Read Wano MATIYUT 16 Bible Online

MATIYUT 16 - Wano bible

MATIYUT 16

¹Wage mbareegi, it aap Pariti mendek inom, aap Taruki mendek inom, wogo nogogwaarik, Yetut abut mbanuwok nduk yogo logonet, ”Nineenu ariyak mbogut paga mendek ambi eeke keyaawi o.”

²”Yogo mbareegwa, Yetut nen, ”O kiyoma mbogut paga ndugwi maa'ngga eeke kenok, kit nen yogo logonet, O kibi arikit nduk, eeke kagi, yinuk, yogwe,

³ndi, o kuubondendok mbogut paga ogum eeke kenok, kit nen, O mayu nggwok woraakit nduk, eeke kagi, yinuk, yogwe, eeko monggotak. Mbogut etenggen eeke yomboonggo monggotak kineenu kwe, yi mendek ndi mendek eeriyak age nogo ti, kineenu ariyak nduk age kwe, yomboonggwi kineenggo'lek aret wonogwe kiigi o.

⁴Kit aakumi o yogondak wonogwe nogo nen Ala mbo pogo nogogutik, maluk lombok eerit nugwi yi, Nineenu ariyak mendek ambi eeke keyaawi o, yo'nugwi kwe, kineenu ariyak nduk, alik ambi eeke neyaamunggup lek o. Ata, at Ala wone yorage nagagerak Yunut nogo nen ineenu ariyak mendek eereegerak nogo mban eeke neyaamunggup o,” yinuk, yorage nagagirik, it aap nogo mbo piinok nagagerak.

⁵It Yetut oone waganggwi nogo, yi wunda wogo nogogwaarik, roti mbi larak inami a'nuk wogogwaarak me,

⁶Yetut nen it nogo yorage logonet, ”It aap Pariti mendek inom, aap Taruki mendek inom, inoone ti, roti piike menggerak nogo kokwak aret me, waganggwi kiyo, kiniki tum wako logonip o.”

⁷Yorage mbareegi, it nogo ambi yagak ambi yagak yogo logonet, ”Roti mbi larak wonok woroolik kenok yo'nirage kogo o,” yinuk,

⁸yogwe at Yetut yelok iige nagagirik, ”Kit kiniki liirogon abet nombaka'lek yi, roti mbi larak lek kenok nonggop nduk kiniki piirik logonet, wone yogo ogotik?

⁹Roti mbi 5 kwe, aap ineebe 5000 tumburirogo nogotik, mbirim yum mande yonggologo pogotak nogo inom, ndi, roti mbi larak 7 nogo aap ineebe 4000 tumburirogo nogotik, mbirim yum mande yonggologo pogotak nogo inom, abeka'lek ogotik? Alom ti nduk eekerak, kunduk liippanega'lek logonet, yogo ogotik?

¹¹Yi abe roti mbi yinuk, yo'nirage lek o. Ata, it aap Pariti aap Taruki inom, inoone nogo ti, roti piike menggerak nogo kokwak aret me, waganggwi niyo, niniki tum wako logowok nduk yo'nirage o, yinuk, yuurak op aret kwe, nonggop nduk liippega'lek ogotik?”

¹²Yoragagerak ti paga it nen, ”At Yetut roti piiruwak nduk pogo menggaarak nogo mendek kenok, yo'nirage lek o. Ata, it aap Pariti aap Taruki inom nen inoone mamunirogo menggaarak nogo waganggwi niyo, niniki tum wako logowok nduk, yo'nirage kogo o,” yinuk, mbareegwaarak.

¹³At Yetut o Kayitariya Pilipi eraaninu time nege logonet, at oone waganggwi nogo yorage, ”Wologwe! An aap aret nda'nagagirak yi, it aakumi nen ta nomba'nuk yogo agaarik?”

¹⁴Yorage mbareegi, it nen at yogo logonet, ”It ando nen, Kat Yaya Yiime Wuppiige Menggerak aret, yogwe, it ando nen, Eliya aret, yogwe, ndi, it ando nen, Kat Yeremiya ilik, aap Ala wone yorogo nogogwaarak nabi-nabi mendek a? yinuk, yogwe, eeko agaarik o.”

¹⁵Yogo mbareegwa, ”Kit perak, an ta nomba'nuk yogo monggotak?”

¹⁶Yorage mbareegi, at Timon Peterut nen, ”Ala eenik menggerak aput Mesias kat aret o.”

¹⁷Yoge mbareegi, Yetut nen, ”Timon Yunut aput nore wa. Aakumi nen paganogo yokkirulik o. Ata, an nogoba mbogut paga mendek nen aret paganogo yokkegerak me, kiniki ale'nggen aret mbake logot o.

¹⁸Kat Peterut aret me, yugum yi paga an napuri kuwak eeppiinok, o pogom wukkolaminggirak me, kanggwi alom nen an napuri nogo tebenogo piyaagin mondok lek o.

¹⁹At mbogut paga mendek abu'me piige minggim tu kunci nogo kat aret wokkiriminggirak me, kat nen nggween paga yime, Eeriyak mage o, ari keenok ti, mbogut paga kunduk eeriyak lek aret kaamunggun o. Ndi, kat nen nggween paga yime, Eeriyak op o, ari keenok ti, mbogut paga kunduk eeriyak aret kaamunggun o, yinuk, yokkigi o.”

²⁰Yoge nagagirik, ”An Keritut neegotak nogo aakumi abu yoraagup o,” yinuk, at oone waganggwi nogo inaruk wareegerak.

²¹Inaruk wake nagagirik, ti eyom paga Yetut nogo nen at oone waganggwi nogo yorage logonet, ”An o Yerutalem time noorak agaarak me mondok nage agarik o. It aap inanggok inom, it Ala unde inoweewi inom, it Ala wone liiru mbanak unde inom, nen noba aaninggin-paaninggin agago paninuk, noorugun o. Nooko mbarumengga, nogo mbere yippunuk, Ala nen neenik agago mippanigin o,” yinuk, paganogo yoragagerak.

²²Yorage mbareegi, at Peterut nen Yetut wonok nomok togon nage nagagirik, mberege logonet, ”Mage o. Togop eekkaburak mondok lek o, nogoba.”

²³Yoge mbareegi, at Yetut ena logurogon pekkage logonet, Peterut yoge, ”Kat Ibilit negen ari yi, Ala iniki mbake nogo eeriyak mba'nuk ari lek o. Ata, aakumi iniki mbakwi nogo eeriyak mbake logonet, an non mbambanege me, mondok nak o,” yoreegerak.

²⁴Yoge nagagirik, at Yetut nen it at oone waganggwi nogo yorage logonet, ”Kit an ninom nogo logorak mbakwi kenok, yi mendek ndi mendek eeriyak mbakwi nogo mbo punuk, eyo karo-karo paga nabembinagarak nogo ko'nok, ninom aret nugu logowok o.

²⁵Kineebe kinili yikkolaamonggotak kenok, kineebe kobak aret arumunggup o. Ndi, kineebe an nendage tiya yuwak nduk wondet eerogo patit namonggotak kenok, kinili aago aret logomunggup o.

²⁶Kit yi awi ndi awi abok aret unde eekkologo logomonggotik, kineebe kobak arumonggotak kenok, nano eekkoloorak nduk agan nogo logomunggup mbakop? Kineebe kobak arumonggotak kenok, obaane'me nano patiyak?

²⁷An aap aret nda'nagagirak yi, an nogoba amindik-amendek li'luk eekko'nok, it mbogut paga nayonggo nugu menggaarak melaikat ninom wogo logomonggoorik, yi aap ndi aap eeko menggaarak onggo ndak-ndak aret wogora woraagun o.

²⁸Kit ando yime wonogwe nogo nen an aap aret nda'nagagirak yi, it aakumi nabu'me piya woroorak nogo awo kinigen neega'lek kiigak, kambumunggup mondok lek o, yinuk, abet aret yokkiragi o,” yoragagerak.