Read Wano MARAKUT 12 Bible Online

MARAKUT 12 - Wano bible

MARAKUT 12

¹Yorage nagagirik, wone eegu laarogo yorage logonet, ”Aap ambi nen anggur awi yappunuk, yagat wuke, amburu mburunogo wurabuurak tenggap mendaake, ndi, tum wako logorak nduk eyo ndoongge, eeppege nagagirik, at eyabu aago me arum piinok, o nda alik me time nagagerak.

²Nage nagagirik, time logonet, anggur anggen yugu nogo kole age mbareegi, at ayeloman nogo amendek anggen mbanogo wogoruwak nduk, it at eyabu aago arum wonogwe me nogome nappi wagagerak.

³Nappi wagagerak nogo wage mbareegi, it at eyabu aago arum wonogogwaarak nogo nen pippunuk, yawi wappogo nogogwaarik, anggen mbanogo wogorulik aret, we nappereegwaarak.

⁴Yawi warogo nappereegwaarak nage mbareegi, ambokan at ayeloman ambi inowagam nappi wagagerak. Nappi wage mbareegi, it nogo nen yawi anobak telanogo wappogo nogogwaarik, enggali wareegwaarak.

⁵Enggali wako mbareegwa, ambokan ambi nappi wagagerak. Wage mbareegi, mondok wako mbareegwa, ti'nuk, apit aret nappiya wagagerak me, ando we yawi inookwi, ando mondok inookwi, eereegwaarak.

⁶Inoorit nogo mbareegwa, aput ambit aret iniki kunik nogo nappega'lek imbirak wonagagerak me, An naput yi, ayuk wuko logonet, keyage warogo waagun kagi o, yinuk, inowagam nappi wagagerak.

⁷Nappi wagagerak wage mbareegi, it at eyabu aago arum wonogwe nogo nen wone mbanggo logonet, Eyate koloorak at aput yi aret me, eyate nit kolawam mondok waruwok o,

⁸yogo nogogwaarik, eebe pigogo mondok wappogo nogogwaarik, wonok anggur yabu aago endekem nggwe time aret wumbereegwaarak o,” yinuk, wone ti at Yetut nen eegu laarogo yoragagerak.

⁹Yorage nagagirik, ”At anggur yarak unde nogo nen nonggop eeginabigin mbakop? Lek o. At wage logominggirik, eyabu arum wonogwe nogo inoorogo piinok, inobaane'me aap alik arum logorak nduk mippiyaagin o.

¹⁰Ala wone yi, It yugum o wuko menggaarak nogo, o wuko logonet, yugum ambi mbo pereegwaarak nogo ti, yugum ogowa ndoonnaga o.

¹¹At ninogoba endagembogut eereegerak nogo ninigen kogo nogootik, Wi! yinuk, pi wako ogoorik o, yinuk, Ala wone liiru mbanak nogo pekkaga'lek me yogo ogotik ya?” yinuk, yoragagerak.

¹²Yorage mbareegi, it nogo nen, ”Nit niinok, ari,” yinuk, yelok kogo nogogwaarik, pigaawok nduk eereegwaarak mendek, aakumi ambik mbareegwa, inagabiti nen teppunuk nogogwaarak.

¹³Teppunuk, nogo nogogwaarik, it Pariti mendek ando inom, it Keroriyan mendek ando inom, oone ninggin yemenggerak paga yilinogo oba puwok nduk nappiyareegwaarak.

¹⁴Nappiyareegwaarak nogo, at Yetut owagam wogo nogogwaarik, ”Ngguru wae. Kat nen aap ambi iya, ndi, ambi meek mbake logonet, ninenete liippinaninuk yo'nirage lek nit eekwi paga Ala ari menggerak wone mondok pagak togon yo'nirage menggendak nineenu me, aap pemerintah endagembogut Kayitat ake puurak op a, mage a? Teppuurak op a, mage a?”

¹⁵Yogo mbareegwa, it iniki laakot logonet yogwi yelok iige nagagirik, ”Kit nonggop nduk an nabut mbanuwok nduk yo'nogo ogotik o? Mbuti wu an nenegen kaakit nduk wo'niri woraanip o.”

¹⁶Yorage mbareegi, wogori nogogwaarak. Wogori nogo mbareegwa, at nogo nen, ”Yi ta enete ogobakkigirik endage liiru mbanak wonage mbakop?” Yorage mbareegi, it nogo nen, ”Lek o. Ti Kayitat aret o.”

¹⁷Yogo mbareegwa, at Yetut nogo nen, ”Ti kenok, Kayitat amendek ti, Kayitat aret wogogwi, ndi, Ala amendek ti, Ala aret wogogwi, eeko logonip o,” yinuk, yorage mbareegi, it nogo nen, ”Wi!” yinuk, pi wareegwaarak.

¹⁸Pi wako mbareegwa, it Taruki mendek nen aakumi kambunuk, ineenik a'nuk mi'narugun lek yogo menggaarak nogo at owagam wogo nogogwaarik, kin wakkogo logonet,

¹⁹”Ngguru wae. At Muta nen, Aap ambi kwe wappunuk apuluk ndaka'lek kagak kangge kenok, at owe obaane'me apuri ndaruwak nduk awot nen aret kolaawak o, yinuk, liiru mbaneegerak me,

²⁰aap ambi apuri ineebe 7 ndaganabeegerak me, at manggu nogo nen kwe wagangge nagagerik, apuluk nda'naga'lek kagak, kambeegerak.

²¹Kangge mbareegi, awuluk ambokan mendek nen kwe nogo wagangge nagagirik, apuluk ndaka'lek kagak mban kambeegerak. Kangge mbareegi, at awot ambokan mendek wagangge nagagirik, togop aret ndaka'lek kagak kambeegerak.

²²It ineebe 7 nogo inapuri ndaganaka'lek logonet mban kambit nogogwaarak me, at kwe nogo eebe peebi kambeegerak.

²³It aap 7 kwe nogo waganggwi-kanggwi mban eeko nogogwaarak me, aakumi kanggwi ineenik agago mippiyoorak eyom paga peebi aap ta akwe arigin mbaken?” yinuk, yoreegwaarak.

²⁴Yogo mbareegwa, at Yetut nen, ”Ala wone liiru mbaneegerak wone inom, at Ala omaawi inom, kit liippega'lek logonet, wone ti alik lombok mba'nuk yogwe kiigi o.

²⁵Peebi it aakumi kambunuk nogo menggam nen ineenik agago mippiige mbariminggi, aap nen kumi wogonakwi, kumi nen aap wogonakwi, eeka'lek it mbogut paga yonggo nugu menggaarak melaikat nogo pogom aret logogun o.

²⁶It aakumi kambeegwaarak ineenik agago mippiyaagin nogo ti, at Muta nen wone liiru mbaneegerak nogo paga mbangge logonet, Abarakam inom, Itak inom, Yakup inom, inogoba endagembogut Ala an aret o, yinuk, eyo alookwi alome nen kani wunuk ari kagak, yoreegerak liiru mbaneegerak nogo kit pekkaga'lek ogotik ya?

²⁷At Ala ti, yi aakumi kambunuk lek agaatak inogoba endagembogut lek o. Ata, it ineenik menggaarak inogoba endagembogut aret me, kit wone ti alik lombok yogwe kiigi o,” yoragagerak.

²⁸Yorage mbareegi, it Ala wone liiru mbanak unde nogo mendek ambi inowagam wagagerak. Wage nagagirik, it wone wakwi nogo aruk konembunuk, at Yetut wone onggo obeelom aret yorage kage nagagirik, ”Yetut wae. At Ala nen wone lengganogo yo'nirage logonet, Yogop ee'nu, ndogop ee'nu, yo'niragagerak nogo, wone alom nggwok negen ngge kagandak o?”

²⁹Yinuk, kin wagangge mbareegi, at Yetut nogo nen, ”Wone alom nggwok nogo yi o,” ari nagagirik, ”Kit aap Iterali yi, kinaruk logonip o. Kinogoba endagembogut Ala ti alik aret menggerak me,

³⁰kineebe kinomaawi inom, kiniki kinogoma inom, abok aret kinogoba Ala mban kiniki kunik eeko logonip o, yinuk, yoragagerak wone alom nggwok nogo ti aret o.

³¹Ndi, wone ore ambi ti, Kit kineebe kiniki kunik eekkologo monggotak kwak, it kinom wonogwe nogo togop aret kiniki kunik aganako logonip o, yinuk, wone mbere iya lombok yereegerak yi kokwak ambi wonage abu lek o,” yoreegerak.

³²Yoge mbareegi, at Ala wone liiru mbanak unde nogo nen, ”E o, nogoba. Op aret yagan o. At eebe mbere lek alik aret menggerak me, abet aret yagan o.

³³Ndi, nineebe ninomaawi inom, niniki ninogoma inom, abok aret ninogoba Ala mban niniki kunik logorak. Nineebe niniki kunik eekkologo monggoorak kwak, ninom wonogwe nogo togop aret niniki kunik aganako logorak ti, nggwok o. Ndi, Ala aanggo warogo apit kani nawak nduk kumbugwi, Ala ake pugwi, eekwi ti, abok mbuuluk me, abet aret yagandak o, nogoba.”

³⁴Yoge mbareegi, at Yetut nen aap nogo iniki warak nen ari kage nagagirik, ”Kat keebe Ala abu'me pagarak panggoppake keegi o.” Yoge mbareegi, it abok aret ambinom at kin wakkoorak inagabiti agagerak.

³⁵Yorage nagagirik, at Yetut nogo nen ne ambi paga Ala awi wurik me mamunirage logonet, ”It Ala wone liiru mbanak unde nogo nen, At Ala nen leenogo mippereegerak Mesias nogo ti, Ndawut ombooluk o, yogwe ti, nonggop togon yogo menggaarak mbakop?

³⁶At Ndawut nogo Aberiniki inikime unggunuk yoge kagak, ari logonet, At ninogoba endagembogut nen an nogoba endagembogut yoge logonet, Nogoba. It kinom wim mbanak menggendak aan lebenogo kabu'me piiga'lek neegak, neenggi abe'nggan logonok nduk, neya mok o, yoreegerak o, yinuk, yereegerak nogo ti,

³⁷at Ndawut nogo nen, Nogoba endagembogut o, yoreegerak nogo kwe, nonggop togon at ombooluk yogwe mbakop?” yoragagerak. It aakumi ambik kuwak aago wonogwe nogo nen at wone ari nogo inikilom aret mbareegwaarak.

³⁸Inikilom mbakwi wonogwe me, mamunirage logonet, ”It Ala wone liiru mbanak unde nogo nen kinambokam laganggwi iyo, kit kiniki tum wako logonip. Inambogoyum yo'mot langgumbunuk, yi mendek ndi mendek onggo kunggo menggam time nogo, Nit mban keyage wa'ninabuwak, mba'nuk nugwi,

³⁹it Yakuri tamban eeko menggam oolo kwi'nogwe, laago nggwok lako logonet, it aap iyo'nggok kero kwi'nogo menggam mban kwi'nogwe, eeriyak inikilom mbako menggaarak.

⁴⁰It aap ti, kumi togwe inamendek tigippiigwi, aakumi obeelom inombaruwak nduk tamban nggorek aret eekwi, eeko menggaarak ti paga, it aakumi ando maluk onggo mbuuluk inoba piige logonet, it aap ti perak, maluk nggwok aret inoba piyaagin o,” yinuk, yoragagerak.

⁴¹Yorage nagagirik, at Ala ake wu pogo menggam taa'nogo kwi'nage nagagirik, aakumi ambik wu pogo menggam pi nogwe iyareegerak. It aakumi inamendek warak nogo wu apit pi nogwe iigak,

⁴²kwe togwe ambi amendek lek aret me wage nagagirik, mbuti wu mbuuluk mbere'ndak pege kagagerak.

⁴³Pege kage nagagirik, at oone waganggwi nogo wiiragagerak wogo mbareegwa, yorage logonet, ”It aakumi yi, inamendek apit inaani kagak pegaarak kwe, kwe togwe yi perak, amendek abu lek kagak ambi onggo patiyak mendek tigitogon pegerak me, aakumi abok wu pogo menggam wu pugwi yi, we mbuuluk mban pegaarak kwe, kwe togwe amendek lek yi perak, nggwok aret pegerak kagi o, yinuk, abet aret yokkiragi o,” yinuk, yoragagerak.