Read Wano MATIYUT 28 Bible Online

MATIYUT 28 - Wano bible

MATIYUT 28

¹It Yakuri tamban eeppunuk, ko'lu kuubondendok Hari Minggu paga, at Mariya Magaralena kunduk, kwe ambi endage Mariya kunduk, imbirak Yetut eebe pereegwam nogome inigen pekkaawok nduk, wogogwaarak.

²Wogwe iigak, mbogut paga yonggo nege menggerak melaikat ambi mbogut paga nen wambi wage nagagirik, yugum tu narak nogo laganogo nappunuk, ti paga awo kwi'nage kagak, o mi nggwok nuk yereegerak.

³Melaikat nogo enete abinak o yabok pogom pindanggage, ayum abinak yanggwi pogom lan agago pege, eeke me,

⁴it tum wako nogogwaarak nogo inagabiti nen inaganak nugirage logonet, aap kanggaatak pogom nugu'lek aago puk ogogwaarak.

⁵Ndi, at mbogut paga yonggo nege menggerak melaikat nogo nen it kumi nogo yorage logonet, ”Kit nen aap Yetut eyo paga nabenogo pegaarak nogo kaawok nduk, wogotak kiigirak me, kinagabiti mbarugup o.

⁶At nen yokkirage nagaarak nogo ndak-ndak aret eenik a'nuk mi'nagaarak me, eebe yime lek o. Windak wonagam mban kinigen kaabagip nduk, wa'nip o.

⁷Pekka wogo logomonggotik, Yetut nogo aap kambunuk nogo menggam nen eenik a'nuk, mi'nage nagaarik, o Nggalileya aa'nduk nagaarak wonage me, ka namunggup o, yinuk, at melaikat nen abet aret yegerak me, yokkira wogo o, yinuk, oone waganggwi nogo mbet-mbet yora nanip o.”

⁸Yorage mbareegi, it kumi nogo ndoome pekka unggwogo nogogwaarik wundi nanuk, inagabiti aganabeegerak kwe, iniki ale'nggen mbakak, puu'nuk it Yetut oone waganggwi nogo yora nogogwaarak.

⁹Yora nogwe me, Yetut inom abuk ogo nogogwaarik, yorage logonet, ”Niriwi wa,” yorage mbareegi, it kumi nogo owagam panggo yi nogo nogogwaarik, iyok ineenggi pippunuk, ayuk wurogo alut eereegwaarak

¹⁰Eeko mbareegwa, Yetut nen, ”Kinagabiti yugup o. An o Nggalileya nage me, time napuri neya nawak nduk, yora nanip o,” yinuk, yoragagerak.

¹¹Yorage mbareegi, it kumi nogo nogwe iigak, it tum wako nogogwaarak ando o tini nogome unggwi nogo nogogwaarik, eeke kogogwaarak nogo it Ala unde inoweewi mbinuk-mbenak agago yorogogwaarak.

¹²Yorogo mbareegwa, it nogo aap inanggok inom kuwak eeko nogogwaarik, wone amburu mbambunuk, it aap yigin unde wako nogogwaarak nogo wu mbuti perak nggwok ambik wogorogo logonet,

¹³”Nit oonikiya nogo yugwi niigak, it Yetut oone waganggwi nogo nen wogo nagaarik, Yetut eebe wonok wunggaarak o, yinuk, ti mban yoranet nugu logonu o.

¹⁴Ndi, wone yi agaarak nogo at nggubereno aruk konengge logominggirik, aaninggin kinoba pinagage kero, nit ninom wone mbanugun o.”

¹⁵Yorogo mbareegwa, it yigin unde nogo nen mbuti wu nogo kologo nogogwaarik, it Ala unde inoweewi nen yorogogwaarak nogo ndak-ndak aret agan nogogwaarak. Ndi, wone nogo ti, aap Yakuri iname lombok wigannagagerak me, yogondak awo aret yogo agaarik o.

¹⁶At Yetut oone waganggwi ineebe 11 nogo nen o Nggalileya puurom ambi paga lagi noorak Yetut nen yoragagim nogome aret lagi nogo nogogwaarik, wonogwe me,

¹⁷Yetut iya wogwe inigen kogo nogogwaarik, ayuk wurogo alut eekwi iigak, it ando nen iniki yungguppegak yogwe wonogwe me,

¹⁸Yetut nogo inowagam panggo yi wage nagagirik, yorage logonet, ”Ala nen mbogut paga inom, nggween paga inom, an unde logowak nduk, awone abok aret kili'nereegerak me,

¹⁹kit yi aakumi ndi aakumi inanebunu lombok an noone waganggo logowak nduk, eerogo piinet nogo logonet, nogoba Ala inom, aput an inom, Aberiniki inom, ninendage ambiret ti paga yiime wuppiigwi,

²⁰yi wone ndi wone yokkirage nagarak nogo ndak-ndak eeko logowak nduk, mamunirogwe, eerit nugu logonip o. An yogondak kuli nen age yobok kuli paga mbo pinagagin lek mondok-mondok ninom aret logogin o,” yinuk, yoragagerak.