Read Wano MARAKUT 10 Bible Online

MARAKUT 10 - Wano bible

MARAKUT 10

¹Yorage nagagirik, o time teppunuk, tu yi Yoreran enebagan nen o Yureya unggwi nagagerak. Unggwi nage mbareegi, aakumi ambik at owagam kuwak ari nogo mbareegwa, wone mamunirage menggi kwak aret mamuniragagerak.

²Mamunirage me, it Pariti mendek ando nogo at owagam wogo nogogwaarik, abut mbanuwok nduk yogo logonet, ”Muta nen ari logonet, Aap nen inakuwi mbo piyoorak op, yereegerak mbaken a, lek a?”

³Yogo mbareegwa, at Yetut nen, ”At Muta nen wone nonggop yokkiragagerak o?”

⁴Yorage mbareegi, it nogo nen, ”At Muta nen ari logonet, Kwe mbo pigi o, yinuk, liiru mbanogo punuk nen mban mbo puurak op o, yinuk, yereegerak o.”

⁵Yogo mbareegwa, at Yetut nen, ”Kinogogun laakot kiinok, wone ti, liiru mbanggiragagerak kwe,

⁶at Ala nen o aa'nduk yi mendek ndi mendek wakkage logonet, aap ogobakkigike, kwe ogobakkigike, eerogo piige nagagirik,

⁷ari logonet, Aap nen agalo-ogoba teppiinok, akweeluk imbirak lambunna'nuk,

⁸ineebe mbere kwe, ambit aret arugun o,

⁹yinuk, yereegerak me, at Ala nen lambumbiige nogo ti, aakumi nen ponggonogo piyoorak mage o,” yoragagerak.

¹⁰Yorage nagagirik, oome unggwage mbareegi, at oone waganggwi nogo nen wone yoragagerak nogo, ambinom eegwa'me waganeegwaarak.

¹¹Eegwa'me waganggo mbareegwa, at Yetut nen yorage logonet, ”Aap ambi nen kwe mbo punuk, kwe alik ambi wagangge kenok, akweeluk aa'nduk mendek nogo mbabi agago mbo pege o.

¹²Ndi, kwe nen ogonggolo mbo punuk, aap alik wagangge kenok, kwe ti mbabi aret eeke o,” yoragagerak.

¹³Yorage mbareegi, elege-aabologwe at eenggi piginabuwak nduk, at owagam wogoren wogo mbareegwa, at oone waganggwi nogo nen aakumi nogo mberirogogwaarak.

¹⁴Mberirogo mbareegwa, at Yetut anini ambik age nagagirik, ”It elege-aabologwe an nowagam wogwe me, teppiyaanip o. Ala abu'me logorak ti, it yogop yi aret me, non mbambiigwi ti mage o.

¹⁵It elege-aabologwe Ala abu'me logorak nduk unggwi nogo mengga kwak, kit togop unggwi naga'lek kiinok ti, unggwi namunggup lek o, yinuk, abet aret yokkirage agarik o,”

¹⁶yorage nagagirik, elege-aabologwe waganogo ogome piinok, eenggi inoba pippiinok, ale'nggen inoba piyareegerak.

¹⁷Ale'nggen inoba piige nagagirik, tu nggwok paga naakit nduk eeke mbareegi, aap ambi at owagam puu'nuk wage nagagirik, abu'me tebe yinuk, yoge logonet, ”Nogoba Ngguru wae. Kat obeelom mban menggendak me, an neenik mondok logokit nduk, nonggop eeri o?” yoreegerak.

¹⁸Yoge mbareegi, at Yetut nogo nen, ”Aap ambit ambi obeelom eeke menggerak abu lek o. Ata, Ala alik mban obeelom menggerak me, kat nonggop nduk, Kat obeelom mban menggendak o, yo'negen o?”

¹⁹Yoge nagagirik, ”Yogop ee'nu, ndogop ee'nu, yereegerak wone nogo, Aap wariyak mage o. Mbabi eeriyak mage o. Aap inamendek yogot woorak mage o. Pilit wone aap inoba piyoorak mage o. Aap wi-wi eeginaburak mage o. Kinagalo-kinogoba inoone konenggo logonip o, yereegerak wone nogo kat keenu aret o.”

²⁰Yoge mbareegi, at nogo nen, ”Nogoba Ngguru o. Wone ti abok aret an wulaga mbuuluk paga nen liirogon eeke minggirak aret o.”

²¹Yoge mbareegi, at Yetut ena nomorogon enegen pekkage nagagirik, abuwa mbake logonet, ”Ti abok eeke menggendak kwe, wone ambit iluk perak, awo eeka'lek keegirak nogo yokkiri o. Kat kayi mendek ndi mendek onggo mbanogo it aap inamendek lek mendek nogo tumburira nak o. Tumburirage keenok, kat kamendek mbogut paga nen ambik aret kolaamunggun o. Ti eeke logominggindik, nimbirak nugu logowok nduk wa'nu o,”

²²yoge mbareegi, aap nogo amendek ambik unde wonage me, iniki nomok togon nage logonet, iniki puru agan ame nagagerak.

²³Nage kagak, at Yetut nogo ena logurogon at oone waganggwi nogo pegiige nagagirik, yorage logonet, ”It aap ineenggi warak iinok, at Ala abu'me piige minggim unggwi noorak meek negen kagi o,” yoragagerak.

²⁴Yoragagerak nogo paga at oone waganggwi nogo, ”Wi!” yinuk, pi wako mbareegwa, at Yetut nen, ”Nawuri o. At Ala abu'me piige menggim unggwi noorak meek negen kagi o,”

²⁵yorage nagagirik, ”Unta wam nggwok liiru eno mbuuluk pelenak me unggwi noorak op negen kwe, aap eenggi warak kenok perak, Ala abu'me piige menggim unggwi noorak ti, meek negen kagi o.”

²⁶Yorage mbareegi, it nogo inagabiti ambik ogo logonet, ”Ti kenok, taani inagap ndariyak o?”

²⁷Yogo mbareegwa, at Yetut nogo nen enegen pegiige logonet, ”It aakumi nen eeriyak meek kwe, Ala perak, yi mendek ndi mendek eeriyak op mban wonage o.”

²⁸Yorage mbareegi, at Peterut nen, ”Ndi, nit ninamindik-ninamendek abok mbo punuk, kat ninom aret nugu logorak nduk wogoorak nogora?”

²⁹Yoge mbareegi, at Yetut nen, ”An nabuwa nen obeelom wone nggwok aruwak nduk, kinagalo-kinogoba inom, kinuwe-kinawot inom, kinapurilogwe inom, kinawi wurik inom, kineyabu aago inom, abok aret mbo pugwi kiinok,

³⁰yogondak obaane'me kinagalomini inom, kinuwe-kinawot inom, kinapurilogwe inom, kinawi wurik inom, kineyabu aago inom, apit aret aakumi nen piyakkinakwi iigak, 100 lombok oba luunogo wokkiramenggerak me, peebi kineenik mondok-mondok logomunggup o,”

³¹yorage nagagirik, ”Aap ambik inaa'nduk mendek nogo ti, peebi arugun. Ndi, peebi mendek nogo ti, inaa'nduk arugun o,” yinuk, yoragagerak.

³²O time nen o Yerutalem tu paga nogo logonet, at Yetut aa'nduk nage mbareegi, it at oone waganggwi nogo nen, ”Nonggop ee'ninabemengga?” yinuk, inagabiti nen iniki piirik eerit nogwe iigak, peebi it aakumi inambokan nogogwaarak nogo nen inagabiti agan nogogwaarak. Inagabiti agan nogwe me, at Yetut nen it aap 12 nogo wogoren nage nagagirik, at peebi eeppuurak wone nogo yoragagerak.

³³Yorage nagagirik, ”Wologo wae. Nit o Yerutalem nogo ogoorik o. Time unggwi namonggoorak me, an aap aret nda'nagagirak nogo neebe pigogo, it aap Ala unde inuweewi inom, it Ala wone liiru mbanak unde inom, wogorage kenok, it aap nen nooruwak nduk wone mbambunuk, it aap endekem konenggulik mendek wogoraagun o.

³⁴Wogorogo mbarumengga, nenggali wakwi, inowoori noba lenggenogo panugwi, yawi paga nookwi, eeppaninuk, mondok noorugun o. Nooko mbarumengga, nogo mbere yippunuk, neenik arigin o,” yoragagerak.

³⁵Yorage mbareegi, at Tebereyut apuri Yakobut Yaya imbirak nen at Yetut owagam wogo nogogwaarik, ”Ngguru wae. Nit niniki koonogo punuk, yokkugwi nogo ee'ninabenok nduk wogo o.”

³⁶Yogo mbareegwa, at Yetut nen, ”Kit kiniki nen nonggop eekkinabuwak nduk wogotak o?”

³⁷Yorage mbareegi, it nogo nen, ”Kat peebi kamendek li'luk eekko'nok wage keenok, kat keraanu peenok-peenok kwippinanenok nduk yokkogo o,” yoreegwaarak.

³⁸Yogo mbareegwa, at Yetut nogo nen, ”Kit yo'nugwi ti, kineenggo'lek aret logonet, yo'nogo ogotik. An nagi toolak nagin ti, kit noorak op mbakop? Aakumi yiime wuppiigwi kwak an ambi eeppanugun ti, kit eeppinagagun op mbakop?”

³⁹Yorage mbareegi, it nogo nen, ”E o. Nit eeppinaniyak op aret o.” Yogo mbareegwa, at Yetut nen, ”An nagi toolak noorak nogo ninom aret nunggwi, ndi, an eeppaniyak nogo ninom eeppinanugwi, eerugun kwe,

⁴⁰neebe peenok-peenok logorak ti perak, an nen yokkiroorak meek o. At punogo piyareegerak nogo nen mban aret eeppiyaagin o,” yinuk, yoragagerak.

⁴¹Yorage it ando 10 nogo konenggo nogogwaarik, it Yakobut Yaya imbirak inanini agaket eeppiyareegwaarak.

⁴²Eeppiyareegwaarak kwe, at Yetut nen it abok wiiragagerak wogo mbareegwa, yorage logonet, ”Nit yi aap endekem inarum logorak nduk mippiyareegwaarak ti, inoone omaawi paga lenggeninakwi, ndi, it inogobamini aap nggwok nen eerit nugu logowak nduk inoone omaawi yorogwe, eeko menggaarak kineenu kwe,

⁴³ndi, kit perak, togop lek o. An aap aret nda'nagagirak nogo kit nen an nake eeko logobagip nduk woroolik o. Ata, an nen kit kinake eeke, ndi, kit aakumi apit kinake kambiminggirak paga kinonggo mbambunuk, wondet agago piinogo pinagage, eerikit nduk, wagagirak me, kit aap yi ambi nen nggwok arikit mbake kenok, kinayeloman age, ndi, kit aap yi ambi nen, An nalik nggwok tiyanak logokit, mbake kenok, kit abok kinabu'me logonet, kinake eeke, eeko logomunggup o,” yinuk, yoragagerak.

⁴⁴

⁴⁵

⁴⁶Wone nogo yorage nagagirik, o Yeriko ari nogogwaarak. At oone waganggwi nogo inom, it aakumi ambik kuwak ogogwaarak nogo inom, nogo nogogwaarik, ti'nuk, o Yeriko nogome nen endekem wundi nogwe me, at Timeyut aput Mbaratimeyut enegen mbuk nogo ambe nggino ari nagagerak nogo, tu nggwok ambet paga kwi'ndak wonage me,

⁴⁷at Yetut Nataret mendek wage aruk konengge nagagirik, ”Yetut wae. Kat Ndawut ombooluk yi, an nabuwa mbaru o,” yinuk, oone nggwok togon yoreegerak.

⁴⁸Yoge mbareegi, it aakumi nogo nen oone puk aruwak nduk mberereegwaarak kwe, kagak, abunuk, oone nggwok nabenak mban ari logonet, ”Kat Ndawut ombooluk yi, nabuwa mbaru o.” Yinuk, yogak ari mbareegi,

⁴⁹at Yetut nogo yungguk togon puk age nagagirik, ”Wi'nip o,” yorage mbareegi, it nen aap enegen mbuk nogo wi go logonet, ”Kat wiigege me, nagabiti yugum o Mi'na'nuk nak o.”

⁵⁰Yogo mbareegwa, pilak togon mi'nage nagagirik, ambogoyum endekem nggwe nggoorogo mbo nappegak Yetut owagam aret nagagerak.

⁵¹At owagam nage mbareegi, at Yetut nen, ”An nen kat nonggop eekkaburak mba'nuk ari agandik o?” Yoge mbareegi, at enegen mbuk nogo nen, ”Nogoba Ngguru o. Nenegen obeelom ee'naburak nduk yokkigi o, nogoba.”

⁵²Yoge mbareegi, at Yetut nen, ”Kat kiniki an noba panggombunuk abet mbakendak nogo paga kenegen obeelom agaarak me, kame nak o.” Yoge mbareegi, enegen mbuk nogo pagak ari nagagirik, at Yetut inom tu nggwok paga nogogwaarak.