Read Wano MATIYUT 8 Bible Online

MATIYUT 8 - Wano bible

MATIYUT 8

¹At Yetut puurom paga nen wambi wage mbareegi, it aakumi ambik at mugurok nogwe iigak,

²aap ambi awin aaga'ne kunik Yetut owagam wage nagagirik, abu'me tebe yinuk, ”Ai nogoba. Kat nen obeelom ee'naburak mbake keenok, obeelom ee'naburak op o.”

³Yoge mbareegi, at Yetut eenggi nderogon pigagangge logonet, ”Obeelom eekkaburak mbakirak me, obeelom agago pagagi o,” yinuk, awo yoge kagak, at awin nogo lek aret agagerak.

⁴Lek aret age mbareegi, at Yetut nen, ”Aakumi abu yoraagun o. At Ala unde menggerak nogo enegen keyaawak nduk, owagam nak o. An obeelom eekkakirak me, Muta nen, Ala ake ndogop puurak o, yereegerak nogo ti, aakumi kaawak nduk, pi nak o,” yinuk, yoreegerak.

⁵Yoge mbareegi, o Kaperenaum unggwi wagagerak wonage me, it aap yigin unde inowe ambi Yetut owagam wage nagagirik, nggino yoge logonet.

⁶”Ai nogoba. An nayeloman eenggi-iyok nggilik-nggelok aago oome windak logonet, andi nggwok yagan wake agaarik o.”

⁷Yoge mbareegi, at Yetut nen, ”An nen obeelom eeri woraagin o.”

⁸Yoge mbareegi, at aap yigin unde inowe nogo nen, ”Ai nogoba. An aap mbuuluk me, kat nen an name unggwi woroorak meek o. Koone mban yemenggendak keenok, nayeloman obeelom arigin o.

⁹An kunduk noweewi inabu'me logonet, inoone konengge, ndi, an nawuri yigin unde an nabu'me logonet, an noone konenggwi, eeko monggoorak me, an nen aap ambi, Nak o, yoge neenok ti, nage aret. Ndi, aap ambi, Mok o, yoge neenok ti, wage aret. Ndi, an nayeloman ambi, Kat yi eeru o, yoge neenok ti, eeke, eeko menggaarak aret o.”

¹⁰Yoreegerak nogo at Yetut aruk konengge nagagirik, ”Wi!” yinuk, pi wake logonet, it inom wogogwaarak nogo yorage logonet, ”It Iterali mendek inenggela'me nen aap iniki abet nombake yogop yi ambi, an kaga'lek aret agarik o, yinuk, abet aret yokkiragi.

¹¹Aakumi ambik agi-ogu nen wogo logomenggaarik, Abarakam kunduk, Itak kunduk, Yakup kunduk, inom at mbogut paga mendek abu'me piige minggim laago larak noorak nduk, kuwak ari nagun kwe,

¹²it ando, Ala abu'me pinaniyak nit aret, mbakwi nogo perak, ineebe o apit me endekem time mbo nappiyamenggerak time logonet, leenggu maakwi, ineyak nggilik maakwi, eeko logogun o, yinuk, yokkiragi o,” yoragagerak.

¹³Yorage nagagirik, Yetut nen aap yigin unde inowe nogo yoge logonet, ”An eeriyak abet nombakendak nogo ndak-ndak eeppagagin me, kame nak o.” Yoge mbareegi, ayeloman nogo ne ti eyom paga aret obeelom agagerak.

¹⁴Obeelom age mbareegi, Yetut nogo Peterut ame unggwage nagagirik, owanggelo inikime kani pereegerak andi nen windak wonage enegen kagagerak.

¹⁵Kage nagagirik, eenggi pigagangge mbareegi, andi lek a'nuk, kwe nogo mi'nage nagagirik, at ake eeke nagagerak.

¹⁶Ti'nuk, o kiyoma age kagak, aakumi nen it kugi inikime lik yereegwaarak ambik wogoret, at owagam piya wogo mbareegwa, Yetut oone paga it kugi ineebe iigulik mendek nogo nggiginogo wumbiige, it andi kunik mendek abok aret obeelom eeginake, eereegerak.

¹⁷Ti eereegerak nogo ti, at Ala nen at oone yorage nagagerak nabi ambi Yetaya nogo yoge kagak, at Yetaya nen ari logonet, ”At nen andi-pandi ee'ninake nogo wagangge, ndi, kugi andi lombok ee'ninake nogo lek eerogo pinanege, eereegerak o,” yinuk, yereegerak nogo a'me lik yuwak nduk, aakumi obeelom aganake nagagerak.

¹⁸At Yetut nen it aakumi ambik at owagam ninggirik wonogwe nogo enegen iige nagagirik, at oone waganggwi nogo yorage logonet, ”Yi yenggenak enebagan wunda nawok o,” yinuk, yorage mbareegi, wunda nawok nduk eekwi me,

¹⁹aap Ala wone liiru mbanak unde menggerak ambi Yetut owagam wage nagagirik, ”Nogoba Ngguru wae. Kat nege logorak mbake keenok, an nimbirak aret nege logokit o.”

²⁰Yoge mbareegi, Yetut nen, ”It pagi ti, enoona wonogwe, ndi, towe mbogut paga nugu menggaarak nogo inawiina wonogwe kwe, an aap aret nda'nagagirak yi perak, nogo yege minggim abu lek aret o,” yinuk, yoreegerak.

²¹Yoge mbareegi, aap oone wagangge menggerak alik ambi nen Yetut yoge logonet, ”Ai nogoba. An nogoba aa'nduk nggween taambunuk, nimbirak nawok nen, E, yo'niru o.”

²²Yoge mbareegi, Yetut nen, ”It aakumi kambeegwaarak mendek nen inowe-inawot kanggwi nogo nggween taambiigo logowak nduk, teppiinok, an nimbirak nugu logowok o,” yinuk, yoreegerak.

²³Yoge nagagirik, Yetut yiiro paga unggwi nage mbareegi, at oone waganggwi nogo inom unggwi nogo nogogwaarik, wunda nogwe me,

²⁴o wiya koba'le nggwok yi yenggenak paga nabuninuk wage logonet, yi nogo kilaarak-mogonik eerogo yiiro nogo taaniyak eeke kagak, at Yetut nogo, nogo yege wonagagerak.

²⁵Nogo yege wonage me, it nen nogo nogogwaarik, eenik eeppogo logonet, ”Ninogoba! Yi ndonggonninaburak eeke me, mbet-mbet ninagap ndaru o.”

²⁶Yogo mbareegwa, Yetut nen, ”Kit kiniki liirogon abet nombaka'lek monggotak yi, nonggop nduk kinagabiti yogo ogotik?” yorage nagagirik, mi'na'nuk, o wiya inom, yi inom, mberege mbareegi, abolok lek abu puk aret agagerak.

²⁷Puk age mbareegi, it aakumi nogo nen, ”Wi!” yinuk, pi wako logonet, ”Wologwe. O wiya inom, yi inom, at oone konengge menggerak yi, aap nano mendek mbakop?” yinuk, yereegwaarak.

²⁸It aakumi Nggarara mendek iname time aap mbere kugi inikime unggwagagerak inanini inagaket yogwe me, aakumi inagabiti nen tu ti paga nogolik me, Yetut yi yenggenak enebagan wunda nage nagagirik, o time unggwage mbareegi, aap mbere nogo ndoome aakumi kanggwi iinok, piigo menggam nen Yetut ka wundi wogogwaarak.

²⁹Ka wundi wogo nogogwaarik, inoone nggwok paga yogo logonet, ”Ala aput wae. Kat nonggop ee'ninabikit nduk wagan o? Ninooriyak eyom awo kaga, aa'nduk ninoori wagandak ya?” yoreegwaarak.

³⁰O nda time wam ambik inogobak eerit ambit me nugwi iigo nogogwaarik,

³¹it kugi nogo nen Yetut yogo logonet, ”Ai Yetut. Kat nen nggiginogo wumbinaniyak mbake keenok, wam ambik inikime time unggwi nawok nduk, nggiginogo nappinanu o.”

³²Inoone nabek togon Yetut yogo mbareegwa, Yetut nen, ”Nanip o,” yorage mbareegi, kugi nogo aap inikime nen wundi nogo nogogwaarik, wam inikime unggwi nogo mbareegwa, wam nogo abok aret elan me nogome nen yuulu agan yiime tabu-tabu unggwit nogo mbareegwa, yi nogo nen ndonggoninabeegerak.

³³Yi ndonggoninake mbareegi, it wam ndegeninako nogogwaarak nogo, kole mbaganit o tini nggwok nogome nogo nogogwaarik, it aap kugi inikime lik yereegwaarak obeelom eeginabeegerak inigen kogogwaarak nogo abok aret mbininogo yorogogwaarak.

³⁴Yorogo mbareegwa, it aap o time menggaarak abok aret Yetut ka wogo nogogwaarik, it iname time nen wundi nawok nduk, inoone nabek togon yoreegwaarak.