Read Wano MATIYUT 24 Bible Online

MATIYUT 24 - Wano bible

MATIYUT 24

¹At Yetut Ala awi wurik me nen wundi nage kagak, at oone waganggwi nogo Ala awi taati wurik nogo titigiruwok nduk, Yetut owagam wogo mbareegwa,

²at Yetut nen it yorage logonet, ”Kit o ya'i wurik abok aret kinigen kogwe ilik lek a? Yugum ambi oba lu'luk aago logorak lek o. Ata, abu tigitogon langgunogo nappugun o, yinuk, abet aret yokkiragi o,” yoragagerak.

³Ti'nuk, puurom Tayitun paga lagangge nagagirik, alik taati kwi'ndak wonage me, at oone waganggwi nogo owagam wogo nogogwaarik, ”Kat yo'niragandak nogo mandenom arigin o? Ndi, kat woroorak inom, o age yobok ariyak inom, panggoni wage kenok, nineenu ariyak nduk, nano eeke kaagun o?”

⁴Yogo mbareegwa, at Yetut nen, ”It aakumi ambik nen an nendage kunit wogo logonet, Keritut ti, an aret o, yinuk, aakumi ambik iniki nomongginabugun me, kit togon nomongginakwi iyo, kiniki tum wako logonip o.

⁵

⁶Wim nggaganggwi, wim nambukwi, eekwi abok kinaruk konenggo logomonggotik, kiniki lek arugup o. Ti arit woramenggerak kwe, age yobok ari wage logonet eeke mbarubok o.

⁷Aakumi inanebenu ndegek wim nambukwi, aap endagembogut ambi awuri nen aap ambi awuri inom wim nambukwi, o yi awi ndi awi mbi noogelo age, mi nggwok nuk ari, eerigin ti,

⁸kumi elege enegen paganak yagan wako mengga kwak, togop aret kinoba aaninggin-paaninggin eeppinagage kaamunggup o.

⁹O ti eyom paga it aakumi nen pigogo kinoba andi-pandi eeppinaganuk, kinooruwak nduk, wogorogwe, kit an noone waganggotak paga, it aakumi inanebunu lombok nen inanini agaket kinombakwi, eerugun o.

¹⁰Ti eyom paga aap ambik ineebi nombakwi, at ambi nen at ambi wariyak abok mbangge, at ambi nen at ambi anini agaket ombake, eerugun o.

¹¹Ndi, aap ambik wogo logomenggaarik, we piliret, Ala wone ambi yokkira o, yinuk, aakumi ambik iniki nomoninabugun o.

¹²It aakumi nen Ala wone taganogo mbo punuk, maluk lombok eekwi ti, nggwok arigin me, aakumi ambik iniki aganggen paga Ala wone mugurok nogo logomenggaarak kwe, iniki miin age logonet, anggon aret aganabigin o.

¹³Togop aret arit wage kagak kwe, kiniki kwi'ndak nu'lek kiigak, o age yobok yi wage kenok, kinagap ndarigin o.

¹⁴Ala abu'me piyoorak obeelom wone yi, yi aakumi ndi aakumi ineenu aruwak nduk, yi awi ndi awi abok aret abu paganogo yoranet nogwe kiinok perak, o age yobok aret arigin o,” yinuk, yoragagerak.

¹⁵(Kit liiru mbanak pekkogwe yi, kiniki liippinip o.) ”Ogole warak lombok mendek at Ala wone yorage nagagerak nabi Ndaniyen nen woraagin abok yereegerak nogo, Ala ake leenak minggim taati mi'nari wage kinigen kogo logomonggotik,

¹⁶kit o Yureya monggotak yi, kiname ugun wonogwe nogo nen kinamendek tilaabaga kola laganggwi, kineyabu me wonogwe nogo nen kinayum kiname kola wogwe, eeriyak mage o. Ata, time nen aret kole mbaganit puurom paga lagit nanu o.

¹⁷

¹⁸

¹⁹O ti eyom paga it kumi inabila inom, inaagalogwe awo inelak kuninakwi inom, ti perak, inabuwa o.

²⁰Kit kole mbaganiyak nogo o mayu tit kunik eeke paga ilik, tamban eekwi paga a? age kero, tamban mban eeko logonip o.

²¹At Ala nen yi mendek ndi mendek wakkagagerak kuli nen, yogondak kuli aakumi inoba aaninggin-paaninggin eeppiigo nogogwaarak kwe, ti we mbuuluk negen aret eeppiigo nogogwaarak. Yogondak kunduk mbuuluk aret eeppiigwi kwe, o ti eyom paga kinoba aaninggin-paaninggin alik tam warak lombok eeppinagage kaamunggup o.

²²Aaninggin-paaninggin kinoba pinagarak eyom nogo, Ala nen kuli panggo pi woraagin lek kenok, aakumi inagap ndarigin lek abok aret inoorigin me, at Ala nen at apuri miirogo leeninabeegerak mendek nogo inookwi iyo, kuli pigin aret o.

²³Ti eeremenggerak kagak, aap ambi nen, Keritut nogo yi kaanip o. Ndi, ambi nen, Keritut nogo, ti kaanip o, yokkirogwe iinok, kiniki abet aret mbarubok o.

²⁴It ando nen pilit wone yokkirogo logonet, Keritut nogo an aret o, ndi, Ala wone yokkirogo nogogwaarak mendek nogo ti, an aret o, yinuk, agan wogo logomenggaarik, It Ala apuri miirogo leeninabeegerak nogo nomoninaburak op kaamun ilik? yinuk, nomoninabuwok nduk, inagabiti warak mendek inom, eerubok mendek inom, eerumenggaarak kwe,

²⁵ti awo eeka'lek kagak wone yi paganogo yokkirage me, kiniki liippinip o.

²⁶It nen, O karume aakumi lek me wonage o, yokkirogwe iinok, pekka nogwe, Oome aken time agaarik o, yokkirogwe iinok, abet mba'nuk pekka unggwogwe, eerubok o.

²⁷Oonegen alome nen o yabok pindanggegetak abinak o eneeri-ambut nok woreni nage minggi kwak, an aap aret nda'nagagirak woroorak nogo togop aret eerigin o.

²⁸Wam pili agaatak wonage me nogome aret ti'neebon ninggiko menggaarak o,” yinuk, yoragagerak.

²⁹Yorage nagagirik, ”Kineebe aaninggin-paaninggin eeppinagago mbarumengga, oonegen apit age, tut abinak lek age, laaluguragan mbogut paga nen nggaru-nggaru nggween paga wambit wage, it mbogut oolo yime inomaawi menggaarak nogo, inaganak nuk irage, eerigin o.

³⁰Eeke mbariminggi, an aap aret nda'nagagirak woroorak ineenu ariyak mendek ambi mbogut paga time eeke kenok, it aakumi nggween paga inanebunu lombok nen leenggu maakwi iigak, an aap aret nda'nagagirak nogo nobaanggi-nobaangge li'luk eekko'nok, nomaawi warak logonet, mbogut paga ndugwi enggela'me wage neyaagun o.

³¹Ndi, an nen it nayeloman mbogut paga yonggo nugu menggaarak melaikat nogo nappiige logonet, mbuti luu'ngget paga kuum-keek ari kenok, an napuri miirogo leeninabeegirak nogo o alom-alom ilin-nggut nen aret kuwak eeginabugun o,” yinuk, yoragagerak.

³²Yorage nagagirik, wone eegu laarogo ambi yorage logonet, ”Eyo ara anggup labenikit nduk eeke menggerak nogo kiniki wakkaanip o. Anggup mbilangge nagaatik, labenikit nduk eeke kenok, O kinikit nduk panggo yegerak o, yogo menggaarak nogo pogom,

³³Togop eerigin o, yinuk, yokkiragarak nogo, eeke kinigen kogo logomonggotik, Koorok panggo yegerak kogo o, yinuk, mbarumunggup o.

³⁴Kit yogondak wonogwe yi, awo lek aga'lek kiigak eeriyak abok yokkiragarak nogo, a'me lik ari kaamunggup o, yinuk, abet aret yokkiragi o.

³⁵Mbogut-nggween yi, lek arigin aret kwe, an noone ti perak, lek arigin lek mondok aret logogin o,” yoragagerak.

³⁶Yorage nagagirik, ”An aap aret nda'nagagirak yi, o ndi eyom paga woroorak inom, oonegen ndi paga woroorak inom, nogo aakumi abu ineenggo'lek aret o. It mbogut paga yonggo nugu menggaarak melaikat kunduk, ineenggo'lek aret. Ndi, an Ala aput kunduk, neenggo'lek mban aret o. An nogoba perak, alik eenu menggerak o.

³⁷It aakumi aap Nu wonage kagak eeko nogogwaarak nogo pogom, an aap aret nda'nagagirak woroorak eyom paga togop aret arigin o.

³⁸It yi nggwok awo yenggenit lagangga'lek kagak, mbi nunggwi, amburu nunggwi, aap nen kumi kologwe, kumi nen aap kologwe, eekwi iigak, at Nu nogo yiiro wurik me unggwagagerak.

³⁹Unggwage mbareegi, it aakumi iniki we ugun kobak iigak, yi nggwok yenggenit lagangge logonet; it ineebe apit yi ndonggoninabeegerak nogo pogom, an aap aret nda'nagagirak woroorak eyom paga togop aret eeginabi woraagin o.

⁴⁰O ti eyom paga aap mbere imbirak yabu eekwi me, ambi wagangge, ambi teppege, eeke kaamunggup o.

⁴¹Ndi, kumi mbere imbirak mbi worakwi me, ambi wagangge, ambi teppege, eeke kaamunggup.

⁴²Togop me, kinogoba endagembogut nogo, o ngge eyom paga woroorak kineenggo'lek me, kiniki tum wako logonip o.

⁴³At aap awi unde nen, Yogoot iyagalo ne ndi eyom paga woraagin, eenu a'netak en, tu paappunuk, amendek kiraari unggwage kero, nogo yega'lek mondok-mondok tum wake logonetak o, yinuk, kineenu a'nip o.

⁴⁴Togop me, an aap aret nda'nagagirak yi, kit nen. Ne ndi eyom woroorak, mbaka'lek kiigak, woraagin aret me, kit mondok pipuk-papuk aago logonip o,” yinuk, yoragagerak.

⁴⁵Yorage nagagirik, ambinom yorage logonet, ”Ti kenok, aap nggwok ayeloman ambi apuri inarum logonet, inambi noorak wogorage logowak nduk, mippereegerak iniki warak yabu li'lak eeke menggerak nogo ta o?

⁴⁶Ogoba nen ayeloman togop eeke me ka wage kenok, ayeloman iniki ale'nggen arigin o.

⁴⁷Ogoba nen at amendek abok aret ayeloman nogo unde logowak nduk, mippigin o, yinuk, abet aret yokkiragi o.

⁴⁸Ndi, aap ayeloman obaabut abu maluk ambi nen, Nogoba elaambirik logonuk woraagin mbaki o, yinuk,

⁴⁹ayeloman ando nogo yawi inooke, it amburu nenok, kumili aganako menggaarak mendek inom lambunik logonet mbi nunggwi, amburu nunggwi,

⁵⁰eeke kenok, aap ayeloman nogo nen, Nogoba ne ndi eyom paga woraagin o, ndi, oonegen ndi paga woraagin o, mbaka'lek ugun kobak kagak wage logominggirik,

⁵¹ayeloman nogo eebe nibik-nabek mbanogo it aakumi iniki laakot logonet, eeko menggaarak piige minggim nogome nappemenggerak logonet, leenggu maake, eyak nggilik maake, eeke logogin o,” yinuk, yoragagerak.