Read Wano MATIYUT 17 Bible Online

MATIYUT 17 - Wano bible

MATIYUT 17

¹Yorage nagagirik, ti'nuk, nogo 6 yippunuk, at Yetut nen Peterut inom, Yakobut inom, ndi, Yakobut awot Yaya inom, wogoret puurom ambi nggorek paga lagi nage nagagirik, inalik time wonogwe me,

²inenggaanom paga at eebe alik negen age logonet, enete oonegen pogom pindanggage, ndi, ayum o eya pogom laambu lombok age, eeke kagak,

³it Muta Eliya imbirak Yetut inom wone mbanggwi mban inigen iyareegwaarak.

⁴Wone mbanggwi iigo nogogwaarik, at Peterut nen Yetut yoge logonet, ”Nogoba wae. Nit yime wonogwe ti, obeelom aret me, kit logobagip nduk, an nen ooliya kenagan wurogo pinagarak op aret mbaken ilik, lek a? Ambi ti kat, ambi ti Muta, ndi, ambi ti Eliya kinake wuriyak nduk yokkigi o.”

⁵Wone awo yoge kagak, ameraakot abinak mendek nobappiya wage mbareegi, enggela'me nen oone ambi yorage logonet, ”An naput niniki kunik nale'nggen ee'nake nogo yi aret me, at oone kinaruk liirogon konenggo logonip o.”

⁶Yorage nogo it Yetut oone waganggwi inaruk konenggo nogogwaarik, inagabiti ambik ogo logonet, inete wanduk togon wambeegwaarak.

⁷Wanggo nogogwaarik, wonogwe me, at Yetut wage nagagirik, ineebe eenggi piginake logonet, ”Kinagabiti lek aret mi'na'nip o.”

⁸Yorage mbareegi, inuut pila yogo nogogwaarik, it nogo inom lek at Yetut alik mban wonage inigen kogogwaarak.

⁹Puurom paga nen wambi wogo logonet, Yetut nen it yorage, ”An aap aret nda'nagagirak yi, kambunuk nogo menggam nen awo mippanega'lek kagak, eeke kinigen neegotak nogo aakumi abu yoraagup o,” yinuk, inaruk wareegerak.

¹⁰Inaruk wake mbareegi, at oone waganggwi nogo nen Yetut yogo logonet, ”Togop kenok, it Ala wone liiru mbanak unde nogo nonggop nduk, At Eliya aa'nduk woroorak, vogo menggaarak mbaken?”

¹¹Kin waganggo mbareegwa, at nen, ”Eliya aa'nduk wage logominggirik, yi eekwi ndi eekwi ndegeni woraagin o, yogwe nogo ti, abet aret yogwe kwe,

¹²Eliya nogo muk wage mbareegi, it aakumi at yelok kaga'lek logonet, iniki mba'nuk aret eeppereegwaarak nogo ndak-ndak, an aap aret nda'nagagirak nogo noba aaninggin-paaninggin agago panugun o, yinuk, yokkiragi.”

¹³Yorage mbareegi, at oone waganggwi nogo nen, ”At Yetut nen wone yo'nirage yi, Yaya Yiime Wuppiige Menggerak aret nduk, yo'nirage o,” yinuk, iniki liippereegwaarak.

¹⁴Liippogo nogogwaarik, aakumi kuwak aago inowagam wambi wogo mbareegwa, aap ambi Yetut owagam wage nagagirik, abu'me tebe yinuk,

¹⁵”Nogoba wae. An napuluk kugi andi nggwok eeke nagagirik, eengi-iyok puk-puk eeke logonet, kangge-eenik age, eeke logonet, kulinik-kalinik kani kunik me wangge, kulinik-kalinik yiime wangge, eeke menggerak me,

¹⁶wonok it kat koone waganggwi inowagam wagarak kwe, it nen obeelom eeriyak abu meek iigirak me, kat nen nabuwa mbake logonet, naput yi obeelom eeru o.”

¹⁷Yoge mbareegi, Yetut nen, ”Wologwe! Kit aakumi yogondak wonogwe kiniki noba panggombunuk, abet nombaka'lek lambek nugu monggotak yi, an ne mande ninom logonuk name nagin kwe? Ne mande yanggorogon kit ninom logorak kwe? Wulaga ti, wonok wa'nip o.”

¹⁸Yinuk, yoragagerak wonok wogo mbareegwa, at Yetut nen kugi nogo mberege mbareegi, kugi nogo wulaga inikime nen wundi nage kagak, wulaga nogo ti eyom obeelom aret agagerak.

¹⁹Obeelom age mbareegi, it at oone waganggwi inalik Yetut owagam wogo nogogwaarik, ”Nit nonggop nduk kugi nggiginogo wumbuurak meek wonogoorak mbaken o?”

²⁰Yogo mbareegwa, at nen, ”Kiniki liirogon abet nombaka'lek nogo paga eeriyak meek aret wonogotak o. Kit kiniki abet nombakwi nogo kulok anggen pogom logonetak en, puuron yi yogo logonet, Yime nen tayo yi nage keyaagin o, yogwi kiinok, tayo yi nage kaanetak o.

²¹Kugi togop ti, we nggiginogo wumbiigulik o. Ata, kinambe mage negen logonet, tamban mban eekwi kiinok ti, nggiginogo wumbiyoorak op aret me, nduk yokkiragi o,” yinuk, yoragagerak.

²²O Nggalileya time kuwak eeko nogogwaarik, Yetut nen at oone waganggwi nogo yorage logonet, ”An aap aret nda'nagagirak yi, it aakumi nen nooruwak nduk, Ala nen kooneegerak paga neebe pigogo wogorage kenok,

²³nooko mbarumengga, nogo mbere yippunuk, Ala nen neenik agago mippanigin o.” Yorage mbareegi, iniki abu maluk ogogwaarak.

²⁴Ti'nuk, o Kaperenaum wogo mbareegwa, it Ala awi wurik ake wu kuwak eeko menggaarak nogo, at Peterut owagam wogo nogogwaarik, ”At mamunggirage menggerak nogo nen Ala awi wurik ake wu pege menggerak ilik, lek a?”

²⁵Yogo mbareegwa, Peterut nen, ”Lek o. Pege menggerak aret o.” Yorage nagagirik, oome unggwage mbareegi, at Yetut nen Peterut aa'nduk yoge logonet, ”Timon wae. It nggween paga mendek inendagembogut unde menggam unggwi wogwe iinok, Onggo pinip o, yorogwe nogo ti, it inapuri yorogwe a, aap inambik yorogwe a, nonggop mbaken o?”

²⁶Yoge mbareegi, Peterut nen, ”Aap inambik aret yorogo menggaarak o.”

²⁷Yoge mbareegi, Yetut nen, ”Ti kenok, inapuri ti pugulik we aret menggaarak kwe,

²⁸pega'lek kenok ineebi ninombakwi iyo, kat yi yenggenak me nage logominggindik, ikan keele mbo mambunuk, ikan ambi aa'nduk wa'nage kenok, ambe paganogo punuk, wu ambe me wonage nogo wagangge logominggindik, abeenok mogonogo an nake pege, abeenok kat kake pake, eeri woraamunggun o,” yinuk, yoreegerak.