Read Wano MARAKUT 2 Bible Online

MARAKUT 2 - Wano bible

MARAKUT 2

¹Nogome wonagagirik, ti'nuk, o Kaperenaum wagagerak me, ”Ame wagaarak wonage o,” yogo nogogwaarik,

²aakumi ambik kuwak ari wogogwaarak, o nogome yagabit aago tu ngga'nggi paga luunik wonogwe iigak, wone yorage nagagerak.

³Wone yorage wonage me, aap ambi eenggi-iyok nggilik-nggelok aago me, aap 4 nen ewu'nuk, at owagam wonok pi wogogwaarak.

⁴Ewu'nuk wonok wogo nogogwaarik, oome time Yetut nogo inom aakumi yagabit aago me, unggwi noorak meek age mbareegi, wonok o kirim paga laganggo nogogwaarik, at Yetut wonage me ndak-ndak pelan ndenenogo punuk, aap nogo eyo ndoonak windak menggerak nogo paga windak kagak inaani wuppereegwaarak.

⁵Wuppogo mbareegwa, at Yetut nogo nen it inikime nen at oba abet mba'nuk wonok wogwe nogo yelok iige nagagirik, aap eenggi-iyok nggilik-nggelok aago nogo yoge logonet, ”Naput wae. Komaluk nogo lek eerogo pagagi o,” yoreegerak.

⁶Yoge mbareegi, it Ala wone liiru mbanak unde nogo time kwi'ndak logonet, inikime nen,

⁷”Aap yi nonggop nduk togop yigi mbakop? Nit maluk eekwi lek eerogo pinanege menggerak nogo, at Ala nen mban aret lek a? Togop aret kwe, Ala miyuk-meya agago pege yi, wologwe!”

⁸Yinuk, it iniki togop mbakwi at Yetut nen yelok iige nagagirik, ”Kit nonggop nduk kiniki togop mbako ogotik?

⁹At aap eenggi-iyok nggilik-nggelok aago yi, Kat komaluk lek eerogo pagagi o, yoriyak ti, iya lik, kagare'ngga ndoonak nogo yege menggendak ko'nok nak o, yoriyak ti, iya a? Kit yinip nda!” yorage nagagirik,

¹⁰”Ala nen an aap aret nda'nagagirak nogo nggween paga aakumi inomaluk lek eerogo piyoorak unde mippaneegerak kineenu arubagip nduk, aap yi yogirak me,” yinuk, yorage nagagirik, at aap eenggi-iyok nggilik-nggelok aago nogo yoge logonet.

¹¹”Mi'na'nuk, kat nogo yege menggendak kere'ngga ndoonak nogo ti, ko'nok kame nanok nduk yokkigi o,” yinuk, yoreegerak.

¹²Awo yoge kagak, mi'nage nagagirik, agare'ngga ndoonak nogo yege menggerak nogo ko'nok, it abok inengaanom paga endekem wungge mbareegi, it aakumi nogo nen, ”Nit yogop eekwi ambi abu ninigen kogolik mendek aret eekerak yi, wi!” yinuk, at Ala wogoppogo logonet, pi wareegwaarak.

¹³Pi wakwi iigak, Yetut nogo wundi nage nagagirik, ti'nuk, ne ambi paga yi yenggenak aa'nggi paga nage me, aakumi abok at owagam wagak mban eekwi iinok, wone mamunirage nagagerak.

¹⁴Wone mamunirage nagagirik, tu paga nage logonet, at Alepeyut aput Leewi nogo, it pemerintah inake wu kuwak eeko menggam kwi'ndak wonage me enegen kagagerak. Enegen kage nagagirik, ”Nimbirak nawok nduk, omok o,” yoge mbareegi, mi'nage nagagirik, Yetut imbirak nagagerak.

¹⁵Ti'nuk, peebi nen at Leewi ame nogome Yetut mbi nengge me, it pemerintah inake wu kuwak eeko menggaarak inom, it maluk eeko menggaarak inom, ineebe ambik at Yetut oone konenuwok nduk, inom nogogwaarak nogo Yetut inom lambunik mbi nunggwi me,

¹⁶it aap Pariti mendek Ala liiru mbanak unde ando nogo nen it maluk eeko menggaarak nogo inom, it pemerintah inake wu kuwak eeko menggaarak nogo inom, Yetut inom aret mbi nunggwi inigen iigo nogogwaarik, at oone waganggwi nogo yorogo logonet, ”It pemerintah inake wu kuwak eeko menggaarak inom, it maluk eeko menggaarak inom, nonggop nduk at Yetut inom lambunik mbi nengge agaarik o?” yorogogwaarak.

¹⁷Yorogwe nogo at Yetut aruk konembege nagagirik, ”It aap kugi andi lek kenok ti, Ndoter ka noorak mbakulik o. Ata, andi kenok mban obeelom aganabuwak nduk Ndoter ka noorak mbako menggaarak o. It aap koonak menggaarak kagak, inayonggo pikit nduk woroolik o. Ata, it aap maluk eeko menggaarak kenok mban inayonggo pikit nduk wagagirak o,” yoragagerak.

¹⁸Ne ambit paga nogome logonet, it Yaya oone waganggwi inom, it Pariti mendek nogo inom, tamban eeko logonet, mbi nengga'lek inambe mage negen aret wonogogwaarak. Wonogwe iigak, it aakumi Yetut owagam wogo nogogwaarik, yogo logonet, ”It Yaya oone waganggwi inom, it Pariti mendek inoone waganggwi inom, tamban eeko logonet, mbi nengga'lek inambe mage negen aret wonogwe iigak kwe, kat koone waganggwi ti perak, nonggop nduk mbi nonggo agaarik o?” yoreegwaarak.

¹⁹Yogo mbareegwa, at Yetut nen, ”Aap ambi nen kwe kolage me, owe-awot inom laago lako logonet, inambe mage negen puk logorak op mbakop? Ti lek o. Ogonggolo inom logonet, noorak op o.

²⁰Peebi owe-awot nogo iigak, ogonggolo nogo mban wonok noorak eyom panggo yi wage nogo paga perak, mbi nengga'lek inambe mage negen aret logogun o,” yinuk, yoragagerak.

²¹Yorage nagagirik, ”Yum maan yugu paga ligi ngget laanogo penggaakwi kenok, ligi ngget laanak nogo wonage kagak, yum maan yugu nogo nggwok togon nibik ari menggerak me, ligi ngget laanogo yum maan yugu nogo penggaakulik o. Ngget yugu maan yugu paga nabenogo penggaakaatak kenok, ngget yugu nabenak wonage nogo nggaruk ari logonet, maan yugu nibinik nogo nggwok togon aret ndelak ari menggerak o,” yinuk, yoragagerak.

²²Yorage nagagirik, ”Eyoonggen amburu ngget mendek yiiwak wam agabolo maan ogobakkigirik me tookwi kenok, amburu ngget mendek nen yiiwak maan mendek nogo tubunogo mappege logonet, eyoonggen amburu inom, yiiwak inom lek arigin me, eyoonggen amburu ngget mendek yiiwak wam agabolo maan ogobakkigirik me tookulik o. Ata, eyoonggen amburu ngget mendek ti, yiiwak wam agabolo ngget ogobakkigirik me aret tooko menggaarak o,” yoragagerak.

²³Ti'nuk, ne ambi paga it Yakuri tamban eekwi paga at Yetut oone waganggwi inom gandum awi yarak me nogo logonet, at oone waganggwi nogo nen gandum parum negen me warit nogogwaarak.

²⁴Warit nogwe me, it aap Pariti mendek nogo nen, ”Yetut wae. Ala nen, Tamban eekwi paga togop eeriyak mage o, yugu kagak, it kat koone waganggwi mendek nen ugun eekwi yi pegiyet o.”

²⁵Yogo mbareegwa, at Yetut nogo nen, ”At Ndawut awuri inom mbi lek me, mbi abu logonet, eereegwaarak nogo, Ala wone liiru mbanak paga kinigen liippega'lek me yogo ogotik?

²⁶At Ndawut nogo, at Ala awi wurik me unggwage nagagirik, at Abiyatat it Ala unde inuwe nogo wonage kagak, Roti mbi Ala ake pugu nogo it weelek noorak lek o. It Ala unde kenok mban nonggo logowak o, yinuk, yereegerak kagak, at nengge nagagirik, it inom wonogogwaarak nogo wogorage mbareegi, it abok nunggugwaarak o, yinuk, liiru mbanak wonage nogo kinigen liippega'lek me yogo ogotik?” yinuk, yoragagerak.

²⁷Yorage nagagirik, ”Ala nen, Tamban eekwi paga yi waganggak, ndi waganggak eerugup o, yinuk, aakumi ineebe wakkagagerak ti lek o. Ata, wakka'nuk, tat yonggonggo logorak nduk, Tamban eekwi paga yi waganggak, ndi waganggak eerugup o, yoragagerak me,

²⁸tamban eekwi paga eeko logorak unde ti, aap aret nda'nagagirak an aret o,” yoragagerak.