, lek a?”

¹³Yogo mbareegwa, Yetut nen, ”Iri'ngga-kale'ngga awi an nogoba mbogut paga mendek nen yarulik kenok ti, mondok kinigin aret o.

¹⁴It aap inigen mbuk mban-mban ineenggi pit-pit aago nogwe iinok ti, it imbirak aret yigeebu wambugun me, inigen mbuk logonet, tu niigiigwi iinok ti, inobaalombok me, teppiyaanip.”

¹⁵Yorage mbareegi, at Peterut nen, ”Wone eegu laarak yagandak nogo ti, mbinuk-mbenak yo'niret o.”

¹⁶Yoge mbareegi, ”Kit kunduk awo kiniki liippega'lek logonet, yo'nogo ogotik?

¹⁷Yi mendek ndi mendek nenggaatak inaanoguma wangge nagaatik, mbo pi nogo menggaarak nogo kit keneenggo'lek a?

¹⁸Ndi, kinoone yogo monggotak nogo ti, kinikime nen aret wungge nagaatik, maluk eekkinake menggerak.

¹⁹Kinikime maluk eeriyak koonggwi inom, aap wakwi inom, kwe kundugume wurinakwi inom, komologwe tawe wurinakwi inom, yogoot waganggwi inom, pilit wone inoba piigwi inom, miyuk-meya eerogo piigwi inom, nogo ti, kinikime nen aret wungge menggerak me,

²⁰kinikime nen wunggetak nogo paga maluk eekkinake menggerak Kineenggi kooka'lek logonet, mbi nunggwi ti paga nen maluk eekkinakeelik aret o,” yinuk, yoragagerak.

²¹Yorage nagagirik, at Yetut o time nen nage nagagirik, o Tirut Tiron nagagerak.

²²Nage mbareegi, kwe Kaanan mendek ambi o time nen wundi wage nagagirik, oone nggwok paga yogo logonet, ”Ai, nogoba, Ndawut ombooluk wae! An naagaluk kolaga kugi inikime unggwage nagagirik, abu maluk eeppereegerak me, nabuwa mbaru o.”

²³Yoreegerak kwe, at Yetut onggo abu yorulik puk wonage kagak, it at oone waganggwi nogo nen wogo nogogwaarik, ”Kwe yi, oone nggwok agan mu'niret wage me, nggarurogon nappu ubi!”

²⁴Yogo mbareegwa, Yetut nogo nen, ”It aap Iterali mendek wam ndomba kobak ogogwaarak pogom wonogwe nogo mban iya nawak o, yinuk, at Ala nen nappani wagagerak o.”

²⁵Yorage mbareegi, kwe nogo wage nagagirik, ayuk wurogo alut eeke logonet, ”Ai nogoba. Obeelom eeppanu ubi.”

²⁶Yoge mbareegi, Yetut nen, ”It elege-aabologwe inambi ineenggi me ndinogo nggeewo wogoroorak ti mage o.”

²⁷Yoge mbareegi, kwe nogo nen, ”Aret kwe nogoba o. At nggeewo unde nogo nen ambi nengge kagak, anggen yumbu-yumbu abu'me wanggetak ti, it nggeewo aret nonggo menggaarak nogo o,” yoreegerak.

²⁸Yoge mbareegi, Yetut nen, ”Kwe yi wae. Kat mondok abet nombakendak me, kat kiniki mbakendak nogo ndak-ndak aret eekkaki o,” yoge kagak, ti eyom aret aagaluk andi nogo mondok lek aret agagerak.

²⁹At Yetut nogo o time mbo punuk, tu o Nggalileya yi yenggenak ambet paga nage nagagirik, puurom paga lagi nanuk, time kwi'nagagerak.

³⁰Kwi'nagagerak wonage me, it aakumi ambik nen inendop maluk mendek inom, inigen mbuk mendek inom, ineenggi-iniyok nggilik-nggelok aago mendek inom, inoone lek mendek inom, aap ando ambik inom, wogoret, Yetut owagam abu'me piya wogo mbareegwa, at nen obeelom eeginabeegerak.

³¹Eeginake mbareegi, inoone lek mendek inoone yogwe, ineenggi-iniyok nggilik-nggelok aago mendek obeelom ogwe, inendop maluk mendek tu nogwe, inigen mbuk mendek inigen kogwe, eekwi it aakumi kuwak aago nogo nen inigen iigo nogogwaarik, ”Wi,” yinuk, pi wako logonet, aap Iterali inogoba Ala nogo wogoppereegwaarak.

³²Ala wogoppogo mbareegwa, at Yetut nen it at oone waganggwi nogo wiiragagerak wogo mbareegwa, ”Wologwe wae. It aakumi ambik yi, ninom nogo 3 yogo logonet, inambi abu lek agaarak me, inabuwa mbaki o. Mbi nengga'lek tu paga nogo logonet, inambuluk piyoorak me, mbi abu kagak, an nen iname nappiyoorak meek o.”

³³Yorage mbareegi, it Yetut oone waganggwi nogo nen, ”O karume yime aakumi inawi wurik lek me, it aakumi ambik kuwak aago yogop yi, inambi ndak nawak nduk, mbi nggeeme kwaari noorak mbaken o?”

³⁴Yogo mbareegwa, Yetut nen, ”Kit roti mbi mande porogo ogotik?” Yorage mbareegi, it nen, ”Lek o. We roti mbi 7, ndi, ikan mbuulogwe mbereret mban inom porogo ogoorik o.”

³⁵Yogo mbareegwa, aakumi ambik kuwak aago nogo nggween paga kwi'naruwak nduk, yorage nagagirik,

³⁶roti mbi 7 inom, ikan inom, eenggi me wagangge nagagirik, ”Ala wa!” yinuk, karerogo at oone waganggwi nogo wogorage mbareegi, it nen aakumi ambik kuwak aago nogo tumburirogogwaarak.

³⁷Tumburirogogwaarak nogo nonggo nogogwaarik, ndonggoppiige mbareegi, mbi inom, ikan inom, ando ndiinogo pereegwaarak nogo ti, mbirim yum 7 aret eno korok togon yonggologo pereegwaarak.

³⁸Ndi, it roti mbi nunggugwaarak nogo ti, kumi inom, elege mbuulogwe inom, ineebe linggininabulik kwe, aap inalik mban ineebe ti, 4000 aret wonogogwaarak.

³⁹Ndi, at Yetut nen it aakumi ambik kuwak aago nogo iname nappiige nagagirik, yiiro paga unggunuk, wunda wage nagagirik, o Magaran aret ari wagagerak.