Read Wano MATIYUT 22 Bible Online

MATIYUT 22 - Wano bible

MATIYUT 22

¹Inagabiti nen puk ogo mbareegwa, at Yetut nen wone eegu laarogo ambi yorage logonet,

²”At mbogut paga mendek abu'me piige minggim nogo ti, aap endagembogut ambi aput akwe kolage me laago lareegerak nogo pogom aret o.

³Larak nogo pelaarogo punuk, ayeloman laago noorak inayonggo piyareegerak nogo na woraawak nduk, wiiragagerak kwe, Nineebi o, yinuk, puk ogogwaarak.

⁴Puk ogo mbareegwa, at aap nogo nen, sapi inom, wam amok warak lombok inom, warogo lake nagarik, noorak nduk yi mendek ndi mendek abu pipuk eerogo pigirak me, ninom noorak yoragagirak nogo mbet-mbet woraawak nduk, yora nanip o, yinuk, ayeloman alik ambinom yonggo nappiyareegerak.

⁵Yonggo nappiyareegerak mendek it aap nogo nen liikot-laakot yogo logonet, it ando yabu eeri nogwe, it ando yi mendek ndi mendek onggo kero, awone warit nugwi, eereegwaarak.

⁶Ndi, it ando nen perak, at ayeloman yonggo nappiyareegerak nogo ineebe pigogo inenggali wappiinok, inooreegwaarak.

⁷Inookaarak yogwe at aap endagembogut nogo aruk konengge nagagirik, anini nen awuri yigin unde nogo nappiige mbareegi, ayeloman inooreegwaarak it aap nogo inoorogo piigwi, inawi kani pugwi, eeri nawak nduk, nappiyareegerak.

⁸Nappiyareegerak nogo nogwe iigak, at aap nogo nen ayeloman yorage logonet, Laago abu larogo pigirak kwe, it inayonggo piyareegirak nogo na woroorak mondok lek aret mbakirak me,

⁹kit nen tu andogon-andogon nogo logomonggotik, aakumi wogwe iinok, laago larak na woraawak nduk, yoraanu o.

¹⁰Yorage mbareegi, at ayeloman nogo nen tu nggwok paga yi aap ndi aap op-maluk abok aret wogwe inigen iigo nogogwaarik, kuwak eeppiinok, ineebe apit wogoret wogogwaarak me, laago lareegim nogome o yagabit agagerak.”

¹¹Laago nawok nduk, o yagabit ari unggwogogwaarak wonogwe me, aap endagembogut nogo nen enegen yambeninabi unggwage nagagirik, kumi lambumbiigo logonet, laago noorak nduk, inayum yikwi nogo mendek aap ambi yirik lek kage nagagirik,

¹²yoge logonet, ”Wulaga. Laago noorak nduk, yum yiko menggaarak nogo mendek kat yirik lek nonggop togon yime unggwi wagandak? Yoge mbareegi, aap nogo oone lek puk agagerak.

¹³Oone lek puk age mbareegi, aap endagembogut nogo nen awuri yorage logonet, Aap yi eenggi-iyok keele maarogo endekenggwe o apit me leenggu maakwi, ineyak nggilik maakwi, eeko menggam time wumbinip, yoragagerak o,” yinuk, at Yetut nen it aakumi nogo yoragagerak.

¹⁴Yorage nagagirik, ”Aakumi ambik inayonggo piige menggerak kwe, mbuuluk mban miirogo leeninake menggerak kagi o,” yinuk, yoragagerak.

¹⁵Ti'nuk, it aap Pariti mendek nen Yetut oone ambi yemenggerak paga yilunogo punuk, enggali waruwak nduk, it mban-mban wone mbani nogogwaarak.

¹⁶Wone mbanggo nogogwaarik, it inoone waganggwi ando inom, it Keroriyani mendek inom, Yetut owagam nappiyareegwaarak wogo nogogwaarik, ”Ngguru wae. Kat nen aap ambi iya, ndi, ambi meek, mbake logonet, ninenete liippinaninuk yo'nirage lek, nit eekwi paga Ala ari menggerak wone mondok pagak togon yo'nirage menggendak nineenu me,

¹⁷aap pemerintah endagembogut Kayitat ake puurak op a, mage a? Kat kiniki nonggop mbaken o?”

¹⁸Yogo mbareegwa, at Yetut nen it wone maluk lombok koonggwi yelok iige nagagirik, ”Kit kiniki laakot logonet, yogo monggotak yi, nonggop nduk, nabut mbanuwok nduk yo'nogo ogotik?

¹⁹Wu pemerintah inake puurak mendek nenegen kaakit nduk, titi'ninip o.” Yorage mbareegi, wu nogo wogori wogo mbareegwa,

²⁰at Yetut nen, ”Enete ogobakkigirik inom, endage liiru mbanak inom, yi ta mbakop?”

²¹Yorage mbareegi, it nen, ”Lek o. Ti Kayitat aret o.” Yogo mbareegwa, at nen, ”Ti kenok, Kayitat amendek ti, Kayitat aret wogogwi, ndi, Ala amendek ti, Ala aret wogogwi, eeko logonip o.”

²²Yoragagerak nogo inaruk konenggo nogogwaarik, ”Wi,” yinuk, pi wako logonet, Yetut teppunuk, mbaganeegwaarak.

²³It aap Pariti nogo Yetut teppunuk, mbaganggo mbareegwa, aap Taruki nen, ”Aakumi kambunuk ineenik a'nuk, mi'narugun lek o,” yogo menggaarak nogo ando nen ne ti eyom paga Yetut owagam wogo nogogwaarik,

²⁴”Ngguru wae. At Muta nen ari logonet, Aap ambi akwe wappunuk, apuluk ndaka'lek kagak kangge kenok, owe obaane'me aput ndagaruwak nduk, awot nen at owe nanu nogo aret kolaawak o, yinuk, yo'niragagerak.

²⁵Ndi, niname yime aap ambi apuri ineebe 7 ndarak wonogogwaarak me, at manggu ndarak nogo nen kwe wagangge nagagirik, apuluk ndaka'lek kagak kangge mbareegi, awot at ambo'me mendek nen waganeegerak

²⁶Wagangge nagagirik, togop aret aput ndaka'lek aret kangge mbareegi, awot at ambo'me mendek inom, ti'nuk, it aap 7 abok aret togop mban waganggwi-kanggwi eeko mbareegwa,

²⁷peebi kwe nogo aret kambeegerak.

²⁸It aap ineebe 7 nen kwe ambiret waganeegwaarak me, aakumi kambit nogo menggaarak ineenik agago mippiyoorak eyom nogo paga kwe nogo aap ta akwe arigin mbaken o?”

²⁹Yogo mbareegwa, at Yetut nen, ”Kit Ala wone liiru mbanak inom, Ala omaawi inom, kineenggo'lek me, kinoone alik lombok yogwe kiigi o.

³⁰Aakumi kambit nogo menggaarak ineenik agago mippiyoorak eyom paga aap nen kumi wogonakwi, kumi nen aap wogonakwi, eeka'lek it mbogut paga yonggo nugu menggaarak melaikat nogo pogom aret logogun nogo kineenggo'lek me, yogwe kiigi o.

³¹Ndi, it aakumi kambeegwaarak ineenik agago mippiyaagin nogo ti, at Ala nen, Abarakam inom, Itak inom, Yakup inom, inogoba endagembogut Ala an aret o, yinuk, kit aret yokkiragagerak liiru mbanak nogo kinigen pekkaga'lek ogotik ya? At Ala ti, aakumi kambunuk lek agaatak inogoba endagembogut lek o. Ata, aakumi ineenik menggaarak inogoba endagembogut aret mbako logonip o.”

³³Yorage mbareegi, it aakumi ambik kuwak aago nogo at mamuniragagerak nogo inaruk konenggo nogogwaarik, ”Wi,” yinuk, pi wareegwaarak.

³⁴Pi wako mbareegwa, it aap Pariti mendek nen Yetut aap Takuri inoone taganeegerak inaruk konenggo nogogwaarik, kuwak eeppunuk,

³⁵aap it mendek ambi Ala wone liiru mbanak unde nen Yetut abut mbanikit nduk, kin wakkage logonet,

³⁶”Ngguru wae. At Ala nen, Yogop ee'nu, ndogop ee'nu, wone yo'niragagerak nogo wone alom nggwok negen ngge kagandak o?”

³⁷Yoge mbareegi, Yetut nen, ”Kiniki-kinogoma abok aret kinogoba Ala mban kiniki kunik eeko logonip o.

³⁸Wone iyagalo nggwok lombok ti aret,

³⁹ndi, wone ore ambi ti ndak-ndak yi aret o. Kit kineebe kiniki kunik eekkologo monggotak nogo pogom, kinom monggotak togop aret kiniki kunik aganako logonip o.

⁴⁰Ala nen, Yogop ee'nu, ndogop ee'nu, yereegerak wone inom, ndi, it aap Ala wone yorogo logonet, yereegwaarak nogo inom, wone alom mbere yagarak ti paga mban luunik wonage o,” yinuk, yoragagerak.

⁴¹Yorage mbareegi, it aap Pariti nogo inom kuwak aago wonogwe me, at Yetut nen kin wogiige logonet,

⁴²”Kit aap yi nen at Ala leenogo mippereegerak Mesias nogo ti, nonggop mbakop o? At ta ombooluk mbakop?” Yorage mbareegi, it nen, ”Mesias ti, Ndawut ombooluk aret mbako o.”

⁴³Yogo mbareegwa, at Yetut nen, ”Aberiniki Ndawut inikime lik ari mbareegi, at nen ari logonet, At ninogoba endagembogut nen an nogoba endagembogut yoge logonet, Nogoba o. It kinom wim mbanak aan lebenogo kabu'me piiga'lek neegak, neenggi abe'nggan logonok nduk, neya mok, yoreegerak o, yinuk, yereegerak ti, nonggop togon, Nogoba endagembogut, yoreegerak mbakop?

⁴⁵At Ndawut nogo nen, Nogoba endagembogut o, yoreegerak kwe, nonggop togon at ombooluk aret logorak mbakop?”

⁴⁶Yorage mbareegi, wone onggo abu nonggop yorubok age mbareegi, ne ti eyom paga nen peebi wone ambinom kin wakkoorak inagabiti ogogwaarak.