Read Wano MATIYUT 9 Bible Online

MATIYUT 9 - Wano bible

MATIYUT 9

¹Yogo mbareegwa, Yetut yiiro paga unggunuk, yi yenggenak yibagan wunda wage nagagirik, at ame aret wage mbareegi,

²aap ambi eenggi-iyok nggilik-nggelok aago me, at nogo yege menggerak nogo paga aret ewu'nuk, Yetut owagam pi wogo mbareegwa, at Yetut nen it iniki at abet ombakwi yelok iige nagagirik, aap eenggi-iyok nggilik-nggelok aago nogo yoge logonet, ”Naput wa! Komaluk nogo lek eerogo pagagirak me, kiniki kwi'ndak logot o.”

³Yoge mbareegi, it Ala wone liiru mbanak unde nogo nen, ”Ie! Aap yi, Ala miyuk-meya agago pege agaarik ubi,” yinuk, yereegerak.

⁴At Yetut it iniki mbakwi nogo yelok iige nagagirik, ”Kit nonggop nduk kinikime maluk aret koonggo ogotik?

⁵Komaluk lek eerogo pagagi, yoriyak ti, iya ilik, mi'na'nuk, nege logot, yoriyak ti, iya a? Kit yinip nda!

⁶Ala nen an aap aret nda'nagagirak nogo nggween paga aakumi inomaluk lek eerogo piyoorak unde mippaneegerak kineenu arubagipnduk, yogirak me,” yinuk, yorage nagagirik, aap eenggiiyok nggilik-nggelok aago nogo yoge logonet, ”Mi'na'nuk, kat nogo yege menggendak ndoonak ti, ko'nok, kame nak o.”

⁷Yoge mbareegi, aap nogo mi'na'nuk, ame aret nagagerak.

⁸Ti eereegerak nogo, it aakumi inigen kogo nogogwaarik, inagabiti a'nuk, ”Ala nen it aakumi togop eeko logowak nduk, unde eerogo mippiige menggerak me, iya!” yinuk, wogoppereegwaarak.

⁹At Yetut o time nen wundi nage nagagirik, tu paga nage logonet, aap ambi endage Matiyut pemerintah inake kuwak eeko menggam kwi'ndak wonage enegen kage nagagirik, ”Nimbirak nawok nduk, omok o.” Yoge mbareegi, mi'nage nagagirik, Yetut imbirak aret nagagerak.

¹⁰Imbirak nage nagagirik, Yetut oome unggunuk, at oone waganggwi mendek inom mbi nunggwi me, it pemerintah inake kuwak eeko menggaarak mendek inom, it maluk eeko menggaarak mendek inom, ambik Yetut ka unggwogo nogogwaarik, at Yetut nogo at oone waganggwi inom mbi nawok nduk, kwi'nogogwaarak.

¹¹Kwi'na'nuk, inom mbi nunggwi nogo it aap Pariti mendek nen inigen iigo nogogwaarik, Yetut oone waganggwi nogo yorogo logonet, ”Kinowe Ngguru yi, it aap pemerintah inake kuwak eeko menggaarak mendek inom, it maluk eeko menggaarak mendek inom, inom lambunik logonet, nonggop nduk mbi nengge agaarik o?” yinuk, yorogogwaarak.

¹²Yorogwe nogo at Yetut aruk konengge nagagirik, ”It kugi andi lek kenok ti, aap Ndotet ka noorak mbakulik o. Ata, andi kenok mban obeelom aganabuwak nduk, Ndotet ka noorak mbako menggaarak o.

¹³It aap iniki koonak menggaarak kagak inayonggo pikit nduk, an woroolik o. Ata, it aap maluk eeko menggaarak kenok mban inayonggo pikit nduk wagagirak me, Ala nen ari logonet, Kinaanggo ndomba warogo nake panegak mban eekwi nogo ti, an uugwe lek o. Ata, aakumi inabuwa nen obeelom eeppiigak yuurak ti perak, an, Ao, lombok mbake minggirak o, yinuk, yereegerak liiru mbanak nogo alom mamunggola nanip o,” yinuk, yoragagerak.

¹⁴Yorage mbareegi, it Yaya oone waganggwi nogo nen Yetut owagam wogo nogogwaarik, ”Nit kunduk, it aap Pariti kunduk, mbi nengga'lek ninambe mage negen logonet, tamban eeko monggoorak kwe, it kat koone waganggwi yi perak, nonggop nduk togop eekulik o?”

¹⁵Yogo mbareegwa, Yetut nen, ”Aap kwe kolage me, owe-awot inom laago larak nonggo logonet, it iniki aaninggin nen puru aago logorak mbakop? Lek o. Owe-awot nogo iigak, ogonggelo nogo mban wonok noorak eyom panggoni wage nogo paga perak, iniki aaninggin nen mbi nengga'lek inambe mage negen logogun o.”

¹⁶Yorage nagagirik, ”Yum maan yugu paga ligi ngget laanogo penggaakwi kenok, ligi ngget laanak nogo wonage kagak, yum maan yugu nogo nibik ari menggerak me, ligi ngget laanogo yum maan yugu nogo penggaakulik o.

¹⁷Ndi, eyoonggen amburu ngget mendek yiiwak wam agabolo maan ogobakkigirik me tookwi kenok, yiiwak wam agabolo ogobakkigirik nogo tubuk ari logonet, eyoonggen amburu kiluk ari, ndi, yiiwak eebe telak ari, eeke menggerak me, eyoonggen amburu ngget mendek yiiwak maan mendek nogo paga tookulik o. Ata, eyoonggen amburu ngget mendek yiiwak ngget ogobakkigirik me, tookwi kenok, eyoonggen amburu inom, yiiwak inom, inaani toolak aret menggerak o,” yinuk, yoragagerak.

¹⁸Yorage nagagirik, awo inom wone mbangge kagak, aap Yakuri inarum menggerak ambi wage nagagirik, Yetut abu'me tebe yinuk, yoge logonet, ”An napuluk muk kanggerak kwe, eebe keenggi piga nage keenok, eenik aret arigin o.”

¹⁹Yoge mbareegi, Yetut mi'na'nuk imbirak nogwe me, it Yetut oone waganggwi mendek mugurok nogogwaarak.

²⁰Nogwe me, kwe ambi amiya eeke kagak 12 tahun eereegerak me, Yetut tu paga nage kagak, kwe nogo at ambo'me wage nagagirik, inikime nen, ”Ayum mban neenggi pigagangge neenok, obeelom ee'nabigin o,” mba'nuk, ayum irip eenggi pigaganeegerak.

²²Pigagangge mbareegi, at Yetut ena logurogon enegen pekkage nagagirik, ”Napuluk wa! Kiniki kwi'ndak logot o. Kat kiniki noba panggombunuk abet nombakendak paga obeelom agan o,” yinuk, yoge mbareegi, kwe nogo ti eyom paga aret obeelom agagerak.

²³Obeelom age mbareegi, at Yetut nogo aap Yakuri inarum menggerak nogo ame ari nage nagagirik, it time mendek nen leendawi tiyanggwi, ndi, aakumi kuwak aago nogo noone-koone yogwe, eekwi enegen iige nagagirik,

²⁴”Kolaga yi kambulik we nogo yege me, mbaganinip o.” Yoragagerak kwe, it nen at agi'ndok kambeegwaarak.

²⁵Aakumi kuwak aago nogo mugogo wumbiinok, oome unggwage nagagirik, eenggi pigagangge mbareegi, kolaga nogo mi'nagagerak.

²⁶Ndi, Yetut eereegerak nogo o time abok aret wigak yereegerak.

²⁷At Yetut o time nen nage mbareegi, aap mbere inigen mbuk me, inoone nggwok agan mugurok nogo logonet, ”Ndawut ombooluk yi wae. Ninabuwa mbaru o.”

²⁸Yorit mugurok nogwe iigak, at Yetut nogo oome unggwage nagagirik, wonage me, it aap inigen mbuk nogo at owagam wogo mbareegwa, Yetut nen it yorage logonet, ”An nen kit obeelom eekkinaburak kiniki abet nombako ogotik ilik, lek a?” Yorage mbareegi, it nen, ”E o, ninogoba.”

²⁹Yogo mbareegwa, at Yetut eenggi inigen paga mbaaniige logonet, ”Kiniki abet nombakotak nogo ndak-ndak aret eeppinagagi o,” yinuk,

³⁰yorage mbareegi, inigen obeelom aret ogogwaarak. Obeelom ogo mbareegwa, Yetut oone omaawi togon yorage logonet, ”Aakumi abu yoraagup o.”

³¹Yoragagerak kwe, it nogo, nogo logonet, ”Yetut nen obeelom ee'ninakerak o,” yinuk, o time abok aret yoranet nogo nogogwaarak.

³²It aap nogo yoranet nugwi iigak, aap ambi kugi inikime unggwagagerak oone lek wonage me, Yetut owagam wonok wogo mbareegwa,

³³kugi nogo nggiginogo wumbege mbareegi, at oone lek mendek nogo oone warak aret agagerak. Oone warak age mbareegi, it aakumi kuwak aago nogo nen, ”Wi!” yinuk, pi wako logonet, ”Nit aap Iterali mendek niname yime togop ambi eekwi iigulik kwe, aap yi eeke kogo o,” yinuk,

³⁴yereegwaarak kwe, it aap Pariti nen perak, ”Kugi iyagalo nen yoreegerak paga at kugi aakumi inikime nen nggiginogo wumbiige menggerak o,” yinuk, agan nogogwaarak.

³⁵At Yetut o tini mbuuluk me, nggwok me, yanggwagak-ndanggwagak nege logonet, it tamban eeko menggam wone mamunirage, obeelom wone at mbogut paga mendek abu'me piyoorak wone nogo aakumi yorage, it yi kugi ndi kugi andi kunik mendek inom, ineebe we andi-pandi aago inom, obeelom eeginake, eerit nege nagagerak.

³⁶Eerit nege logonet, wam ndomba inarum wonogwe lek me, mbaganit nogo logonet, ineeruwak yini'nggin-piini'nggin aago tat warit nogo mengga kwak, it aakumi ambik at mugurok nugwi nogo togop aret aago enegen iige nagagirik, mondok inabuwa mbareegerak.

³⁷Inabuwa mbake nagagirik, at oone waganggwi nogo yorage logonet, ”Eebe yugu ka'lek agaarak kwe, mbanggo menggaarak ineebe mbere iluk me,

³⁸at yugu unde menggerak nogo nen aap eebe yugu mbani noorak nappiyaawak nduk, yogo logonip o,” yinuk, yoragagerak.