Read Wano MARAKUT 11 Bible Online

MARAKUT 11 - Wano bible

MARAKUT 11

¹At Yetut inom nogogwaarak nogo o Yerutalem unggwi nawok nduk put Tayitum nogo eegwa'me o tini Mbetapage inom, Mbetaniya inom panggo yi wogo nogogwaarik nogome logonet, at oone waganggwi mendek mbere nappiyakit nduk

²yorage logonet, ”O tini inukuna time nanip. Nogo logomonggotik, awo mbo unggwi nogo logonet, keledai wam awooluk keele mbarenak aakumi amborowak paga kwi'naga'lek aret me, mbarenak kinigen kaamunggup. Kogo logomonggotik, ti aret piinogo wonok wa'nu o.

³Wonok wogwe me, it aakumi time nen, Kit nonggop nduk keledai wam ti piinggo ogotik o? yokkirogwe iinok, kit nen, Nit ninuwe endagembogut keledai wam lek me, Wa nanip o, yo'niragaarak me, wonok nogo logomonggoorik, obaane'me pi woraagun o, yinuk, yoraanu o.”

⁴Yorage mbareegi, it nogo, nogo nogogwaarik, keledai wam awooluk tu nggwok unggwogo menggam taati keeleluwi mbarenak inigen kogo nogogwaarik, piinggo mbareegwa,

⁵it aakumi weelek time wonogwe nogo nen, ”Kit keledai wam awooluk keeleluwi mbarenak ti, nonggop eeriyak nduk piinggo ogotik o?”

⁶Yorogo mbareegwa, it nogo nen, ”At Yetut nen togop yoranu o,” yoragagerak nogo aret yorogo mbareegwa, it nen, ”E o. Wonok nanip o,” yorogo mbareegwa, wonok wogogwaarak.

⁷Keledai wam nogo wonok Yetut owagam wogo mbareegwa, it nogo inayum nggoorogo wam amborowak paga lenggembogo mbareegwa, at Yetut nogo ti paga kwi'nagagerak.

⁸Kwi'nage mbareegi, it aakumi ambik inayum mbiganogo tu nggwok paga ndoonit nogwe, it ando nen eyoongga yabu penaame nen kalenogo ndoonit wogwe,

⁹eeppunuk, at nogo nage kagak, it ando inaa'nduk nogwe, ando ambokan nogwe, eerit nogo logonet, ”Otana o! Ala nen ninuwe endagembogut nappi wagagerak yi, endage wogoppuwok o.

¹⁰Ninombo Ndawut abu'me pinanikit nduk wage me, wogoppuwok o. Mbogut irimbaga menggaarak nogo, Otana, yuwak o,” yinuk, ina'mit agan nogogwaarak.

¹¹Ina'mit agan o Yerutalem unggwi wogo nogogwaarik, at Ala awi wurik me unggwi wogogwaarak. Unggwi wogo nogogwaarik, at Yetut nogo yi mendek ndi mendek enegen yomboonit nege nagagirik, o kiip arikit nduk eeke kagak, at oone waganggwi aap 12 nogo inom o Mbetaniya unggwi nogogwaarak.

¹²Nogo yippunuk, ko'lu nen o Mbetaniya nen tu paga wogo logonet, mbi abu eereegerak.

¹³Eeke mbareegi, at Yetut nogo nda nen eyo ara ambi engga ambik enegen nakkage nagagirik, ”Eyo nogo anggen yugu ilik, lek a?” yinuk, alome panggorogon pekka nage nagagirik, anggen yuurak eyom awo ari waga'lek me, engga mban enegen kagagerak.

¹⁴Engga mban enegen kage nagagirik, eyo eebe nogo yoge logonet, ”Kat kanggen aakumi ambi nonggo logogun mondok lek o,” yoge at oone waganggwi nogo inaruk koneneegwaarak.

¹⁵At Yetut oone waganggwi inom o Yerutalem ari nogo nogogwaarik, at Yetut nogo at Ala awi wurik me unggwage nagagirik, it aakumi Ala awi wurik me nogome yi mendek ndi mendek onggo mbanggwi, onggo kologwe, eekwi nogo mugogo wumbiige logonet, it wu onggo-onggo eeko menggaarak inagayo ndoonak inom, it towe puume negen onggo inoba pogo menggaarak inagayo kwi'ndak menggaarak nogo inom, aa'nggan nggininogo wuppereegerak.

¹⁶Wuppege nagagirik, ”Kit Ala awi wurik me yime yi mendek ndi mendek wonok yinggwi-unggwogwe eerugup o,”

¹⁷yorage nagagirik, wone mamunirage logonet, ”An nawi wurik yi, yi aakumi ndi aakumi inanebunu lombok nen tamban eeko menggam yi aret yogo logorak o, yinuk, liiru mbaneegerak nogo lek a? Liiru mbaneegerak kwe, kit perak, o yi, aap yogot wappunuk kiraa'nari nogo menggam negen eekwi kiigi o,” yinuk, yoragagerak.

¹⁸Yorage mbareegi, it Ala unde inuweewi inom, it Ala wone liiru mbanak unde inom nogo nen wone yorage nogo inaruk konenggo nogogwaarik, it aakumi abok kuwak aago nogo wone mamunirage paga pi wako nogogwaarak me, inagabiti ogo nogogwaarik, ”Nonggop togon waruwok mbakop?” yinuk, abok mbaneegwaarak.

¹⁹Ndi, o kiip age mbareegi, Yetut at oone waganggwi inom o tini nggwok me nogome nen wundi nogogwaarak.

²⁰Wundi nogo nogogwaarik, nogo yinuk, ko'lu kuuben tu paga wogo logonet, eyo ara nogo omanggen inom abok aret mbuk agagerak kogogwaarak.

²¹Kogo nogogwaarik, Peterut nen eyo yoge kagagerak nogo abe'nage mbareegi, ”Ngguru wae. Eyo ara pulunogo pegendak nogo mbuk agaarak yi, kenegen pekket o.”

²²Yoge mbareegi, at Yetut nen, ”Kiniki nen Ala oba panggombunuk abet mbake logot o.

²³Kiniki yungguk-pegak eeka'lek kinoone yogwe ndak-ndak arigin mbako logonet, Puut nggwok yi, Aan wogonogo yi yenggenak me lebengge keyaagin o, yogwi kiinok, togop aret eeke kaamunggup o, yinuk, abet aret yokkiragi o.

²⁴Kit tamban eeko logonet, yi mendek ndi mendek nggino'nuk, Muk kolagarak o, yinuk, abet mbakwi ti paga wokkirage kaamunggup.

²⁵Kit mi'na'nuk, tamban eeko logonet, aap ambi kinom ogoorak wonage kenok, kinogoba mbogut paga wonage nogo nen kit kinomaluk lek eerogo pinagawak nduk, at omaluk kit nen kinami eeppunuk logonip o,” yinuk, yoragagerak.

²⁷Yorage nagagirik, ti'nuk, iniyok paga Yerutalem wogogwaarak. Wogo nogogwaarik, at Yetut nogo Ala awi wurik me unggwage nagagirik, nege kagak, it Ala unde inuweewi inom, Ala wone liiru mbanak unde inom, it aap inanggok inom, at owagam wogo nogogwaarik,

²⁸”Kat yi eekak ndi eekak eeke menggendak nogo, ta oone paga eeke agandik? Ta nen yokkereegerak paga eeke agandik o?”

²⁹Yogo mbareegwa, at Yetut nen, ”An wone ambi kin wakkiya o. Onggo yo'nugwi kiinok perak, ta oone paga eeke minggirak nogo paganogo yokkiraagin o.”

³⁰Yorage nagagirik, ”At Yaya yiime wuppiige nagagerak nogo ti, mbogut paga nen yoreegerak paga wuppiige nagagerak a, aakumi nen yoreegwaarak paga wuppiige nagagerak a? Kit yo'ninip nda!” yoragagerak.

³¹Yorage mbareegi, it-it wone mbanggo logonet, ”Nit nen, Ninogoba mbogut paga nen yoreegerak paga eeke nagagerak o, yogwi niinok, at nen, Ndi, ti kenok, kit kiniki nonggop nduk at abet mbaka'lek wonogotak? yo'niraagin.

³²Ndi, nit nen, Aakumi nen yoreegwaarak paga eeke nagagerak o, yogwi niinok, Iya!” yinuk, it aakumi abok aret, at Yaya Ala wone yorage menggerak nabi mendek aret mbakwi ineenu me, inagabiti nen,

³³Yetut yogo logonet, ”Nit nineenggo'lek o,” yoreegwaarak. Yogo mbareegwa, ”Ndi, ti kenok, an kunduk ta oone paga eeke minggirak yokkiraagin lek o,” yoragagerak.