Read Wano MATIYUT 4 Bible Online

MATIYUT 4 - Wano bible

MATIYUT 4

¹Kage mbareegi, ti'nuk, Ibilit nen Yetut abut mbanuwak nduk, at Aberiniki nen Yetut wonok karume aakumi lek me nagagerak.

²Nagagerak wonage logonet, nogo 40 yege kagak, liingge-kii'me mbi nengga'lek wonagagerak me, mbi abu eereegerak.

³Mbi abu eeke mbareegi, at aakumi iniki nggagangge menggerak nogo nen wage nagagirik, Yetut yoge logonet, ”Kat Ala aput keenok, yugum yi, mbi aruwak nduk, yoru nda!”

⁴Yoge mbareegi, at Yetut nen, ”Ala nen ari logonet, Aakumi mbi mban nunggwi iinok, ineenik logogun lek o. Yi wone ndi wone Ala wone yugu waganggwi kenok perak, mondok ineenik aret logogun o, yinuk, yereegerak liiru mbanak wonage o.”

⁵Yoge mbareegi, at Ibilit nen Yetut wonok o tini Ala ake leenak minggim nogome nage nagagirik, Ala awi wurik kirin paga pi lagangge nagagirik,

⁶yoge logonet, ”At Ala nen it mbogut paga yonggo nappiige menggerak melaikat nogo, karum logowak nduk, yoramenggerak wogo logomenggaarik, yugum paga kowak kalok yi wangge kero, ineenggi ndoonak paga wambi namunggun o, yinuk, yereegerak liiru mbanak wonage me, kat Ala aput abet aret keenok, wu'mbo wambu nda!”

⁷Yoge mbareegi, Yetut nen, ”Ala nen ari logonet, Kinogoba endagembogut Ala nogo abut mbanggwi mage o, yinuk, yereegerak liiru mbanak ti wonage mban o!”

⁸Yoge mbareegi, at Ibilit nogo nen Yetut wonok puurom mondok nggorek paga lagangge nagagirik, nggween paga yime yi aap ndi aap inendagembogut unde menggam mondok obeelom aret me, aakumi wi ugwi nogo abok aret titigege nagagirik.

⁹”Kat nabu'me tebe yinuk, nayuk wuke keenok, yi abok aret wokkirigin o.”

¹⁰Yoge mbareegi, Yetut nen, ”Kat Ibilit yi, nak o. Ala nen, Kinogoba endagembogut Ala mban ayuk wukwi, at ari kenok mban liippunuk, eerit nogwe, eeko logonip o, yinuk, yereegerak liiru mbanak wonage o.”

¹¹Yoge mbareegi, Ibilit nogo nen Yetut teppunuk, mbagangge kagak, it mbogut paga yonggo nugu menggaarak melaikat nogo nen Yetut iniki eyak wappi wogogwaarak.

¹²Yaya keele maa'nuk wonok nogogwaarak Yetut aruk konengge nagagirik, o Nggalileya nagagerak.

¹³Nage nagagirik, o tini Nataret nogome teppunuk, o Kaperenaum yi yenggenak aa'nggi paga it aap Tembulon mendek inom, Natali mendek inom, iname nogome aret puk a nagagerak.

¹⁴Ti nagagerak nogo, at Ala wone yorage nagagerak nabi ambi Yetaya nogo nen ari logonet, ”It aakumi aap Tembulon Natali inom iname niyo Yoreran enebagan tu yi yenggenak paga nogo menggam, it endekem konenggulik mendek iname o Nggalileya time menggaarak nogo ti, o apit me menggaarak kwe, o eya nggwok kogogwaarak o. Ndi, it kanggwi inoba wigak yereegerak kenok, kanggo menggam wonogwe kwe, o eya inoba pindambiyareegerak o,” yinuk, yereegerak nogo a'me lik yuwak nduk, time aret nagagerak.

¹⁷Nage nagagirik, o ti eyom paga nen Yetut nen aakumi yorage logonet, ”At mbogut paga mendek abu'me pinagarak panggo yi wagaarak me, kiniki koombunuk, kinomaluk mbo pinip o,” yinuk, yoranet nege nagagerak.

¹⁸At Yetut yi yenggenak Nggalileya aa'nggi paga nage logonet, aap oweeluk-awuluk imbirak aap Timon endage ambi Peterut toonak nogo, awot Andereyat imbirak ikan waganggo menggaarak me, ikan wawok nduk, yumunggok yugu yiime wuppugwi enegen iyareegerak.

¹⁹Iige nagagirik, ”Ikan waganggo monggotak ti kokwak, aakumi wogonabit nugu logorak mamungginabikit nduk, ninom nawok o.”

²⁰Yorage mbareegi, yum ikan waganggo menggaarak nogo mbo punuk, inom nogogwaarak.

²¹Inom nogo logonet, oweeluk-awuluk imbirak Yakobut Taberi aput Yaya imbirak, inogoba Taberi inom yiiro paga logonet, yum ikan waganggo menggaarak ogobakkigikwi enegen iige nagagirik, ”Ninom nawok o,” yoragagerak.

²²Yorage mbareegi, yiiro inom, inogoba inom, teppunuk, Yetut inom nogogwaarak.

²³At Yetut o Nggalileya yi awi ndi awi time nege logonet, it tamban eeko menggam wone mamunirage, obeelom wone at mbogut paga mendek abu'me piyoorak wone nogo, aakumi yorage, yi kugi ndi kugi andi kunik mendek inom, ineebe andi-pandi aago inom, obeelom eeginake, eerit nege nagagerak.

²⁴Eerit nege nagagerak wone nogo o Tiriya abok wigak yereegerak me, aap kugi warak apit aret andi alitak lombok kunik mendek inom, inoba andi-pandi aago inom, kugi inikime lik yegetak mendek inom, kugi ineenggi-iniyok puk-puk eeko logonet, kanggwi-ineenik ogwe, eeko menggaarak mendek inom, ineenggi-iniyok nggilik-nggelok aago inom, wogoret at owagam wogo mbareegwa, at Yetut nen obeelom eeginake nagagerak.

²⁵Eeginake mbareegi, aakumi ambik o Nggalileya nen, Ndekapolit nen, Yerutalem nen, Yureya nen, yi Yoreran enebagan nen, ambik aret at inom nogogwaarak.