Read Wano MATIYUT 20 Bible Online

MATIYUT 20 - Wano bible

MATIYUT 20

¹Yetut nen wone ambinom yorage logonet, ”At mbogut paga mendek abu'me piige minggim nogo ti, aap ambi nggween unde nen at eyabu eeppiyaawak nduk, o kuubondendok aakumi kwaarinabi wundeegerak nogo pogom aret o.

²Nage nagagirik, aakumi kwaarogo, eyabume nappiige logonet, Ne ambit eekwi kiinok, onggo wu ambiret wokkiroorak op ilik? Yorage mbareegi, Op aret o, yogo mbareegwa, eyabu me nappiyareegerak.

³Nappiyareegerak eekwi iigak, at peebi o mo mbigaarogon wundi nage nagagirik, aap ando inawoore'nggam we ugun wonogwe enegen iige nagagirik,

⁴Wologwe. Kit kunduk an neyabu yarak me ando eeppani nanip o. Eekwi kiinok, onggo ti, eerumonggotak pekkagak ndak-ndak aret wokkiraagin o, yorage mbareegi, nogogwaarak.

⁵Ti'nuk, o liingge inom, o kiyoma inom, wungge nagagirik, togop mban yoranok, nappiigak eereegerak.

⁶Ti'nuk, oonegen kiluk yikit nduk eeke kagak, wundi nanuk, aap ando we wonogwe enegen iige nagagirik, Wologwe. Kit nonggop nduk yime we puk mban ogotik?

⁷Yorage mbareegi, it nen, Yabu eeriyak nduk, ambi yo'niroolik me, we aret ogoorik o. Yogo mbareegwa, aap nogo nen, kit kunduk, an neyabu eekwi me time kinom eeri nanip o.

⁸Yorage nagagirik, ti'nuk, o kiip age mbareegi, at eyabu unde nogo nen at ayeloman eyabu lenggangge menggerak nogo yoge logonet, It aap yabu eekwi nogo wiirage logominggindik, wogwe iinok, it peebi unggwagaarak nogo onggo inaa'nduk wogorage, ndi, inaa'nduk unggwagaarak nogo onggo peebi wogorage, eeru o.

⁹Yoge mbareegi, it oonegen kiluk yikit nduk eeke kagak peebi yabu eeri unggwogogwaarak nogo, wogo mbareegwa, wu ambitak-ambitak wogorage,

¹⁰ti'nuk, it inaa'nduk unggwogogwaarak nogo nen, Nit ta, nggwok aret kolaagun o, mbarit wogogwaarak kwe, it kunduk, wu ambitak-ambitak wogorage,

¹¹eeke mbareegi, kologo nogogwaarik, aap eyabu unde nogo inanini nen, inoone mamun paga yogo logonet,

¹²It peebi unggwagaarak yi, we mbuuluk aret eekaarak. Ndi, nit perak, mo andi paga yabu ta'li laarak nggwok eekoorak kwe, at nen, Inom ndak-ndak eekaarak, mba'nuk onggo ninom ndak-ndak wo'niragaarak yi meek kogo o.

¹³Yogo mbareegwa, at eyabu unde nen it yogwe nogo yelok iige nagagirik, aap it mendek ambi yoge logonet, Wulaga wae. Yabu ne ambit eekwi kiinok, onggo wu ambit op aret o, yinuk, yogotak nogo ndak-ndak eekirak me, an maluk eekkinakirak lek o.

¹⁴An niniki nen it peebi unggwagaarak nogo, kat wokkigirak ndak-ndak wogoraakit mbakirak me, kawu wokkigirak ti aret ko'nok nak o.

¹⁵An namendek paga niniki mba'nuk eeriyak mage nduk yagan ya? Ndi, an inabuwa nen wogorage neenok, kat kanini nen yagan? yinuk, aap eyabu unde nen aap nogo togop aret yoragagerak.

¹⁶Ti yoragagerak nogo ti, it peebi mendek nogo ti, inaa'nduk ogwe, ndi, inaa'nduk mendek nogo ti, peebi ogwe, eerugun kagi o,” yinuk, yoragagerak.

¹⁷Ti'nuk, at Yetut o Yerutalem noorak nduk, it at oone waganggwi 12 nogo wogoret inalik tu paga nogo logonet,

¹⁸”Wologwe wae. Nit o Yerutalem aret nogo ogoorik o. Time unggwi namonggoorak me, an aap aret nda'nagagirak nogo Ala kooneegerak paga neebe pigogo, it Ala unde inoweewi inom, it Ala wone liiru mbanak unde inom, wogorage kenok, it aap nogo nen nooruwak nduk, wone mbanugun o.

¹⁹Wone mbambunuk, it aap endekem konenggulik mendek nen nenggali wakwi, ya'mbiran paga nggora eerogo nookwi, neebe eyo karo-karo paga nabenogo panugwi, ee'naburak nduk, wogoraagun o. Wogorogwe iinok, nooko mbarumengga, nogo mbere yippunuk, Ala nen neenik agago mippanigin o,” yinuk, yoragagerak.

²⁰Yorage mbareegi, at Tebereyut apuri inagalo nogo aagalogwe inom Yetut owagam wogo nogogwaarik, abu'me tebe yinuk, kwe nogo nen Yetut yoge logonet, ”An ambi ngginogiri o.”

²¹Yoge mbareegi, at Yetut nen, ”Kat kiniki mbakendak yu o.” Yoge mbareegi, kwe nogo nen, ”An naagalogwe mbere yi, kat kabu'me piige menggenom time kat keebe peenok-peenok logorak yoraanok nduk, yokkigi o.”

²²Yoge mbareegi, at Yetut nen, ”Kit nggino yo'nugwi ti, kineenggo'lek logonet, nggino yo'nogo ogotik o. An nagi toolak nagin nogo ti, kit noorak op mbakop?” Yorage mbareegi, it nen, ”E o. Nit noorak op aret o.”

²³Yogo mbareegwa, at nen, ”An nagi toolak kit noorak op aret kwe, neebe peenok-peenok pinagarak ti perak, an nen eeppinagarak lek o. Nogoba nen punogo piyareegerak nogo mban aret piyaagin o.”

²⁴Yoragagerak nogo it ando 10 nogo nen inaruk konenggo nogogwaarik, it owe-awot imbirak nogo inanini agaket eeginabeegwaarak.

²⁵Eeginako mbareegwa, at Yetut nen wiiragagerak wogo mbareegwa, yorage logonet, ”It aakumi endekem mendek inarum menggaarak ti, inoone omaawi paga lengganinakwi, ndi, it inogobamini aap nggwok nen inapuri eerit nugu logowak nduk, inoone omaawi paga yorogwe, eeko menggaarak nogo kineenu kwe,

²⁶an aap aret nda'nagagirak yi, kit nen nake eeko logobagip nduk, woroolik o. Ata, an nen kit kinake eeke, ndi, kit aakumi apit an kinake kambiminggirak paga kinonggo mbambunuk, piinogo pinagage, eerikit nduk wagagirak nogo ndak-ndak, kit ambi nen, An aap nggwok logokit, mbake kenok ti, kinayeloman aret age, ndi, kit ambi nen, An naa'nduk tiyanak logokit, mbake kenok ti, kinabu'me logonet, kinake eeke, eeko logomunggup o,” yinuk, yoragagerak.

²⁹O Yeriko nen wundi nogo mbareegwa, aakumi ambik mugurok nogwe iigak,

³⁰aap mbere inigen mbuk tu nggwok ambet paga kwi'ndak logonet, Yetut tu yi paga wage, inaruk konenggo nogogwaarik, inoone nggwok togon yogo logonet, ”Ninogoba wae. Kat Ndawut ombooluk yi, ninabuwa mbaru o,” yinuk, yogwi iigak,

³¹it aakumi nogo nen it aap nogo inoone puk aruwak nduk, mberirogogwaarak kwe, kagak, abunuk inoone nggwok nabenak mban yogo logonet, ”Ninogoba wae. Kat Ndawut ombooluk yi, ninabuwa mbaru o.”

³²Yogwi nogo at Yetut aruk konengge nagagirik, yungguk togon puk a'nuk, oone yorage logonet, ”Nonggop eekkinaburak mba'nuk yogo ogotik o?”

³³Yorage mbareegi, it nen, ”Ai, ninogoba. Nit ninigen yi, obeelom ee'ninaburak nduk, yokkogo o.”

³⁴Yogo mbareegwa, at Yetut nen inabuwa mbake nagagirik, inigen eenggi awo mbaaniige kagak, inigen nogo pagak ogo nogogwaarik, Yetut inom nogogwaarak.